VOV4.Êđê -  Tlam hruê 23/4, Êpul ktuê dlăng, ksiêm dlăng bruă ruah khua bi ala Quốc hội gưl XV leh anăn phung bi ala HĐND dŭm gưl wưng thŭn 2021-2026 mâo Trần Thanh Mẫn, Khua hlăm Phŭn bruă kđi čar, K’iăng Khua Dhar bruă Quốc hội, K’iăng Khua Êpul hgŭm ruah khua ala čar ngă Khua êpul mâo leh mmông mă bruă hŏng čar Hậu Giang.

Blŭ hrăm ti anôk mă bruă, Trần Thanh Mẫn hoêč hmưi kơ klei tŭ mơ̆ng čar Hậu Giang dưi mâo leh hlăm klei mđĭ kyar bruă duh mkra, mkŏ mkra krĭng ƀuôn sang mrâo, hrui mă prăk knŭk kna, mđĭ kyar anôk bruă nah gŭ mơ̆ng ƀuôn prŏng truh krĭng ƀuôn sang, bi mni kơ dŭm klei tŭ mơ̆ng čar Hậu Giang dưi mâo hlăm bruă pŏk ngă dŭm bruă mprăp kơ klei ruah khua. Trần Thanh Mẫn mñă klă, anei jing gưl bi kƀĭn bruă kđi čar yuôm bhăn, kyua anăn, djăp bruă djŏ tuôm kơ klei ruah khua, Hậu giang brei pral ngă tliêr kjăp, rơ̆ng êngiê, djŏ hdră bhiăn, êđăp ênang, mkiêt mkriêm, bruă gang mkhư̆ klei ruă tưp Covid-19 brei lŏ dơ̆ng ngă bi jăk, amâo ngă ngơi mang.

H Zawut pô mblang