VOV4.K’ho- Tàm xã Trung Lý, kơnhoàl Mường Lát, càr Thanh Hoá pa geh lơh dơ̆ jàu pà hìu lam lài mờ dong kờl lơh hìu pà hìu rƀah mờ kal ke bè hìu ơm in. Do là broă lơh bơh Bộ Kuang àng dê lam lơh pơgồp bal mờ càr Thanh Hoá mờ Ngân hàng Kă bro Cổ phần Kă bro mờ lơgar ndai Việt Nam dê (Vietcombank) dong kờl “Lơh 600 nơm hìu ai hìu bơnhă làng bol rƀah tàm ù tiah kơnhoàl Mường Lát in”. Jăt broă rơndăp lơh, broă lơh geh dong kờl 30 tơmàn đong ai kơnhoàl Mường Lát in nàng lơh 600 nơm hìu ai ală hìu bơnhă rƀah in.

Ồng Tô Lâm, Bộ trưởng Bộ Kuang àng jàu hìu bơta nđàc tàm Thanh Hoá

Tơl nơm hìu kờp priă 50 tơlak đong lơh tơl jơnau sồr 3 kră: Bơnàng kră, rơkàng hìu kră, kơlik hìu kră” jăt hìu rơndăp lơh bơh Bộ Kuang àng dê. Mường Lát là kơnhoàl rƀah ngan rlau jơh bơh càr Thanh Hoá dê mơkung là dùl tàm 56 kơnhoàl rƀah ngan rlau jơh gùt lơgar dê. Bơh bơta geh ngan do, Bộ Kuang àng neh sồr ală anih lơh broă geh gơnoar gơwèt bal kơlôi sơnơng dan hìu lam lài, gùng dà, broă lơh hìu ơm nàng Kuang àng càr Thanh Hoá đơng lam tàm sơm băt tê bal bal mờ làng bol kơnhoàl Mường Lát lơh pa, lơh niam wơl hìu ơm, pơgồp bơnah kơ̆ kơl jăp rài kis làng bol rƀah in. Tŭ do, neh lơh sir 9 nơm hìu lam lơh lài mờ lơh ngan tus lồi nhai 5 nam do, geh lơh sir 600 nơm hìu bơta nđàc jàu ai ală hìu bơnhă làng bol rƀah bơh kơnhoàl Mường Lát dê in.

Cau mblàng Lơ Mu K’Yến