VOV4.K’ho- Jơnau geh ngan bau gờñ mờ bau mờ cau rềp jơi nòi bal neh mờ gam gơ lời wơl uă jơnau gơ aniai ai hìu bơnhă in, là dùl tàm ală jơnau bơh tài lơh gơmù bơta niam khà kờp làng bol, gơ gơs là jơnau kơryan gơwèt mờ broă bơtàu tơnguh lơh sa- mpồl bơtiàn. Tơnơ̆ 05 nam, lam lơh jăt Kơrnoăt sồ 498 bơh Thủ tướng Cíñ phủ dê, khà bau gờñ tàm tiah jơi bơtiàn kòn cau dùl êt nă cau gơlơh bè ngai sơlơ gơmù rơhời. Tàm ală càr tiah jơi bơtiàn kòn cau dùl êt nă cau, ală tơngume gơrềng tus bơto bơtê ùr klau, bơta gĭt wă kơrnoăt boh lam geh ai tơmŭt tàm jơnau bơto bơtê, lơh broă đah bơdìh ơdŭ bơsram tàm hìu bơsram, neh rơhời lơh tam gơl bơta gĭt wă bơh oh kòn làng bol ală jơi bơtiàn kis tàm tiah kơh bơnơm dê.

Lơh jăt Kơrnoăt sồ 498 nam 2015 bơh Thủ tướng Cíñ phủ dê, Ủy ƀan Ñân zân càr Nghệ An neh geh Broă rơndăp lơh sồ 599 bè lơh jăt Rơndăp broă lơh Tơrmù ƀà jơnau bau gờñ mờ bau mờ cau rềp jơi nòi bal tàm tiah làng bol jơi bơtiàn kòn cau dùl êt nă cau bơh càr dê. Uă broă lơh geh kwơ ngan bè bơyai lơh ală dơ̆ pơrlòng, mblàng yal bơto pơlam bè ală tơngume geh gơrềng neh geh lơh tàm ală hìu bơsram kấp bàr, kấp pe bơh ală broă lơh pơrjum bơdìh ơdŭ bơsram. Oh Lương Thanh Thảo là kơnòm bơsram Hìu bơsram Kấp bàr Lạng Khê, kơnhoàl Con Cuông, càr Nghệ An yal: Tŭ kơno mblàng yal do den sau gĭt là ờ gŏ di bau lài mờ 18 sơnam mờ ờ gŏ di bau mờ cau rềp jơi nòi bal. Gơ geh lơh aniai ờ niam ngan tus bơta pràn kơldang să jan mờ lơh tìs kơrnoăt boh lam.

Xã Nậm Nhóong, kơnhoàl Quế Phong, càr Nghệ An là dùl tàm 12 xã bơh càr Nghệ An dê geh Ƀan Jơi bơtiàn kòn cau càr lam lơh tơrlòng lài lơh jăt Rơndăp broă lơh. Jăt ồng Lữ Trung Thành, Củ tịc Ủy ƀan Ñân zân xã Nậm Nhoóng, kơnhoàl Quế Phong, càr Nghệ An yal, lài mờ nam 2015, pah nam xã geh tus gĭt nđờ jơ̆t nă cau bau gờñ, tus tŭ do jơnau geh ngan do neh geh tam gơl uă ngan. Ồng Lữ Trung Thành, yal: Ủy ƀan Ñân zân xã neh bơyai lơh là mblàng yal lam lơh jăt tơl jơh tơl nă kwang bàng, đảng viên mờ làng bol, hơ̆ sồng là lam lơh jăt niam jăt rơndăp broă lơh. Bơh hơ̆, neh tơrmù ƀà geh là jơnau bau gờñ mờ bau mờ cau rềp jơi nòi bal. Den tus tàm nam 2017 kung geh sơl dùl nă cau. Bơh hơ̆ tus tŭ do den ờ geh dùl nă cau lơi.

Tàm càr Bắc Kạn, Ƀan Jơi bơtiàn kòn cau càr dê kung neh đơng lam pơgồp bal mờ ală anih lơh jăt Rơndăp broă lơh tơrmù ƀà jơnau bau gờñ mờ bau mờ cau rềp jơi nòi bal tàm ală tiah jơi bơtiàn kòn cau dùl êt nă cau, mờ 11 broă lơh tơrlòng lài tàm ală tiah tơrgùm uă cau là làng bol cau Mông, cau Dao bè tàm kơnhoàl Pắc Nặm, kơnhoàl Chợ Đồn...

