VOV4.Êđê-  Aguah mbrue (26/4), Dhar bruă ruah khua ƀuôn prŏng Đà Nẵng mkŏ mjing leh klei bi kƀĭn tal 4 bi tŭ ư dăp ênoh phung mgơ̆ng ruah pô bi ala Quốc hội gưl 15, lehanăn HĐND ƀuôn prŏng wưng păn bruă 2021 – 2026; hlue ngă hdră bi tuôm hŏng phung ƀuôn sang, phung mgơ̆ng ruah pô bi ala quốc hội lehanăn HĐND ƀuôn prŏng. Khua hlăm phŭn bruă kđi čar, Khua hlăm êpul kiă kriê bruă Đảng gưl dlông Võ Văn Thưởng, mâo leh gưl dlông tiŏ nao mgơ̆ng asei ti ƀuôn prŏng Đà Nẵng.

Ti anôk bi kƀĭn, phung bi ala mâo leh klei bi tŭ ư mbha ênoh phung mgơ̆ng asei jing pô bi ala Quốc hội gưl 15, lehanăn HĐND wưng păn bruă 2021 – 2026 tui si anôk mkŏ mjing klei ruah khua. Mơ̆ng anăn, ƀuôn prŏng Đà Nẵng mâo 10 čô mgơ̆ng ruah jing pô bi ala Quốc hội gưl 15, hlăm anăn mâo dua čô mgơ̆ng ruah mâo gưl dlông tiŏ hriê anăn jing Võ Văn Thưởng, lehanăn aduôn Nguyễn Thị Kim Thuý, khua klam bruă kơ yang ƀuôn hlăm Quốc hội./.

Pô mblang: Y-Khem Niê