VOV4.K’ho- Ồng A Giói (kòn cau Rơ Măm) ơm tàm xã Mô Rai, kơnhoàl Sa Thầy, càr Kon Tum là dùl nă cau ling yau geh griăt bơh Sư đoàn 320, Quân đoàn 3 dê lơh ngan hòi jà kòn cau Rơ Măm bơh tiah kơh bơnơm, mù tàm tiah thòng lơyah nàng crơng gơs ƀòn, bơt bơtàu rài kis hờm ram, tơl làm. Ƀòn Le bơh ồng hòi jà crơng gơs, tŭ do neh geh dờp là Ƀòn niam chài kấp càr, mờ ngan ngồn neh gơ gơs là tiah àng sơrdah bè bơtàu tơnguh lơh sa, bơta niam chài, mpồl bơtiàn mờ sền gàr dà lơgar, bơta lơngap lơngai tàm tiah nhàr lơgar tiah đah Tô Tây Nguyên dê.

Lài mờ nam 1975, mpồl bơtiàn kòn cau Rơ Măm mìng geh 159 nă cau mờ 26 hìu bơnhă, ơm kis ntrờñ gùt dar ală tiah jat gơl gùng tiah nhàr lơgar. Tŭ do, kòn cau Rơ Măm neh gơguh rlau 400 nă cau mờ mờr 100 hìu bơnhă ơm kis tàm ƀòn Le, xã Mô Rai, kơnhoàl Sa Thầy, càr Kon Tum neh tam gơl uă ngan.

Nàng geh ală cồng nha bơh sơn rờp hơ̆, ồng A Giói neh kơlôi sơnơng uă ngan, ngan là bơh tŭ ồng jơh tơngai lòt ling, rê wơl tàm ƀòn. Sền gŏ ală hìu đam lơh mờ ja sèt, ală hìu kù, hìu sơndìp rơnŭ tàm mìr lơh kòi ờ hềt tus ngai tơn hào mờ neh ờ geh cau ơm... uă mang ồng A Giói kơlôi sơnơng ờ gơtùi bĭc tài bơh sơnđàc sơngĭt ngan làng bol he dê. Ồng kơlôi, he là dùl năc cau ling wa Hồ, là kuang bàng, đảng viên ling klàng rê tàm ƀòn, mờ lời làng bol ƀòn lơgar in jơgloh rƀah, bòl glar, kòp tê jê să là geh glài ngan, pal lơh broă lơi nàng dong kòn cau Rơ Măm lik klàs bơh rƀah.

Lồi dŭt, ồng A Giói lơh nền hòi jà làng bol “mù tàm jơng bơnơm” crơng gơs ƀòn. Gĭt do là dùl broă lơh kal ke ngan, tài bơh, bơh lài òr kòn cau Rơ Măm neh mờng kuèng mờ rài kis jòi is, sa is, jat kềng gah bơnơm, den ồng A Giói jơh nùs ngan hòi jà, mơkung ai hìu bơnhă he dê bal mờ hìu bơnhă 3 nă đảng viên ndai tàm jơi bơtiàn kòn cau Rơ Măm lik bơh bơnơm Yang Sĭt mù crơng gơs ƀòn Le tàm xã Mô Rai, kơnhoàl Sa Thầy, càr Kon Tum bè tŭ do.

                               Ồng A Giói yal rùp hin ală broă lơh bơh làng bol tàm ƀòn dê

Ồng A Giói kah jơnau Bác Hồ bơto: “Đảng viên pal lòt lài hơđap, lơh krơh đơs bơta di, lơh broă niam...”. Broă lơh bơh sơn rờp tŭ mù tàm jơng bơnơm là lơh hìu ơm, rồ ù bŏ lơh sre sih kòi, oh kòn geh bơsram akhar, kòp jê geh sơm kòp... den tơl nă cau ngan ngồn là geh bal mờ ồng rê ơm tàm ƀòn pa.

Đơs den bè hơ̆ mơya lơh den kal ke ngan. Tơngai bơh sơn rờp “mpồl ling lam lài” sih mờr 3 sào kòi sre, cồng nha ờ hoan geh ngan. Moat jrùm tàm nùs mờ kung kơlôi “jơnau bơceh lơh” bơh he dê ờ geh cồng nha, ồng A Giói lòt jòi tus Mpồl ling sền gàr tiah nhàr lơgar càr Kon Tum, tơnơ̆ do geh tai kuang bàng, công nhân Đoàn Kinh tế- Quốc phòng 78 (Binh đoàn 15) jà dong kờl. Lồi dŭt den ală ƀlàng sre kòi bơh ồng dê kung tơlir niam ngan, ală sơnđùng kòi ntoal ngan, ală mìr tam bùm blàng, tơngơi dờng tơlir niam, ai tơn hào uă ngan.