Kwơmàng Tỉnh đoàn Bắc Kạn gam lam lơh bơh ală broă lơh lơh lèu tàm hìu bơsram, ală thôn, ƀòn mờ bơyai lơh ală dơ̆ pơrlòng nàng gĭt bè jơnau tam bau ai kơnòm bơsram in. Bi Ma Thị Mận, là Phó Ƀí thư Tỉnh đoàn Bắc Kạn pà gĭt: Ală nam do broă tus bal mblàng yal rơcăng sơndră bau gờñ mờ bau mờ cau rềp jơi nòi bal geh sền là dùl kơnòl broă tờm tàm broă lơh đoàn mờ ơruh pơnu kơnòm pa tàu kơnòm dềt tàm càr. Bi Ma Thị Mận, đơs: Bol añ kung ngui uă rlau broă lơh lơh lèu, sền swì chài wơl ală tơngume gơwèt mờ jơnau cih bơh kơrnoăt boh lam dê nàng pơgồp bal tàm ală jơnau lơh lèu mblàng yal. Bơh hơ̆ lơh ai cau iăt in ƀươn wă, ƀương wờng mờ ngan là bàr pe anih neh lơh jăt bè broă lơh mblàng yal mờ dà làng bol kòn cau dê bè dà Mông, dà Dao. Lài ngan là bol añ gam tơrgùm tơn tàm ală oh là ơruh pơnu kơnòm pa tàu mờ kơnòm dềt, sơnam ƀươn ngan gơ gơs là cau gơbàn aniai bơh jơnau bau gờñ dê. Bơdìh hơ̆ tai den mè bèp kơnòm bơsram dê kung là cau kờñ ngan pal geh bơto yal bơta gĭt wă wil tơl bè kơrnoăt boh lam. Tài bơta geh ngan pà gŏ, geh uă ngan cau geh jơnau là tài bơh bơta rồn bơklơn bơh đah hìu bơnhă dê.  

Dilah bè nam 2016, Bắc Kạn geh pơgăp 200 nă cau bau gờñ den nam 2020 neh gơmù pơgăp 50%. Bulah bè hơ̆, khà dơ̆ kung gam uă ngan sơl mờ kal ke. Bắc Kạn gĭt nền loh làng bal mờ lơh pràn mblàng yal, lơh uă ală broă lơh hòi jà tơnguh uă bơta gĭt wă bơh làng bol dê den bơta mŭt lơh bal kràñ cê jơh nùs dùl ròt bal bơh ală kấp, ală gah, gơnoar ătbồ ƀòn lơgar dê kung là kờñ ngan sơl. Bơta mŭt lơh bal jơh nùs bơh jơh ală anih lơh broă cíñ trị dê. Mpồl cau bơh càr tus tơn tàm ală ƀòn geh gơ gơs là jơnau tờm ngan nàng kơryan mờ tơn jơh tĕ jơh ală jơnau bau gờñ mờ bau mờ cau rềp jơi nòi bal.

Bulah geh ală tềl tơngŏ bè khà bau gờñ mờ bau mờ cau rềp jơi nòi bal geh gơmù sơl tàm ală nam do mơya kung gam ờ hềt lơh geh sơl pơndrờm mờ jơnau kờñ bal bơh Rơndăp broă lơh 498 dê. Tàm tơngai bơh nam 2021- 2025, ală anih lơh broă cíñ trị ală tiah pal ơn jơnau bau gờñ mờ bau mờ cau rềp jơi nòi bal tàm tơngai rài kis pờ ơnàng mờ uă gah. Lơh pràn ală broă lơh rơcăng lài mờ sơndră wơl mờ jơh ală broă lơh pờng gơwèt mờ kơnòm ùr mờ kơnòm klau jơi bơtiàn kòn cau dùl êt nă cau. Bal mờ hơ̆, pal lơh uă, pơgồp bal ală priă jền nàng pơgồp bal lam lơh jăt. Kwơmàng kờñ pal lơh loh ală tơngume, broă jàu, kơnòl broă nàng bơtòm tơrgùm bal tàm Broă lơh Jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2020- 2025.

Cau cih VOV4- Cau mblàng Lơ Mu K’Yến