VOV4.K’ho - Bơta niam mpồl cau lơh sơnơm sùm là bơta geh mpồl bơtiàn sền gròi, tài bơta do geh gơ rềng tơn tus pràn kơldang să jan, màng kis mờ bơta niam rài kis kòn bơnus dê. Git loh bơta hơ\, tàm uă nam do, hìu bơsram Cao đẳng Y tế Daklak sùm lơh ngan tàm broă bơto bơsram, sền gròi bơto bơtê ală rơnàng cau bơsram dờng jak, là bơnàng jă lài ngan bơh dùl mpồl kuang bàng lơh sơnơm jak chài, drơng jơnau kờ` mpồl bơtìan dê tàm tơngai tơnơ\ do:

Mpồl cau ai tơnggit jơnau đơs do pa tus bal dùl dơ\ bơto bơsram jat broă lơh niam ngan tàm hìu bơsram Cao đẳng Y tế Daklak. Jat mờ hơ\, cau bơsram dờng kơlôi sơnơng is jơnau git wă lài mờ tu\ tus ơdu\, pơrjum mpồl nàng cribơyai bal mờ yal tơngume geh sồr lơh. Cau pơgru là cau pơlam mờ hơ ală jơnau lùp bơh cau bơsram dờng dê. Broă bơto bơsram do dong pơlam tàp cau bơsram in bơta git rơcang lài, bơceh pa tàm broă lơh geh jơnau git wă să tờm in. Cau bơsram dờng Hoàng Phi Yến Nhi, ơdu\ Điều dưỡng K1B yal:

“Oh pa jơh bơsram môn sinh – hoá. Oh kờ` ngan môn bơsram do, tài ngui broă lơh bơto bơsram niam ngan, ai cau bơsram dờng lơh tờm den tàng dong cau bơsram in git brồ guh jơh bơta pràn să tờm he dê.”

Ai tàm môn bơsram tàp cấp cứu ờ gam tă nhơm tai, hìu bơsram neh rơcang ai tai broă lơh điện tử ai cau bơsram dờng in lơh. Jat mờ hơ\, broă lơh cau kòp geh crap tàm mai\ tính, tu\ cau bơsram dờng lơh bơta khồm nhơm, cồng nha lơh broă geh ai điểm mờ mai\ mờ pờ tơlik tàm mai\ vi tính tơn. Broă lơh do dong cau pơgru sền sơwì di khà tàp lơh broă cau bơsram dờng dê, bal mờ hơ\ cau bơsram dờng kung bơsong is, lơh niam rlau tai bơta chài cấp cứu he dê.

Hìu bơsram cao đẳng Y tế Daklak geh crơng gơs bơh nhai 10 nam 2016, bơh bơta lơh niam wơl hìu bơsram Trung cấp Y tế Daklak. Bơh 40 nam crơng gơs mờ bơtàu tơnguh, hìu bơsram Trung cấp Y tế Daklak neh lơh ngan lơh jơh ală broă sồr lơh bơh Bộ Giáo dục mờ Đào tạo, Bộ Y tế dê nàng geh tơnguh gơs hìu bơsram cao đẳng, mờ jơnau kờ` tơnguh jơnhua cồng nha bơto mờ bơsram, drơng jơnau kờ` bè cau lơh broă ai gah lơh sơnơm mờ mpồl bơtiàn in. Ồng Dương Chí Úy, Kuang atbồ hìu bơsram Cao đẳng Y tế Daklak pà git:

“Geh uă broă sền pal lơh, mơya geh 3 broă pal lơh jat. Dùl là phan bơna, bă ù lơh hìu bơsram jat jơnau sồr là 5 lồ. Tu\ do, anih sồ 1 hìu bơsram dê là 1 lồ 7 sàu; anih sồ 2 neh geh UBND càr ki\ kơrnuat là 6 lồ. Broă pal lơh dơ\ 2 là bè cau pơgru, pal gàr tơl bè pràn jak cau pơgru jat jơnau sồr lài do là Bộ Giáo dục mờ Đào tạo mờ tu\ do là Bộ Lao động. Dơ\ 3 là bè phan bơna, mai\ mok ngui tàm broă bơto bơsram, pal geh tơl ală phan bơna mai\ mok jat jơnau sồr nàng pờ gah bơto bơtê cao đẳng.”

