VOV4.K’ho- Ală nam do, kấp ủy Đảng, Gơnoar ătbồ, Mặt trận dà lơgar mờ ală mpồl chính trị- mpồl bơtiàn tàm ală tiah sùm sền gròi lơh jăt uă broă lơh dong kờl gơwèt mờ tiah làng bol jơi bơtiàn kòn cau dùl êt nă cau, ngan là broă dong kờl bè bơcri priă lơh phan bơna, geh bal bè lơh sa- mpồl bơtiàn mờ niam chài.

Broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021- 2030 neh geh Quốc hội sền swì ring bal geh bơta kuơ dờng màng ngan gơwèt mờ bơtàu tơnguh lơh sa- mpồl bơtiàn bơh dà lơgar dê. Jăt mờ hơ̆, tơngume bơh broă lơh dê geh 10 rơndăp broă lơh bơnah, tàm hơ̆, rơndăp broă lơh 06 đơs sùm tus “Prăp gàr, ngui niam bơta kuơ niam chài ờs mờng bơh yau niam bơnĕ bơh ală jơi bơtiàn kòn cau dùl êt nă cau dê gơ jăt bal mờ bơtàu tơnguh nhơl chờ”. Jơnau yal bè jơnau kờñ bơh Broă lơh dê, Ủy ban Jơi bơtiàn kòn cau kung neh sồr lơh ală broă lơh nàng kờñ sền gàr, ngui niam bơhiàn niam chài krơi is niam bơnĕ bơh ală jơi bơtiàn kòn cau dùl êt nă cau dê gơ lòt jăt bal sang tĕ jơh ală adat bơhiàn bơngơl gơla ờ niam. Mùl màl, tàm hơ̆ geh broă pờ ală ơdŭ bơto pơlam broă lơh ờs mờng, broă lơh mờng chài, bơto yal wơl bơta niam chài ờ di mờ phan bơna; dong kờl ală rơndăp broă lơh jòi tơrgùm, lơh wơl, prăp gàr mờ ngui niam bơta niam chài ờ di mờ phan bơna ală jơi bơtiàn kòn cau dùl êt nă cau geh pơhìn gơtìp hŭi roh jơh; lơh ală mpồl lơh broă niam chài bơh rài yau tàm ală thôn, ƀòn tiah làng bol jơi bơtiàn kòn cau dùl êt nă cau; dong kờl bơcri priă lơh ală anih niam chài gơ jăt bal mờ nhơl chờ pơnrơ ngan làng bol jơi bơtiàn kòn cau dùl êt nă cau...Tus tŭ do, uă tiah neh ngui ngac ngar ală broă lơh mblàng yal, dong kờl làng bol jơi bơtiàn kòn cau dùl êt nă cau rơhời sang tĕ adat bơhiàn bơh yau bơngơl gơla ờ gam kuơ tai tàm broă ies tơ̆p ƀồc cau chơ̆t, ñô bau, lơh then, duh khuai bơjơu, lòt triang mờ gru...gơcèng bơta pin dờn bu ba, lơh hoàc hươr bè priă jền, phan bơna, tŭ tơngai. Mò Pờ Diệu Linh- Phó Chủ tịch Ủy ban Nhân dân kơnhoàl Mường Nhé, càr Điện Biên pà gĭt: Kơnhoàl kung geh sơl uă gùng dà broă lơh sền gròi dong kờl tus làng bol jơi bơtiàn kòn cau, dong kờl bè bơtàu tơnguh lơh sa, dong kờl bè sơntìl chi tam phan ròng, kuơmàng là gơwèt mờ sền gàr rài kis niam chài krơi is jơi bơtiàn kòn cau dê, broă jòi tơrgùm wơl jơnau pơnđik, lơh wơl jơnau tam ya kung bè là ală dơ̆ lơh chờ pơrjum lơh yàng jăt bơta pin dờn ờs mờng bơh yau, phan soh bơka să, ală bơhiàn hìu đam, kung geh sền gròi uă ngan sơl, jơh ală gùng dà broă lơh dong kờl hơ̆, làng bol sền bal gĭt wă loh làng ngan, pơñiờ să mờ pin dờn mờ geh bơta gĭt wă sền gàr, prăp gàr bơhiàn niam chài ờs mờng bơh yau jơi bơtiàn he dê.

