VOV4.K’ho- Broă lơh Jơnau kờñ dà lơgar bơtàu tơnguh lơh sa- mpồl bơtiàn tiah jơi bơtiàn kòn cau dùl êt nă cau mờ tiah kơh bơnơm tơngai bơh nam 2021- 2030 gam tàm ală tŭ lơh sir gơs jun yal mờ Thủ tướng Chính phủ in lơh nền gùng dà bơcri priă. Tŭ do, Ủy ban Jơi bơtiàn kòn cau bơh Chính phủ dê gam rơcăng ală sră nggal geh gơrềng, tàm hơ̆ geh geh ală broă jàu, ai khà, bơta pal jăt tam pà priă, ală Sră bơto pơlam lam lơh jăt broă lơh. Bè hơ̆, tŭ lam lơh jăt broă lơh do tàm ală tiah den broă gĭt nền ƀòn lơgar lơh jăt broă lơh do bè lơi? Jơnau Lơh broă tài gơnoar kòn bơnus ngai do geh đơs bè tơngume do.

Broă lơh jơnau kờñ dà lơgar bơtàu tơnguh lơh sa- mpồl bơtiàn tiah jơi bơtiàn kòn cau dùl êt nă cau mờ tiah kơh bơnơm tơngai bơh nam 2021- 2030 geh lơh tàm ală ƀòn lơgar tiah jơi bơtiàn kòn cau dùl êt nă cau mờ tiah kơh bơnơm là ală xã, thôn geh khà hìu bơnhă jơi bơtiàn kòn cau dùl êt nă cau bơh 15% rlau hơđang. Ƀòn lơgar lơh jăt là ală ƀòn lơgar kal ke uă ir (tàm hơ̆ geh ală xã tiah III, thôn kal ke uă ir jăt cồng nha kờp sền, tam pà mờ gĭt nền tiah làng bol jơi bơtiàn dùl êt nă cau mờ tiah kơh bơnơm jăt bồ tơngoh bơtàu tơnguh tàm ƀòn lơgar tơl càr dê bơh Ủy ban Jơi bơtiàn kòn cau dê ai ngui, tơngai bơh nam 2021- 2025). Broă lơh kung lam lơh tàm ală tiah lơh sa- mpồl bơtiàn lơyài bơtàu tơnguh; bơta jak mpồl cau lơh broă ờ uă; phan bơna ờ pràn jak, ngan là bè gùng lòt; bơta kham sơm kòp, bơsram sră bơh làng bol dê gam uă kal ke...

Ală xã, thôn pa yal geh Dà lơgar ai lài bơcri priă lơh phan bơna, lơh gơlik geh broă lơh broă sa, bơtàu tơnguh mpồl cau lơh broă mờ ală broă dong kờl sền gàr lơngăp lơngai rài kis mpồl bơtiàn ai kòn bơnus in dờp geh ală drơng broă tờm pal geh, rơhời tơrmù bơta ờ ring bal pơndrờm mờ ală tiah bơtàu tơnguh. Ồng Quàng Văn Hương- Phó Chủ tịch Mpồl duh broă Jơi bơtiàn kòn cau Quốc hội dê, đơs là: Tiah hơ̆ là tiah neh rƀah rao gơ dê, tŭ do pal sơlơ bơto bơtê broă lơh uă rlau tai, nàng làng bol in geh bồ tơngoh jak, den lơh sa hơ̆ sồng bơtàu tơnguh geh. Tơnguh uă bơta jak mpồl cau lơh broă tàm broă lơh kung geh sơl, mơya do là kờñ Đảng, Dà lơgar sền gròi rlau tai, hơ̆ là bol he pal geh uă broă lơh kung bè broă lơh bơsong, tài bơh mìng geh dùl dơ̆ mìu, dà tih, halà kòp bơtờp, làng bol là gơlik gơs mpàng tê soh tơn, bè hơ̆ pal geh uă bơta nàng làng bol gơtùi rơcăng lài geh, dùl là tàm broă lơh broă sa, bàr là pal kơ̆ kơl jăp, bơh lơh sơnơm phan ròng tus rơcăng sơndră kòp bơtờp, trồ tiah lơh aniai.

Bơdìh hơ̆ tai, ƀòn lơgar lơh jăt gam là ală xã kal ke (xã tiah II): Là ală xã geh gal làng bol jơi bơtiàn kòn cau dùl êt nă cau ơm kis gơ gơs ƀòn, gam ờ tơl dùl halà bàr pe bơta pal geh bè phan bơna mờ geh dờp ală drơng broă mpồl bơtiàn tờm pal geh. Gơwèt mờ ală xã tiah II, dà lơgar geh dong kờl lơh geh broă lơh broă sa, bơcri priă bơtơl dùl bơnah phan bơna gam ờ tơl, mìng là lơh jăt ală broă dong kờl gơwèt mờ kòn bơnus lơm.

