VOV4.K’ho- Tàm Hà Nội, Ủy ban Dân tộc mờ Đại sứ Ai-len tàm lơgar Việt Nam neh bơyai lơh kĭ sră nggal tam gơl, bơtơl jơnau ring bal dong kờl đah Chính phủ Việt Nam mờ Chính phủ Ai-len dong kờl ală xã uă kal ke gơ wèt broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021 tus nam 2030.

Đơs tàm dơ̆ kĭ, Bộ trưởng, Chủ nhiệm Ủy ban Dân tộc ồng Hầu A Lềnh đơs nền, tàm sùm 15 nam do, Chính phủ Ai-len sùm sền gròi dong kờl sùm ai tiah làng bol jơi bơtiàn kòn cau dùl êt nă cau bơh lơgar Việt Nam dê in. Ală bơnah dong kờl là khà priă jền kuơmàng ngan. Do ờ mìng là phan bơna mờ gam cèng tàm hơ̆ nùs nhơm dờng màng bơh Chính phủ mờ làng bol Ai-len dê lời ai lơgar Việt Nam in mờ lời ai mpồl bơtiàn ală jơi bơtiàn kòn cau dùl êt nă cau tàm tiah kal ke ngan rlau jơh tàm gùt tơngai lài. Bơnah dong kờl bơh Chính phủ Ai-len dê neh pơgồp bơnah tơn jơh jơgloh tơrmù rƀah tàm lơgar Việt Nam.

Cau mblàng K’Duẩn