VOV4.K’ho- Tàm jơh gùt tŭ tơngai jŏ jòng jơnau kah yau dê, Đảng mờ Dà lơgar he sùm sền gròi, ai tơlik uă gùng dà, broă lơh nàng kờñ bơtàu tơnguh jơh ală bơta tàm rài kis mpồl bơtiàn bơh tiah làng bol jơi bơtiàn kòn cau dùl êt nă cau dê. Rơndăp broă lơh tơrgùm jơh ală bơta bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021- 2030 geh Quốc hội kĭ jăt Kơrnoat sồ 88, ngai 18/11/2019 là cơng tàng tơngŏ loh làng ngan ai broă lơh dipal ngan bơh Đảng, Dà lơgar he dê mờ là bơta gơn kơnờm dong làng bol jơi bơtiàn kòn cau dùl êt nă cau mờ tiah kơh bơnơm bơtàu tơnguh bè jơh ală bơta.

 Tàm ală nam do, bal mờ broă lơh jăt geh cồng nha ală gùng dà broă lơh bơh Đảng, kơrnoat boh lam bơh Dà lơgar dê, càr Yên Bái neh ai ngui mờ lam lơh uă gùng dà broă lơh jơi bơtiàn tàm tiah he dê; tàm hơ̆ tơrgùm bơcri priă bơtàu tơnguh lơh sa- mpồl bơtiàn; prăp gàr, sền gàr mờ ngui niam bơta kuơ niam chài bơh yau, sền gàr dà lơgar, sền gàr bơta lơngăp lơngai tiah làng bol jơi bơtiàn kòn cau dùl êt nă cau mờ neh lơh geh ală cồng nha kuơmàng. Khà hìu bơnhă rƀah jơh gùt càr gơmù bơh rlau 32% tàm nam 2016 gơmù tus gam 7,04% nam 2020. Ai tàm ală kơnmhoàl rƀah, bè Mù Cang Chải nam 2016 là mờr 67% den nam 2020 neh gơmù tus gam hơđơm 9%. Yên Bái neh ai lơh ală broă lơh dong kờl, tàm hơ̆ geh Broă dong kờl lơh sa sươn sre brê bơnơm mờ phan tàm dà jăt Kơrnoat 69 bơh Hội đồng Nhân dân càr dê.

Geh dong kờl 8 tơlak đong jăt Kơrnoat 69 bơh Hội đồng Nhân dân càr Yên Bái dê, bi Giàng A Dờ ơm tàm ƀòn Púng Luông, xã Púng Luông, kơnhoàl Mù Cang Chải, càr Yên Bái neh bơcri lơh wàng ròng mờ kòn sơntìl nàng ròng 30 nơm kòn be. Kơnờm tơryăng tơryồng lùp bơsram bơta mờng chài ròng phan bơh ală ơdŭ bơto pơlam mờ bơh iăt rơdio, sền sră ƀăo mờ mpồl be bơh bi dê kis dờng mhar ngan, dong hìu bơnhă tơnguh tai priă lơh geh mờ gơtùi lơh pas. Bơh cồng nha bơh sơnrờp, bi Dờ bơyai mờ pơ ùr bơtàu tơnguh mpồl be gơguh tus 100 nơm tàm tơngai tus. Bi Giàng A Dờ, đơs: Tơl nơm kòn be dùl nam gơtùi ai he in bơh 400 tus 500 rbô đong,neh kờp jơh priă tă ròng. Tŭ geh dong kờl gơwèt mờ làng bol tiah kơh bơnơm jơnhoa, tiah sar lơgar ngài do den kung là dùl tàm ală broă lơh nàng làng bol tơn jơh jơgloh tơrmù rƀah.

Hìu bơnhă bi Vũ Minh Thủy ơm tàm ƀòn Ngã Ba Kim, xã Púng Luông kung geh dong kờl 15 tơlak đong jăt Kơrnoat 69 bơh Hội đồng Nhân dân càr Yên Bái dê nàng bơtàu tơnguh ròng phan, bal mờ 3 nơm sur me mờ 20 nơm sur ròng sa puăc. Tơryồng tơryồng, kong bòl glar kal ke lơh sa mờ geh tai ală kấp gơnoar ătbồ sền gròi dong kờl bơyai lơh ală ơdŭ bơto pơlam bè bơta chài ròng phan den tàng nam lài hìu bơnhă neh tăc geh rlau 3 tấn sur ờ hềt lơh puăc mờ lơh geh priă rlau 200 tơlak đong. Bi Vũ Minh Thủy yal: Bơh priă jền do, ờ mìng dong bi klàs bơh rƀah mờ gam ròng ală kòn lòt bơsram đại học, rài kis gơmù ƀà bơta bòl glar kal ke. Bi Vũ Minh Thủy chờ hờp yal: Dilah ờ gơtìp kòp lơi mờ lơh sa geh sùm bè do den rài kis geh tơl ngui tơl sa ngan. Kơ̆p kờñ pơn jăt tai dong kờl hìu bơnhă priă jền nàng ròng gơ in geh uă rlau.  