Ƀòn lơgar bơh sơnrờp bơtàu tơnguh (ală xã tiah I) kung gơ ơm tàm cau geh dờp lềng bơh broă lơh dê sơl, tàm hơ̆ geh ală xã neh lơh tơl khà ƀòn lơgar pa; ală xã geh khà hìu bơnhă rƀah hơđơm 10%. Mơya, gơwèt mờ ală xã tiah I, sền bal neh lơh jăt broă lơh dong kờl gơwèt mờ kòn bơnus là cau hìu rƀah, hìu mờr ndrờm bè hìu rƀah.

Jăt mò Ma Thị Thúy- Phó Kuang ătbồ Mpồl sùm lơh kơnòl broă Mpồl kuang bàng Quốc hội càr Tuyên Quang dê đơs, broă tam pà priă do pal jăt tàm jơnau kờñ ngan ngồn bơh tiah hơ̆ dê, ai lài ală xã kal ke uă ir, ƀòn lơgar kal ke uă ir nàng kờñ ai tơl ală bơta dong ală ƀòn lơgar kal ke gờñ geh ală bơta pal geh bè phan bơna mờ ală bơta ndai nàng brồ guh.

Ngai 08/7 pa do, ồng Trương Hoà Bình- Phó Thủ tướng Thường trực Chính phủ, Kuang ătbồ Mpồl đơng lam dà lơgar Broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021- 2030 neh kĭ ai ngui Broă lơh lơh broă nam 2021 bơh Mpồl đơng lam dê. Jăt mờ hơ̆, ală kuang bàng tàm Mpồl đơng lam dà lơgar mờ ală bộ, anih lơh broă ndrờm mờ bộ, anih lơh broă gơwèt Chính phủ (ală bộ, anih lơh broă kấp dà lơgar), Ủy ban Nhân dân ală càr mờ ƀòn dờng tàm gùt lơgar jăt gơnoar broă, kơnòl broă geh jàu, mhar lam lơh jăt ală kơnòl broă, loh làng: lơh sir gơs Jơnau yal kơlôi sơnơng gơtùi lơh jăt ngan ngồn Broă lơh; Lùp sền wơl, jun yal mờ Thủ tướng Chính phủ in kĭ Kơrnoat bơcri priă Broă lơh jăt di jơnau sồr bơh kơrnoat boh lam dê bè bơcri priă dà lơgar; pồ tơl kuang bàng lơh broă tàm Mpồl đơng lam mờ anih lơh broă dong broă Mpồl đơng lam in tàm ală kấp jăt jơnau ai bơh kơrnoat boh lam dê; bơyai lơh mblàng yal, bơto bơtê tus ală mpồl cau, cau dùl nă să is geh gơrềng mờ làng bol in bè Broă lơh mờ bàr pe tơngume bơh Rơndăp broă lơh bal jơh ală bơta dê; cribơyai mờ dan geh ală broă lơh hòi jà tă pơgồp, lơh uă ală bơnah priă lơh jăt Broă lơh, ngan là priă ODA mờ hòi jà tă pơgồp tai priă jền bơh mpồl bơtiàn dê lơh bal, tă pơgồp dipal mờ kơrnoat boh lam bơh mpồl bơtiàn dê nàng bơtơl ai Broă lơh in...

Tàm tŭ ơm kơ̆p Thủ tướng Chính phủ ngan ngồn kĭ Broă lơh, broă kờñ pal lơh tŭ do bơh ală Mpồl jơi bơtiàn kòn cau dê tàm ală càr gơ ơm tàm mpồl cau geh dờp lèng rơndăp broă lơh dê, kờñ pal gờñ dong broă ai Ủy ban Nhân dân càr in sồr Ủy ban Nhân dân ală kơnhoàl, ƀòn dờng tàm càr in pơn jăt tai lam lơh kờp sền cau, ƀòn lơgar geh dờp lèng, kờp dŭ jơh ală jơnau kờñ priă jền lơh jăt nàng jun yal mờ kấp geh gơnăp gơnoar in sền swì kĭ jăt jơnau ai bơh kơrnoat boh lam dê.

Cau cih Hoàng Thái- Cau mblàng Lơ Mu K’Yến