VOV4.K’ho- Mho ngai 24/10, Bộ Y tế bơyai lơh pơrjum pờ tơn tàm internet mờ kuang đơng lam bồ Ủy ban Nhân dân 63 càr mờ ƀòn dờng nàng kờñ sền wơl 10 ngai lam lơh jăt Kơrnoăt 128 bè gơdờp ờdo ờdă, ngăc ngar mờ kơryan geh cồng nha kòp Covid-19.

Bơh sền swì bơh sơnrờp pà gŏ, bàr pe càr, ƀòn dờng gam kwi kwơ, kră kơldăng tàm tŭ lơh jăt Kơrnoăt do mờ ală tiah kờñ pal tơnguh tai ală broă lơh rơcăng sơndră kòp, ờ lời gơlik geh dơ̆ bơtờp kòp pa. Mờ 3 broă jàu geh cih tàm Kơrnoăt 128, bè tam pà tiah geh kòp tus kấp thôn, xã; cĭt tơl vaccine mờ bơta tơl pràn dờp sơm kòp, uă càr, ƀòn dờng geh khà cĭt vaccine gam ờ hềt uă, mìng lơh geh pơgăp 40% lơm dan geh lơh jăt ală broă lơh rơcăng sơndră kòp uă. Bơh ală jơnau đơs, jơnau dan bơh ală tiah dê, Bộ trưởng Bộ Y tế ồng Nguyễn Thanh Long sồr pal lam lơh ală broă lơh rơcăng sơndră kòp, ờ lời gơlik geh dơ̆ bơtờp kòp pa tàm tơngai tus.

Cau mblàng Lơ Mu K’Yến