VOV4.Êđê - Aguah mbrue (31/3) Quốc hội bi leh bruă ruah khua Quốc hội gưl 14, khua kiă kriê êpul hgŭm ruah khua ala čar hrô kơ nguyễn Thị Kim Ngân, jing mnuih mâo leh Quốc hội brei mdei bruă. Hŏng hră mplĕ tŭ ư prŏng, Vương Đình Huệ- khua hlăm phŭn bruă kđi čar, khua bruă Đảng ƀuôn prŏng Hà Nội, Khua êpul phung bi ala Quốc hội ƀuôn prŏng Hà Nội djŏ ruah ngă khua Quốc hội gưl 14, Khua Êpul hgŭm ruah khua ala čar. klei mklă mtrŭn ruah Vương Đình Huệ păn ngă bruă lehanăn mâo phung bi ala Quốc hội bi klă hŏng ênoh tŭ ư 473/473 phung bi ala jing knar 98,54% ênoh jih jang phung bi ala Quốc hội).

Blŭ leh klei đĭ păn bruă, khua Quốc hội mrâo Vương Đình Huệ ƀuăn srăng jih ai tiê pô, mbĭt hŏng jih jang dhar bruă gĭt gai Quốc hội, dŭm anôk bruă hlăm Quốc hội lehanăn phung bi ala Quốc hội lŏ dơ̆ng čuê, hlue knhuah gru jăk siam, lehanăn boh tŭ dưn prŏng Quốc hội mâo leh hlăm dŭm gưl ênuk, lŏ dơ̆ng mlih mrâo hdră mă bruă, mđĭ hnơ̆ng kjăp, klei tŭ dưn bruă knuă hlăm Quốc hội kyua mta kñăm prŏng hĭn jing duh kơ klei tŭ dưn ala čar, djuê ana, kyua klei jăk yâo phung ƀuôn sang./.

Y Khem pô mblang