VOV4.K’ho- Tơngai lài, kơnờm bơta rơcăng lài, jơh nùs bơh ală kấp, ală gah mờ gơnoar ătbồ ală tiah dê, khà kơnòm bơsram, cau bơsram dờng blơi Bảo hiểm Y tế gam gơguh rơhời. Nam bơsram 2020- 2021, khà kơnòm bơsram, cau bơsram dờng blơi Bảo hiểm Y tế là rlau 18 tơlak nă (gơguh 1,6% pơndrờm mờ nam bơsram 2019- 2020) mờ 3 tơlak 500 rbô nă kơnòm bơsram, cau bơsram dờng blơi jăt mpồl ndai. Tàm nam bơsram 2021- 2022 do, gah Bảo hiểm Xã hội lơh ngan lơh geh 100% khà kơnòm bơsram, cau bơsram dờng blơi Bảo hiểm Y tế, dong rơnàng tơnơ̆ do geh dờp mờ ngui ală bơta kuơ bơh ală broă lơh sền gàr ờdo ờdă rài kis mpồl bơtiàn dê.

Ală nam rềp ndo, kơnờm bơh bơta rơcăng lài, jơh nùs bơh ală kấp, ală gah mờ gơnoar ătbồ ală tiah dê, khà kơnòm bơsram, cau bơsram dờng blơi Bảo hiểm Y tế gơguh rơhời bơh ală nam. Nam bơsram 2020- 2021, bulah gơtìp gơrềng bơh kòp Covid-19 dê mơya broă lam lơh broă lơh dong kờl Bảo hiểm Y tế kơnòm bơsram, cau bơsram dờng in kung gam pơn jăt tai lơh geh ală cồng nha niam ngan bal mờ rlau 18 tơlak nă kơnòm bơsram, cau bơsram dờng tàm gùt lơgar blơi. Oh Nguyễn Thị Kim Hường là kơnòm bơsram ơdŭ 12B1, Hìu bơsram Kấp pe Dương Đông, ƀòn dờng Phú Quốc, càr Kiên Giang pà gĭt, sră Bảo hiểm Y tế cèng wơl uă bơta kuơ ai kơnòm bơsram in tàm ală tŭ bơsram sră. Oh Nguyễn Thị Kim Hường, pà gĭt: Tŭ geh sră Bảo hiểm Y tế den bol oh gơlơh iang nùs ngan, ngan là gơwèt mờ ală hìu bơnhă ờ geh tơl bơta tàm rài kis den sơlơ gŏ gơlơh iang nùs rlau tai. Broă dong kờl bơh dà lơgar dê pà sră Bảo hiểm Y tế, tŭ bol he gơtìp kòp, tŭ geh sră Bảo hiểm Y tế den bol he ờ duh pal kơlôi rơcăng priă jền tă kham sơm kòp tŭ pal lòt kham sơm kòp tàm hìu sơnơm.

Tềng đăp bơta kòp Covid-19 gơbàn kal ke, nàng lơh geh jơnau kờñ 100% kơnòm bơsram, cau bơsram dờng blơi Bảo hiểm Y tế tàm nam bơsram 2021- 2022, Bảo hiểm Xã hội Việt Nam neh sồr Bảo hiểm Xã hội 63 càr mờ ƀòn dờng sơlơ mblàng yal bè broă dong kờl Bảo hiểm Y tế bơh ală broă lơh ngac ngar, dipal; ai lài priă jền dong kờl bơtơl tai khà tă blơi Bảo hiểm Y tế ai kơnòm bơsram, cau bơsram dờng in, ngan là gơwèt mờ ală cau geh rài kis kal ke, làng bol jơi bơtiàn kòn cau dùl êt nă cau...Bơdìh hơ̆ tai, pơn jăt tai pơgồp bal mờ gah Bơto bơtê pơlam lơh jăt broă lơh Bảo hiểm Y tế kơnòm bơsram, cau bơsram dờng in, jàu broă ai tơl anih bơto bơtê in. Cồng nha lam lơh jăt broă lơh dong kờl là broă jàu sền swì tàm pơrlòng, jờng rơ bơh ală hìu bơsram dê. Ồng Nguyễn Hoàng Hà- Kuang ătbồ phòng Broă lơh chính trị mờ ătbồ cau bơsram dờng, Hìu bơsram Đại học Kinh tê Quốc dân pà gĭt, broă lơh mblàng yal bè Bảo hiểm Y tế kơnòm bơsram, cau bơsram dờng in geh hìu bơsram bơyai lơh ngac ngar, bơh uă broă lơh, lơh ngan jơh ală cau bơsram dờng bơh hìu bơsram dê ndrờm blơi lơm Bảo hiểm Y tế. Ồng Nguyễn Hoàng Hà, yal: Tàm poh lơh broă bồ nam bơsram pa, geh bal tàm gùl khoă mờ lồi nam, bol añ ndrờm geh dùl tơngume mblàng yal pràn kơldang ngan, bè bơta pal jăt kơnòm bơsram, cau bơsram dờng, bal mờ hơ̆ là mblàng yal bè Bảo hiểm Y tế. Khà 100% kơnòm bơsram, cau bơsram dờng blơi Bảo hiểm Y tế là khà niam ngan mơya nàng lơh geh den kung kal ke. Den tàng bè hơ̆, gơwèt mờ ală cau bơsram dờng geh rài kis kal ke, ờ blơi geh Bảo hiểm Y tế den bol añ geh jòi broă dong kờl nàng tă bơsong ai ală oh in.

