VOV4.K’ho- Ƀộ trưởng, Kuang ătbồ Ủy ƀan Jơi bơtiàn kòn cau ồng Hầu A Lềnh pa geh dơ̆ lơh broă mờ Tỉnh ủy, Ủy ƀan Nhân dân càr Yên Ƀái bè lơh jăt broă lơh jơi bơtiàn kòn cau, broă lơh rơcăng lam lơh jăt Broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021- 2030.

Tàm dơ̆ lơh broă, Ƀí thư Tỉnh ủy Yên Ƀái ồng Đỗ Đức Duy kơ̆p kờñ, Ủy ƀan Jơi bơtiàn kòn cau pơn jăt tai sền gròi, dong kờl càr Yên Ƀái lơh jăt niam broă lơh jơi bơtiàn kòn cau tàm tơngai tus; hơ̆ là broă lơh hòi jà tă pơgồp bơta pràn; broă lơh ai Cau geh bơngă pin dờn in; ătbồ sền gàr brê; bơtàu tơnguh lơh broă sa sươn sre gơ jăt bal mờ nhơl chờ...Ƀộ trưởng, Kuang ătbồ Ủy ƀan Jơi bơtiàn kòn cau ồng Hầu A Lềnh sồr càr Yên Ƀái tơnguh tai broă mblàng yal, hòi jà tơnguh uă bơta gĭt wă bơh jơh ală anih lơh broă chính trị dê bè broă lơh jơi bơtiàn kòn cau, lơh jăt broă lơh jơi bơtiàn kòn cau, lơh geh bơta ring bal tàm Làng bol; kờp sền, tam gơl wơl broă lơh jơi bơtiàn kòn cau gơ in dipal tàm tŭ tơngai pa; kơlôi sơnơng sồr lơh lài, tơrgùm priă jền bơsong jơh tơn bàr pe bơta kal ke, mùl gŏ is tàm tiah làng bol jơi bơtiàn kòn cau dùl êt nă cau.

Cau mblàng Lơ Mu K’Yến