 Tơngai tus, nàng rơhời lơh sir gơs phan bơna niam chài tiah làng bol jơi bơtiàn kòn cau dùl êt nă cau mờ tiah kơh bơnơm, gơ jăt bal mờ broă lơh bơtàu tơnguh lơh sa- mpồl bơtiàn, den pal lơh niam wơl jơh bal bè rài kis phan bơna mờ nùs nhơm bơh làng bol dê; sền gròi prăp gàr mờ ngui niam rài kis niam chài is bơh mpồl bơtiàn ală jơi bơtiàn kòn cau dùl êt nă cau dê, tơrgùm bơ̆t bơtàu rài kis niam chài pa, ngui niam bơta jak chài ngan tàm bơta niam chài ờs mờng bơh yau, sang tĕ jơh ală adat bơhiàn bơngơl gơla ờ gam kuơ tai, bơ̆t bơtàu rài kis niam chài pa, lơh wơl dơ̆ lơh chờ niam chài jăt bơhiàn ờs mờng bơh yau jăt jơnau kơ̆p kờñ bơh làng bol dê.

Gơwèt mờ broă lơh prăp gàr mờ ngui niam bơta kuơ niam chài ờs mờng bơh yau bơh làng bol ală jơi bơtiàn kòn cau dùl êt nă cau dê, ală anih lơh broă geh gơnoar kờñ pal sền gròi kơlôi sơnơng, lơh sir gơs jơnau cih bơh kơrnoăt boh lam dê; sơlơ kơlôi sơnơng tơl ală bơta, tơl làm, đal gĭt wil tơl bè bơta geh ngan phan lời wơl niam chài bơh làng bol jơi bơtiàn kòn cau dùl êt nă cau dê mờ tiah kơh bơnơm dê. Phó Giáo sư- Tiến sĩ ồng Trần Văn Bình- Kuang ătbồ Bộ môn ătbồ bơta niam chài ală jơi bơtiàn kòn cau dùl êt nă cau tàm Việt Nam gơwèt Hìu bơsram Đại học Văn hoá pà gĭt: Prăp gàr bơta niam chài ờs mờng bơh yau ờ gŏ di là bol he prăp gàr ală bơta gam wơl bè ờs bơh rài yau ờ, mờ prăp gàr ală bơta kuơ, să tờm ală anih lơh broă kơlôi sơnơng mờ ală cau ătbồ tàm ƀòn lơgar pal gĭt geh bơta lơi là bơta kuơ, bơh hơ̆ tơnguh uă bơta kuơ niam chài jơi bơtiàn kòn cau dùl êt nă cau dê, lơh gơs bơta gĭt wă jơi bơtiàn kòn cau dùl êt nă cau, bơta pơñiờ să bơh làng bol dê mờ khi geh bơta pràn dơlam is lơh jăt bơta hơ̆.

Gơtùi đơs, lơh jăt broă lơh dong kờl jơi bơtiàn kòn cau, sền gàr, prăp gàr bơta kuơ niam chài ờs mờng bơh yau ngan là pơgồp bơnah tàm cồng nha bơtàu tơnguh lơh sa mpồl bơtiàn bơh tiah hơ̆ dê đơs is mờ bơh gùt lơgar dê đơs bal. Gơ lòt jăt bal mờ hơ̆ là bơsong ală jơnau gam gơkòl bè phan bơna, bè bơta ờ tơl hìu ơm, ù ơm, ù lơh sa, dà ngui sa; rơndăp tăp sèng, ai ơm kis kơ̆ kơl jăp làng bol ƀòn lơgar ơm kis tàm ƀòn lơgar kal ke uă ir, ngan là tiah pơhìn uă bè trồ tiah lơh aniai; bơtàu tơnguh lơh sa sươn sre, brê bơnơm, gàr geh broă lơh broă sa kơ̆ kơl jăp jŏ jòng sùm mờ tơnguh uă cồng nha mpồl cau lơh broă; sền gàr pràn kơldang să jan làng bol in...

Cau cih Thu Hoà- Cau mblàng Lơ Mu K’Yến