Bảo hiểm Y tế kơnòm bơsram, cau bơsram dờng

Jăt mò Đinh Mai Hạnh- Phó Kuang ătbồ Ban Dờp priă, gơwèt Bảo hiểm Xã hội Việt Nam yal, Bảo hiểm Y tế kơnòm bơsram, cau bơsram dờng in gam geh kes priă Dà lơgar dong kờl 30%. Ală cau là kơnòm bơsram, cau bơsram dờng geh dờp bơta dong kờl cau geh màng mờ dà lơgar, sền gàr dong kờl mpồl bơtiàn, làng bol jơi bơtiàn kòn cau dùl êt nă cau...geh pà sră Bảo hiểm Y tế ờ sa priă. Bơdìh hơ̆ tai, bàr pe tiah gam geh tai broă dong kờl krơi is dong kờl tai ai kơnòm bơsram, cau bơsram dờng in tŭ blơi Bảo hiểm Y tế. Khà priă tă kham sơm kòp Bảo hiểm Y tế ai kơnòm bơsram, cau bơsram dờng in bơh Kes priă Bảo hiểm Y tế dê tă tơm tàm ală nam rềp ndo gơguh tus gĭt nđờ rbô tơmàn đong pah nam. Ờ dùl êt nă kơnòm bơsram, cau bơsram dờng geh tă tơm priă tă kham sơm kòp bal mờ khà priă uă, gơguh tus gĭt nđờ rhiang tơlak đong.    

Kuơmàng, bơh bồ nam 2021 tus tŭ do, cau blơi Bảo hiểm Y tế, tàm hơ̆ geh rlau 18 tơlak nă kơnòm bơsram, cau bơsram dờng geh dờp uă bơta dong kờl pa niam rlau. Pơnrơ là broă dong kờl lòt kham hờ ală hìu sơnơm ndai tàm broă sơm kòp piam kòp tàm hìu sơnơm gơwèt mờ kham sơm kòp Bảo hiểm Y tế geh lam lơh tàm jơh gùt lơgar bơh ngai 01/01/2021, dong bàr pe nă cau blơi Bảo hiểm Y tế sơm kòp ờ di hìu sơnơm geh ai kung gam geh dờp sơl 100% priă tă sơm kòp tŭ piam kòp tàm hìu sơnơm ndrờm bè di hìu sơnơm ai kham sơm kòp sơl. Mò Đinh Mai Hạnh, pà gĭt: Tàm tơngai kòp Covid-19 gơbàn kal ke, bơh nhai 8, bol añ neh geh sră nàng sồr Bảo hiểm Xã hội ală càr, ƀòn dờng. Bảo hiểm Xã hội ală càr kung gam jơh nùs lam lơh jăt bàr pe broă lơh nàng nam do, mpồl cau kơnòm bơsram, cau bơsram dờng pal blơi wil tơl. Nàng lơh ngan jơh tơl nă cau ndrờm geh lơm sră Bảo hiểm Y tế đơs bal, den bol he pal bơtàu tơnguh ală mpồl cau bè Bảo hiểm Y tế kơnòm bơsram, cau bơsram dờng mờ ală mpồl cau geh kes priă dà lơgar dê dong kờl.        

Bơta kuơ bơh broă blơi Bảo hiểm Y tế neh geh kờp sền, mơya tŭ do jơh gùt lơgar kung gam sơl 3% kơnòm bơsram, cau bơsram dờng, ndrờm mờ mờr 600 rbô nă cau ờ hềt geh blơi. Bơta do, lơh dùl bơnah cau kơnòm să mờ hìu bơnhă khi dê gơtìp hoàc hươr. Nam bơsram pa 2021- 2022 neh mờr tus rềp, nàng kờñ lơh jăt geh cồng nha jơnau kờñ jơh ală kơnòm bơsram, cau bơsram dờng blơi Bảo hiểm Y tế, ai tơl bơta dong ală oh geh bơtàu tơnguh làm jơh ală bơta jơh bal bè bồ tơngoh jak mờ să jan, kờñ ngan pal geh bơta lơh bal pràn kơldang bơh jơh ală anih lơh broă chính trị bơh Dà lơgar tus ală ƀòn lơgar dê. Kuơmàng là gơnoar broă, kơnòl bơh ală hìu bơsram dê, cau pơgru dê tàm broă hòi jà kơnòm bơsram, cau bơsram dờng kung bè mè bèp ală oh dê blơi Bảo hiểm Y tế kơnòm bơsram, cau bơsram dờng in, pơgồp bơnah tơnguh uă bơta niam sền gàr pràn kơldang să jan ai rơnàng cau tơnơ̆ do in.

            Jăt VOV1- Cau mblàng Lơ Mu K’Yến