VOV4.K’ho - Tềng đăp mờ bơta kal ke bơh kòp Covid-19, nàng lơh jăt niam broă drơng gàr ai ală cau gơtìp kal ke tàm ƀòn dờng do in. UBND ƀòn dờng Hồ Chí Minh sồr ală mpồl lơh jăt rơndăp broă rài kis lơh broă sa, dong kờl broă lơh sơnơm.

Jăt mờ hơ̆, sồr Anih tờm dờp mờ dong kờl phan geh kuơ bơh ƀòn dờng rơcang lài 1 tơlăk khà phan dong kờl lơh sơnơm (dong kờl phan bơna geh kuơ). UBND ală quận, kơnhoàl mờ ƀòn dờng Thủ Đức lơh jăt broă sền wơl, drơng gàr công nhân, cau bơsram dờng, cau lơh broă gam kis tàm ală hìu ơm ing, tiah ơm kis công nhân, tiah cau lơh broă rơƀah, lơh jăt broă dong kờl khà phan rài kis lơh broă sa nàng làng bol tàm ală tiah do iang nùs ơm tàm tiah ơm kis tàm tơngai ƀòn dờng lơh jăt broă tam cah ngài mpồl bơtiàn. Tơngai lơh jăt broă do tàm nhai 8 mờ nhai 9 nam 2021. Ƀòn dờng kung sồr ală tiah bơyai lơh nàng ală cau in gờñ geh cit sơnơm vaccine.

Cau mblàng Ndong Brawl