VOV4.K’ho– Poh lài, Ủy ban Mặt trận dà lơgar Việt Nam ală càr tàm tiah Tây Nguyên neh lơh gơs broă bơyai lơh pơrjum cribơyai dơ̆ 3 nàng cih mat ală cau tơl khà tơlik mat tĕ khà kuang bàng Quốc hội khóa 15, kuang bàng Hội đồng Nhân dân càr tơngai lơh broă bơh nam 2021 tus nam 2026. Broă lơh rơcang tus ngai tĕ khà gam geh ală tiah bơyai lơh jat di mờ jơnau cih bơh adat boh lam dê.

Tàm pơrjum cribơyai dơ̆ 3 bơh càr Gia Lai dê, tơnơ̆ tŭ cribơyai 100% kuang bàng ring bal cih mat 10 nă cau yal tơnggit tơlik mat tĕ khà kuang bàng Quốc hội khóa 15. Pơrjum neh ring bal ai 3 nă cau tơlik mat tĕ khà dan lik bơh sră cih mat cau tơlik mat tĕ khà ờ tus bal tĕ khà Quốc hội khóa 15. Pơrjum neh lơh nền cih mat 119 nă cau tơlik mat tĕ khà Kuang bàng Hội đồng Nhân dân càr Gia Lai khóa 12, tơngai lơh broă bơh nam 2021 tus nam 2026. Jat mò R’chăm Hdéo, kuang geh jơng Ủy ban tĕ khà càr Gia Lai pà git, ală cau tơlik mat tĕ khà dan lik bơh sră cih mat cau tơlikmat tĕ khà kuang bàng Quốc hội khóa 15 ndrờm là jat bơta kơp kờñ is, ờ lơh gơ rềng tus rơndap tap sèng, khà ai broă tơlik mat tĕ khà kuang bàng Quốc hội khóa 15: “Bơh pơrjum cribơyai dơ̆ 3, añ gŏ geh 3 nă kuang bàng dan is lik bơh sră cih mat cau tơlik mat tĕ khà kuang bàng Quốc hội khóa 15 do den bơh pơrjum cribơyai mờ ai jơnau đơs bơh cau tĕ khà dê den 3 nă cau ndrờm tơl khà nàng tơlik mat tĕ khà kuang bàng Quốc hội, mơya ală cau do neh kờñ is ờ bài tơlik mat tĕ khà kuang bàng Quốc hội tai den să tờm añ sền dờng màng jơnau lơh nền khi dê, broă do ờ lơh gơ rềng tus rơndap tap sèng, kjà kuang bàng Quốc hội bơh càr Gia Lai dê”.

Ồng Đinh Ngọc Hải, Phó Chủ tịch Ủy ban Mặt trận dà lơgar Việt Nam càr Gia Lai yal, tơnơ̆ pơrjum cribơyai dơ̆ 3, Ủy ban tĕ khà càr Gia Lai neh pơn dut mat 14 nă cau tus bal tơlik mat tĕ khà kuang bàng Quốc hội khóa 15 (tàm hơ̆ dà lơgar yal tơnggit 4 nă, càr geh 10 nă): “Tơnơ̆ tŭ geh cồng nha pơrjum cribơyai dơ̆ 3 den geh cih mat ngan ngồn, bơh hơ̆ Ban Thường trực Mặt trận dà lơgar Việt Nam càr mờ gơnoar atbồ ală kấp geh pơgồp bal mờ Ủy ban Nhân dân dùl kấp bal, bơt bơtàu broă rơndap lơh ală cau tơlik mat tĕ khà kuang bàng Quốc hội kung bè tơlik mat tĕ khà kuang bàng Hội đồng nhân dân càr bơyai lơh tìp mat cau tĕ khà nàng lam sồr tĕ khà kờñ ai tơnggŏ gơnoar, kơnòl broă he dê. Bơh hơ̆ dong cau tĕ khà git kơnòl bơh tơl nă cau tơlik mat tĕ khà dê, dilah geh pồ den geh ai tơnggŏ kơnòl he dê tàm broă lơh bơt bơtàu mpồl gơnoar atbồ ală kấp bè lơi”.