 Kơnhoàl Mù Cang Chải neh lơh pràn mblàng yal, hòi jà ală hìu bơnhă làng bol khin cha cih mat dan lơh ală broă lơh ròng phan dipal mờ bơta geh, mờng chài tơl hìu bơnhă dê. Jăt tàm bơta hơ̆, ală tiah kờp sền, lơh sră cih mat cau tơl bơta nàng gơ in loh làng, làng bol lơh tờm mờ hòi jà, bơto pơlam làng bol lơh niam wơl wàng ròng, blơi phan siam phan ròng, kòn sơntìl gơ in geh niam. Tus tŭ do, kơnhoàl Mù Cang Chải neh geh 86 hìu bơnhă cih mat dan lơh bal mờ kờp jơh priă tă lơh là rlau 1 tơmàn 400 tơlak đong. Kơnờm bơh hơ̆, kờp jơh phan ròng là phan puan jơng bơh kơnhoàl dê geh 73 rbô nơm. Ồng Vàng Bua Tủa- Chủ tịch Ủy ban Nhân dân xã Púng Luông, kơnhoàl Mù Cang Chải pà gĭt: Tŭ geh priă jền ngui do den sền bal ală hìu bơnhă rƀah geh càn priă, tàm hơ̆ hìu bơnhă lơi kung geh lơm rơpu, kơnrồ ròng tàm hìu bơnhă, ai ală hìu bơnhă rơhời klàs bơh rƀah. Geh ală hìu bơnhă kung ngui priă jền do nàng rề ơnàng broă ròng phan.

Kơnhoàl Mù Cang Chải gĭt nền pơn jăt tai sơlơ mblàng yal tơngume, broă dong kờl bơh Kơrnoat 69 dê tus mờ jơh tơl nă làng bol tàm càr; lơh pràn bơ̆t bơtàu, hòi jà lơh ală broă lơh tam phan, ròng phan gơ jăt bal mờ phan pơnrơ geh is tàm tiah do dê, bè iar jù, sur kòn cau, be, sơn tra, thảo qủa...Sơlơ bơto pơlam bơta chài, dong làng bol geh càn ală bơnah priă càn kung bè bơto pơlam bơta git wă bè sền gàr, rơcăng sơndră kòp, kloh niam tiah ơm kis; pơn jăt tai hòi jà ală hợp tác xã lơh broă sa sươn sre tàm tiah do khin cha cih mat dan lơh ală tơngme dong kờl lơh sa jăt ală anih lơh gơlik phan.

Jơnau ai lơh pơnyơu pa yal bơh nti mìng là dùl jơnau ai lơh pơnyơu dùl êt lơm gời tàm ală broă lơh bơcri priă bơh Đảng, Dà lơgar dê tus mờ tiah làng bol jơi bơtiàn kòn cau mờ tiah kơh bơnơm, bè: Broă lơh 135 tơngai: 1, 2, 3 lời ai ală xã, thôn, ƀòn kal ke uă ir in; Kơrnoat 30A bơh Chính phủ dê bè broă lơh dong kờl gơmù rƀah mhar mờ kơ̆ kơl jăp gơwèt mờ 61 kơnhoàl rƀah geh lơh jăt tàm ală nam do; mờ Kuơmàng là Rơndăp broă lơh tơrgùm bal ală bơta bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021- 2030 neh geh Quốc hội kĭ ring bal nam 2019. Jăt ồng Đỗ Văn Chiến, lài do là Kuang ătbồ, Bộ trưởng Ủy ban Jơi bơtiàn kòn cau, tŭ do là Kuang ătbồ Ủy ban Mặt trận dà lơgar Việt Nam, đơs, den rơndăp broă lơh do, tàm hơ̆ geh: Rơndăp broă lơh do, broă tờm là lơh jăt 10 rơndăp broă lơh mờ gĭt nền là geh 3 bơta pa. Bơta dơ̆ dùl là tam pà mờ gĭt nền wơl tiah jơi bơtiàn kòn cau dùl êt nă cau mờ tiah kơh bơnơm, gĭt nền loh làng ală tiah kal ke ir nàng bơh hơ̆ tơrgùm bơcri priă di broă, di bơta cèng wơl cồng nha geh kuơ ngan, lơh gơlik geh broă lơh broă sa mờ bơtàu tơnguh mpồl cau lơh broă ai tiah làng bol jơi bơtiàn kòn cau dùl êt nă cau mờ tiah kơh bơnơm in. Broă lơh broă sa do gơ jăt bal mờ 3 kơnòl broă tờm: Bơtàu tơnguh lơh sa gah broă lơh brê bơnơm, sền gàr mờ bơtàu tơnguh brê; Ròng phan, bơtàu tơnguh ròng uă phan puan jơng, phan bàr nơm jơng jăt bơta pràn bơl tơl tiah dê; Lơh gơlik geh broă lơh broă sa bè lơh gơlik kơnuh sơnơm mờ ală tờm phan tam lơh sơnơm kuơ gơdờp mờ bơta geh is ù tiah brê bơnơm trồ tiah bơh tơl tiah dê. Bơsong ală broă ờ suk, gơ jal ngan gơwèt mờ cau ùr mờ kơnòm dềt tiah jơi bơtiàn kòn cau dùl êt nă cau mờ tiah kơh bơnơm. Bal mờ hơ̆ là bơsong bơhiàn mờng quèng gơtưk bơngơl gơla bè bau mờ cau rềp jơi nòi bal, bau bơh dềt ờ hềt tus sơnam ai bau mờ tơn jơh ală bơhiàn gơtưk bơngơl; Tơrgùm bơtàu tơnguh bơto bơtê, lơh sơnơm nàng tơnguh uă bơta niam khà kờp làng bol mờ tiah kơh bơnơm.

Broă lơh jơnau kờñ dà lơgar dê Bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021- 2030 geh lam lơh geh pơgồp bơnah lơh tam gơl bơta kơlôi, broă lơh mờ dong làng bol jơi bơtiàn kòn cau dùl êt nă cau lơh ngan lik klàs rài kis jơgloh rƀah dùl bă kơ̆ kơl jăp.

Cau cih Giàng Seo Pùa- Cau mblàng Lơ Mu K’Yến