VOV4.Êđê- Aguah mbrue (4/5), ti tač êdeh phiơr prŏng Watay, ƀuôn prŏng phŭn Vientian, mkŏ mjing leh klei mđup brei mnơ̆ng mơ̆ng Đảng, phung ƀuôn sang Việt Nam đru kơ Lao mdrơ̆ng hŏng klei ruă tưp covid 19. Blŭ hrăm hlăm knăm anei, k’iăng khua phŭn bruă hŏng tač êngao Tô Anh Dũng bi klă Việt Nam hrăm mbĭt nanao hŏng Lao hlăm bruă mdrơ̆ng hŏng klei ruă tưp covid 19. Đăo knang ti gŭ klei kiă kriê kjăp mơ̆ng Đảng, knŭk kna, mbĭt hŏng klei gĭr jih ai tiê, klei bi sa ai mơ̆ng dŭm knơ̆ng dhar bruă djŏ tuôm lehanăn jih jang phung ƀuôn sang, lăn čar Lao srăng pral dưi gang mkhư̆ klei ruă tưp, lŏ krŭ wĭt bruă duh mkra ala ƀuôn lehanăn lŏ dơ̆ng đĭ kyar hŏng klei kjăp. K’iăng khua knŭk kna Lao Kikeo Khaykhamphithun ăt mñă, Việt Nam jing ala čar tal êlâo đru ngăn prăk, tiŏ hriê phung thơ̆ng kơ bruă, mơ̆it mnơ̆ng mă bruă mdrao mgŭn truh kơ Lao, đru mdrơ̆ng klei ruă tưp lŏ bluh đĭ tal anei. Klei anei bi klă klei thâo bi guôp prŏng, lehanăn hgŭm bruă kluôm dhuôm plah wah dua ala čar Việt Nam lehanăn Lao./.

Pô mblang: Y-Khem Niê