Tu\ do hìu bơsram Cao đẳng Y tế Daklak gam bơto 700 nă cau bơsram dờng hệ cao đẳng in, bơsram tàm 3 gah là: Điều dưỡng, đơng deh mờ dược. Tàm broă bơ to bơtê, hìu bơsram sùm sền gròi lơh jat jơnau đơs “Bơsram pal gơ jat bal mờ lơh ngan ngồn”, den tàng, ală cau bơsram dờng geh  rơcang lài jơh bal jơnau git wă tàm sră pơ àr mờ bơta chài lơh ngan ngồn. Tơngai cau bơsram dờng geh lơh ngan ngồn geh tus rlau 60% kờp jơh tu\ tơngai bơto bơtê. Bơdĩh mờ ală tu\ jiơ bơsram tàm hìu bơsram, den hìu bơsram sùm ai cau bơsram dờng in geh lòt bơsram ngan ngồn tàm ală hìu sơ nơm nàng gơtùi lơh quèng mờ broă lơh, kờ` lơh broă niam rlau tai tơ nơ\ mờ tu\ jơh bơsram. Cau bơsram dờng Giàng Mí Quảng, ơdu\ Y sĩ K18A đơs:

“Oh go\ broă bơsram tàp lơh ngan ngồn geh kuơ ngan, tài tơnơ\ mờ tu\ bơsram tàm sră tàm ơdu\ mờ geh tàp lơh ngan tơn den hơ\ kung bè dùl dơ\ tai nàng oh gơtùi kah ală jơnau bơsram niam rlau. Tu\ lòt tàp lơh ngan ngồn, dong oh in geh tìp tơn mờ cau kòp, ngui ală jơnau git wă bơsram tàm ơdu\ tàm bơta ngan ngồn, bơh hơ\ dong oh kờ` broă lơh he dê rlau.”

Lơh jat jơnau kờ` bơh hìu bơsram hệ cao đẳng dê, Mpồl đơng lam hìu bơsram neh đal git, bơta niam mpồl cau lơh broă là bơta kuơ màng ngan rlau jơh. Hìu bơsram Cao đẳng Y tế Daklak tu\ do geh 111 nă cau pơgru, tàm hơ\ geh 45% cau pơgru geh bằng thạc sĩ rlau hơđang. Nàng lơh jơh kơ nòl broă tàm tu\ tơngai pa, mpồl cau pơgru sùm git wă tơnguh bơta chài lơh broă să tờm dê. Thạc sĩ Huỳnh Quốc Xi, lơh broă tàm Phòng Bơto bơtê, hìu bơsram Cao đẳng Y tế Daklak đơs:

“Nàng lơh jat kơnòl pa bơh hìu bơsram dê, cau pơgru lài ngan pal lơh jat jơnau sồr tàm broă lơh ờs mờng. Lài ngan là tơnguh pràn jak lơh broă jat jơnau sồrtơnơ\ Đại học. Dơ\ 2 là pal ngui chài công nghệ thông tin. Dơ\ 3 là cau pơgru pal chài đơs dà lơgar ndai, êt ngan kung pal geh sră cơng tàng B1 jat tơngume dà đơs lơgar ndai 6 kơnă châu Âu bơh dà lơgar dê.”

Mờ jơnau kờ` bơto bơtê gơs mpồl kuang bàng lơh sơnơm geh bơta niam, drơng niam ai broă lơh sền gàr pràn kơldang să jan làng bol in tàm tơ nơ\ do, hìu bơsram Cao đẳng Y tế Daklak gam lơh ngan lơh jat ală jơnau sồr bơh hìu bơsram geh bơta niam uă, broă lơh kuơ màng tơl khà dà lơgar tơngai bơh nam 2017 tus n am 2020, wèt tus hìu bơsram git bơta chài ală lơgar tàm tiah ASEAN mờ ală lơgar bơtàu tơnguh di mpồl G20.

Mơya kờ` lơh jơh ală jơnau sồr do, hìu bơsram pal tơnguh rlau tai cồng nha bơto bơtê bè tơnguh khà cau pơgru geh mờng chài tơnơ\ Đại học bơh 50 tus 70%, cau pogru geh bồ tơ ngoh jak bal  dunia; tam gơl pa, ngui broă lơh bơto mờ bơsram pa, geh bơta ngui ngan ngồn uă, lơh jat jơnau kờ` ngan ngồn mờ mpồl bơtiàn kờ`.

                                                         Cau cih mờ yal tơnggit K’Duẩn