Bè dùl broă lơh tờm, ồng A Giói bal mờ 3 nă đảng viên bơh Chi bộ ƀòn dê pơn jat tai lòt gan brê, re dà dờng, dà croh lòt tus tàm tiah tờm blơi iar, sur, kơnrồ me rê ròng. Ù ơnàng, nhơ̆t niam, sur, iar, kơnrồ dờng mhar ngan bè cau khồm. Broă lơh “ ƀòn pa” bơh ồng A Giói dê bơh sơn rờp geh cồng nha mờ ờ gŏ Yàng lơh glài ờ. Ồng A Hlới- cau dră wơl kơl dang nùs ngan mờ jơnau lơh ngan rê tàm ƀòn Le bơh ồng A Giói dê, neh dờp bơta tìs bơh he dê, den đơs mờ tơl nă cau : “Bác Hồ, Đảng, Dà lơgar kờñ ngan kòn cau Rơ Măm bo he dê”! Pal mù jat tĕ ồng A Giói mơ”. Hơ̆ là jơh jơi bơtiàn kòn cau Rơ Măm mù rê ơm bal tàm ƀòn Le lơh hìu, rồ ù bŏ lơh sre sih kòi, tam tơngời, bùm blàng....

Ndul ồng A Giói dê bè gĭt ñŏ tài bơh chờ hờp ngan. Ồng jơh nùs bơto pơlam làng bol pŏ ù, jì nhơ̆t, ơn phơng, sih tam, mờ pờ anih ơn prap kòi, tơngời lơh geh bơh kàl lài bơh ồng dê nàng ai làng bol in lơh sơltìl, lơh gơlik uă sơntìl phan tam... Tus tŭ do, làng bol ƀòn Le ndrờm gĭt mờ broă lơh kòi sre, tơngời bơtờp sơntìl pa, lơh sa kơ̆ kơl jap, uă hìu bơnhă pas sơm geh phan sa, phan prap. Gĭt nđờ rơbô nă làng bol tàm gơl gùng tiah nhàr lơgar gơwèt càr Kon Tum, Gia Lai rê bơsram, lơh jat bal, crơng gơs ƀòn, bơt bơtàu rài kis pa gùt dar ƀòn Le mờ jat kềng gah Gùng dờng 14C.

Tus tŭ do, ƀòn Le neh geh dùl Chi bộ mờ 10 nă đảng viên. Kòn cau Rơ Măm neh rồ ù brê mờ tam geh 90 lồ bùm blàng, 80 lồ kòi sre, 70 lồ tờm kao su bal mờ gĭt nđờ rơhiang nơm sur, kơnrồ, be ală bơta. Kơnòm dềt ndrờm geh lòt bơsram. Sau A Hương neh mut bơsram đại học, 20 nă ơruh pơnu neh tus bal is mut lơh công nhân tàm Đoàn Kinh tế- Quốc phòng 78, rlau 98%  ală hìu bơnhă geh rơndeh môtô, 100% ală hìu bơnhă geh tivi. Jơh ală hìu bơnhă làng bol Rơ Măm ndrờm yồng rùp hin mờ duh khoai Bác Hồ mờ nùs nhơm ki ngàm ngan, bè là nàng ưn ngài Bác Hồ neh cèng wơl rài kis hờm ram, chờ hờp ngai do in.

Ƀòn Le geh dờp là Ƀòn niam chài kấp càr mờ ngan ngồn neh gơgơs là bơta àng sơrdah bè bơtàu tơnguh lơh sa, bơta niam chài, mpồl bơtiàn mờ sền gàr dà lơgar, bơta lơngap lơngai tàm tiah nhàr lơgar tiah đah Tô Tây Nguyên dê.

Sền ală sră jờng rơ bơh Ủy ban Mặt trận dà lơgar Việt Nam mờ Ủy ban Nhân dân càr Kon Tum pà he in, ồng A Giói gơlơh ngoh rngăc ngan. Ồng tơngkah is să tờm he dê là pal lơh uă broă niam rlau tai ai làng bol ƀòn lơgar in. Ƀòn Le bơh kòn cau Rơ Măm  dê neh geh crơng gơs bơh jơnau yal yau geh cih bơh dùl nă cau ling yau lơh krơh niam dê.

Quốc Học jat băo Ling klàng Làng bol- Cau mblàng K’ Hạnh