VOV4.Êđê- Aguah mbrue (22/4), knơ̆ng bruă sang čư̆ êa čar thái nguyên mkŏ mjing leh klei bi trông kơ bruă hgŭm mđĭ kyar hiu čhưn ênguê 6 čar Việt Bắc mâo: Hà Giang; Tuyên Quang; Bắc Cạn; Cao Bằng; Thái Nguyên, Lạng Sơn. Leh êbeh 10 thŭn mâo klei bi mguôp bruă hiu čhưn ênguê 6 čar Việt Bắc hŏng ai tiê “Čŏng čiăng – mtăp mđơr – tŭ jing – hrăm mbĭt mâo klei tŭ dưn” mâo ba wĭt leh boh tŭ dưn klă mngač, dŭm tuor hiu čhưn ênguê mâo bi mguôp, ênoh tue đuĕ hiu đĭ amâo mâo mdei hlăm grăp thŭn kah knar êbeh 16%.

Ti anôk trông čhai mâo lu klei blŭ mơ̆ng puhng khua kiă kriê, phung dlăng bruă, phung duh mkra bruă hiu čhưn ênguê kñăm mđĭ hĭng klei bi mguôp bruă hiu čhưn ênguê hlăm krĭng, mjing lu mta mnơ̆ng dhơ̆ng kơ bruă hiu čhưn ênguê hŏng klei jăk, djŏ hŏng ai tiê phung tue hiu čhưn. Êpul hgŭm bruă hiu čhưn ênguê dŭm čar Việt Bắc mâo kuôl kă leh klei hgŭm mđĭ kyar bruă hiu čhưn ênguê hŏng Êpul hgŭm bruă hiu čhưn ênguê yang ƀuôn. Jih jang phung duh mkra 6 boh čar Việt Bắc mâo kuôl kă klei hgŭm hŏng phung duh mkra atăt tue hiu čhưn Hà Nội, ƀuôn prŏng Hồ Chí Minh./.

Pô mblang: Y-Khem Niê