VOV4.Êđê - Klei mrâo yang hruê dơ̆ng 11/5 mơ̆ng phŭn bruă mdrao mgŭn brei thâo lŏ mâo 18 čô mnuih mrâo djŏ klei ruă tưp Covid-19, hlăm anăn mâo 2 čô mơ̆ng ala čar tač êngao dưi mâo klei bi ktlah êjai dôk mŭt hlăm ala čar, 16 čô mâo klei ruă hlăm yang ƀuôn jing dŭm čô mnuih dôk hlăm anôk bi ktlah, anôk mâo klei čuăl krĭng. 2 čô mơ̆ng ala tač êngao dưi mâo klei bi ktlah ti čar Đồng Nai. Hlăm ênoh 16 čô anăn: mâo 10 čô ti Bắc Giang, 2 čô ti Hà Nội, 2 čô ti Quảng Trị, 1 čô ti Bắc Ninh lehanăn 1 čô ti Hải Dương. tĭng truh kơ 12 mmông hruê 11/5, ala čar Việt Nam mâo kluôm ênŭm 2.071 čô mnuih ruă hlăm ala čar lehanăn 1.436 čô mnuih mơ̆ng ala tač êngao. Ênoh mmnuih ruă mrâo tĭng mơ̆ng hruê 27/4 truh kơ ară anei mâo 501 čô mnuih. Khua phŭn bruă mdrao mgŭn Nguyễn Thanh Long brei thâo, hlăm wưng klei ruă tưp Covid-19 ară anei, čiăng dlăng kơ bruă ksiêm mkă kman jing bruă klam tal êlâo hĭn, mâo klei mjêč hĭn. Khua phŭn bruă mdrao mgŭn lŏ brei thâo, ala čar drei dôk hlăm klei hưn mjhar kyua dôk arưp klei đĭ lar ktang mơ̆ng virus.