VOV4.K’ho- Tơngai do, broă lam lơh jăt broă lơh dong kờl jơi bơtiàn kòn cau neh lơh geh ală cồng nha kuơmàng. Tàm hơ̆ pal yal tus broă bơtàu tơnguh tơl làm broă lơh bơto bơtê tàm tiah jơi bơtiàn kòn cau dùl êt nă cau mờ tiah kơh bơnơm. Bulah ờ hềt geh ngan ngồn niam bơnĕ ngan mơya kung lơh geh di jơnau kờñ bơto mờ bơtê.

Hìu bơsram phổ thông kòn cau ơm sa ngai kấp dùl Nậm Búng, xã Nậm Búng, kơnhoàl Văn Chấn, càr Yên Bái là anih hìu bơsram pa lơh tàm nhai 04 nam 2021. Do kung là anih ơm kis mờ bơsram sră bơh ală oh kòn là cau jơi bơtiàn kòn cau dùl êt nă cau kis tàm xã dê. Hìu bơsram pa, niam bơnĕ, kƀàng cơghế bơsram sră geh blơi pa hơ̆ là bơta chờ hờp ờ mìng gơwèt mờ pơgru bal mờ kơnòm bơsram bơh hìu bơsram dê lơm ờ, mờ hơ̆ kung là bơta chờ hờp bal bơh mè bèp geh oh kòn gam bơsram tàm anih hìu bơsram do dê sơl. Tŭ do, khi gơtùi iang nùs pơyua oh kòn tài bơh ală kòn ờ gam pal kong mờ bơta mrềt nuăt bơh kàl mrềt dê, bơta duh tơr ồ ngan bơh kàl duh dê bè tàm anih hìu bơsram lài tai. Klau pơgru Nguyễn Văn Du là Phó Kuang ătbồ Hìu bơsram phổ thông kòn cau ơm sa ngai kấp dùl Nậm Búng, xã Nậm Búng yal, tŭ do gơwèt mờ oh kòn làng bol jơi bơtiàn ơm kis gùt dar den hìu bơsram pa do lơh geh jơh tơn lơm bơta ơm kis kung bè bơsram sră ai ală kơnòm bơsram in. Mơya, bal mờ ală bơta ƀươn den kung gam tềng hơ̆ sơl ală bơta kal ke gơwèt mờ pơgru bal mờ kơnòm bơsram bơh hìu bơsram Nậm Búng do dê. Klau pơgru Nguyễn Văn Du yal: Gùng lòt, dà ia ngui tàm rài kis bơh ală sau dê den kung gam pal kơnờm tàm hìu bơnhă làng bol sơl, sră giăo khoa den 100% ală sau pal blơi mờ rài kis bơh làng bol tiah kơh bơnơm dê kal ke ngan. Hìu bơsram kung mìng hòi jà mè bèp kơnòm bơsram là bơcri uă gơwèt mờ bàr môn toán mờ tiếng Việt, ai sră giăo khoa gam wơl là bơsram jăt sră bơh pơgru dê tài bơh mờr ndrờm bè ờ blơi geh. 60% ală sau ờ tơl priă jền nàng blơi geh tơl ală bơta sră.

Ồng Nguyễn Văn Tiến- Chủ tịch Ủy ban Nhân dân xã Tiến Nguyên, do là dùl xã tiah kơh bơnơm bơh kơnhoàl Quang Bình, càr Hà Giang dê pà gĭt, đơs nàng gơtùi ai geh anih ơm anih sào sa ai pơgru mờ kơnòm bơsram in tàm ală anih hìu bơsram tàm ù tiah xã den sền bal là kung gam lơh geh sơl, mơya tàm bơta ngan ngồn den geh phan bơna gam ờ tơl sơl, ngan là cơldŭ bơsram mờ ală hìu pơrjum mpồl bơtiàn. Kờñ lơh niam wơl kung bè lơh tai mơya priă jền kung ờ geh sơl, priă hòi jà làng bol tă pơgồp den kung kal ke tài bơh làng bol ndrờm là cau jơi bơtiàn kòn cau dùl êt nă cau ờ geh tơl bơta dong kờl, tă pơgồp. Den tàng bè hơ̆, kờñ ngan bơta tus bal bơh ală kấp, ală gah dê nàng lơh bè lơi lơh geh cồng nha bơto mờ bơsram tàm tiah kơh bơnơm gam uă kal ke. Ồng Nguyễn Văn Tiến, yal: Cơldŭ bơsram gam ờ tơl, cơldŭ pơrjum, cơldŭ lơh broă ờs mờng kung ờ tơl sơl. Bàr pe nam lài, xã kung hòi jà mpồl bơtiàn lơh bal bơh mè bèp, kuang bàng...mơya kung mìng là lơh nggùl mờ sơlo lơm kung ờ gŏ di là kơ̆ kơl jăp bè broă lơh bơh Dà lơgar dê ờ. Kung gam pal geh tơl gơ dê, ơdŭ bơsram là pal geh lài khà dùl, mơya nàng lơh geh jăt tơl jơnau sồr den ờ hềt geh, kung gam ờ tơl, pal jồm cơldŭ lơh broă bơh ală pơgru dê, hăt hal ngan ir.

Ờ tơl sră giăo khoa, ờ tơl cơldŭ bơsram, ală cơldŭ lơh broă ờs mờng hơ̆ là ală broă mờ ală anih hìu bơsram tàm tiah sar lơgar ngài, tiah làng bol jơi bơtiàn kòn cau dùl êt nă cau kung gam pal gơtìp sơl. Mơya mờ bơta sền gròi bơh Dà lơgar dê bơh ală broă lơh geh kuơ ngan, cồng nha bal mờ bơta dong kờl bơh ală priă jền mpồl bơtiàn dê tă pơgồp tàm tơngai ờ jŏ tai, broă do sền bal geh bơsong. Nàng lơh bè lơi ală kơnòm bơsram, ală mè bèp kơnòm bơsram iang nùs geh đau dùl hìu bơsram bơsram sră niam ngan rlau jơh, lơh geh ai broă lơh bơ̆t mòn kòn bơnus mờ Đảng mờ Dà lơgar he sền gròi ngan.

Cau cih VOV4- Cau mblàng Lơ Mu K’Yến