Tàm Dak Lak, poh lài, bal mờ broă bơyai lơh pơrjum cribơyai dơ̆ 3, Ủy ban Mặt trận dà lơgar Việt Nam càr neh yal cồng nha bơyai lơh ai jơnau đơs mờ bơta pin dờn bơh cau tĕ khà tiah ơm kis dê, ring bal mat ală cau tơl khà tơlik mat tĕ khà kuang bàng Quốc hội khóa 15 mờ tơlik mat tĕ khà kuang bàng Hội đồng Nhân dân càr, tơngai lơh broă bơh nam 2021 tus nam 2026. Bơh cribơyai, tàm pơrjum cribơyai dơ̆ 3, ală kuang bàng neh pờ tê ring bal cih mat 11 nă cau ngan ngồn tus bal tơlik mat tĕ khà kuang bàng Quốc hội khóa 15 (ờ hềt kờp 4 nă cau là kuang bàng bơh dà lơgar yal tơnggit); ring bal ai 1 nă cau lik bơh sră cih mat cau tơlik mat tĕ khà kuang bàng Quốc hội khóa 15. Pơrjum kung ring bal mat 125 nă cau tơl khà tơlik mat tĕ khà Hội đồng Nhân dân càr, tơngai lơh broă bơh nam 2021 tus nam 2026. Mò Nguyễn Thị Thu Nguyệt, Kuang atbồ Mpồl tam klac cau ùr Việt Nam càr Dak Lak pà git: Nàng kờñ geh 305 cau tơlik mat tĕ khà là cau ùr gơ gơs kuang bàng Hội đồng Nhân dân ală kấp, Mpồl geh pờ 4 ơdŭ bơto pơlam tàm ală kơnhoàl Krông Ana, Ea Hleo mờ ƀòn dờng Buôn Ma Thuột, lời ai rlau 300 nă cau ùr dơ̆ sơn rờp tus bal tơlik mat tĕ khà kuang bàng Hội đồng Nhân dân ală kấp in: “Jat bol hi den do là dùl broă lơh nàng dong kờl di tŭ ai ală cau tơlik mat tĕ khà in bè jơnau git wă, bơta chài lam sồr pơrlòng tĕ khà nàng dong ală cau tơlik mat tĕ khà geh jơnau git wă kuơmàng, pin dờn, geh nùs nhơm, bồ tơngoh nàng mut tàm dơ̆ lam sồr pơrlòng tĕ khà mờr tus lơh geh cồng nha niam ngan rlau jơh. Kuơmàng jat khà ai tơlik là lơh ngan geh 30% cau tơlik mat tĕ khà là cau ùr gơ gơs kuang bàng Hội đồng Nhân dân ală kấp”.

Dak Nông bơyai lơh pơrjum cribơyai dơ̆ 3

Tàm càr Dak Nông, tơnơ̆ tŭ cribơyai, 100% kuang bàng tus bal pơrjum neh pờ tê ring bal cih mat ală cau tơl khà tơlik mat tĕ khà kuang bàng Quốc hội khóa 15 geh 10 nă cau (tàm hơ̆ dà lơgar yal tơnggit 2 nă cau, càr yal tơnggit 8 nă cau) mờ ring bal ai 3 nă cau neh geh sră dan lik bơh sră cih mat cau tơlik mat tĕ khà ờ tus bal tĕ khà kuang bàng Quốc hội khóa 15. Bal mờ hơ̆ pơrjum kung neh cih mat 88 nă cau tơl khà tơlik mat tĕ khà Hội đồng Nhân dân càr Dak Nông tơngai lơh broă bơh nam 2021 tus nam 2026. Ồng Điểu Xuân Hùng, Chủ tịch Ủy ban Mặt trận dà lơgar Việt Nam càr Dak Nông pà git: “Tơnơ̆ pơrjum cribơyai dơ̆ 3 tơn jơh, kơnòl bơh Ủy ban thường trực Mặt trận dà lơgar càr Dak Nông dê, bol hi geh pơn dut cih mat cau tơlik mat tĕ khà kuang bàng Quốc hội khóa 15 mờ Hội đồng Nhân dân càr. Bol hi geh lòt tus kấp hơ đơm nàng sền gròi, lùp sền gơ in dipal khà làng bol, cau tĕ khà ờ hềt ring bal gam kòl yan nàng gàr broă tĕ khà geh lơh jat bơta làng bol lơh tờm, di mờ adat boh lam. Bal mờ broă sền gròi jơh ală cau tơlik mat tĕ khà kuang bàng Quốc hội khóa 15 mờ Hội đồng Nhân dân ală kấp, bol hi geh lòt lam sồr cau tơlik mat tĕ khà dùl anih êt ngan rlau jơh là 10 dơ̆, ai kuang bàng Hội đồng Nhân dân càr dùl anih êt ngan là 5 dơ̆ jat jơnau cih bơh adat boh lam dê”.

Tơnơ̆ pơrjum cribơyai dơ̆ 3, Ủy ban tĕ khà ală càr tàm tiah Tây Nguyên geh pơn jat tai bơyai lơh ală broă nàng ală cau tơlik mat tĕ khà in lam lơh lam sồr tĕ khà, yal mờ cau tĕ khà bè jơnau kờp dŭ broă lơh he dê nàng kờñ lam lơh kơnòl broă bơh kuang bàng dê dilah geh pồ mờ cribơyai ală broă mờ cau tĕ khà sền gròi.

 Cau mblàng K’Duẩn