VOV4.K’ho- Ngai 07/4, ồng Lê Văn Thanh, Thứ trưởng Bộ Lao động- Thương binh mờ Xã hội neh geh dơ̆ lơh broă mờ Ủy ban Nhân dân càr Dak Nông bè lam lơh ală broă dong kờl, broă lơh tơrmù rƀah, cau lơh broă, broă lơh tơngai bơh nam 2016 tus nam 2020. Tàm tơngai bơh nam 2016 tus nam 2020, broă lơh tơrmù rƀah bơh càr Dak Nông dê neh geh uă tam gơl niam. Dak Nông neh tă rlau 683 tơmàn đông ai broă lơh jơnau kờñ dà lơgar tơrmù rƀah kơ̆ kơljap, tàm hơ̆ kes priă dà lơgar tă mờr 485 tơmàn đông. Mờr 7 rbô 700 dơ̆ hìu bơnhă rƀah làng bol jơi bơtiàn kòn cau dùl êt nă cau geh càn priă Ngân hàng Chính sách mờ khà priă rlau 206 tơmàn đông.

Tàm dơ̆ lơh broă, ồng Lê Văn Thanh, Thứ trưởng Bộ Lao động- Thương binh mờ Xã hội đơs là, Dak Nông pal tơnguh broă mblàng yal, tơnguh jơnau git wă mờ pơn jờng làng bol bơtàu tơnguh lơh sa nàng lik klàs rƀah, ngan là tàm tiah làng bol jơi bơtiàn kòn cau dùl êt nă cau. Càr pal sền gròi bơto bơtê broă lơh, tơnguh bơta chài lơh broă bơh cau lơh broă dê, lơh jat jơnau kờñ bè khà, bơta niam bơh ală cau bơcri priă dê, tơrmù ƀà cau lơh broă bè ờs.

Cau mblàng K’Duẩn