VOV4.K’ho– Tàm pơrjum dơ̆ 2, Quốc hội khóa 15, Jơnau yal tơrgùm jơh ală jơnau đơs, jơnau dan bơh cau tĕ khà mờ làng bol dê pơyua tus Quốc hội bơh Bí thư Đảng dà lơgar, Chủ tịch Ủy ban Mặt trận dà lơgar Việt Nam ồng Đỗ Văn Chiến yal đơs loh: Cau tĕ khà mờ làng bol sền gròi uă ngan tus broă lơh rơcang sơndră kòp Covid-19. Sồr geh bơta bơsong dipal, cèng bơta jŏ jòng bè broă lơh cit sơnơm vaccine, ngan là sơnơm vaccine cit ai cau hơđơm 18 sơnam in; sền gròi bơsong ală broă lơh, bơta dong kờl ală cau rê wơl hờ ƀòn tờm bơh tiah geh kòp mhar geh broă lơh kơ̆ kơljap mờ gàr niam rài kis. Mờ kung sền sơ wì tơl làm bè cồng nha bơto bơtê mờ bơsram pờ tơn tàm internet ai kơnòm bơsram ală kấp in.

Cau tĕ khà mờ làng bol ring bal kờñ broă Đảng, Quốc hội, Chính phủ neh ai tơlik uă sră nggal đơng lam, pơlam broă lơh rơcang sơndră kòp mờ nùs nhơm “sơndră kòp bè tam dră mờ bol sò tơm”, ơn pràn kơldăng să jan, màng kis làng bol dê lài ngan rlau jơh. Ală kơnòl broă bè gàr tơl niam rài kis mpồl bơtiàn, tus bal, jòi cau ơm rềp, tam cah is, gròi sền broă lơh sơnơm tơmba ai làng bol in geh bơsong tơn tàm kấp hơ đơm mờ jơnau đơs “lòt tơl gơl gùng, teh tơl mpồng hìu, kờp sền tơl nă cau”. Broă rơndap lơh mờ ală broă lơh rơcang sơndră kòp geh lam lơh tàm tơngai lài sền bal là dipal, lơh geh cồng nha kuơmàng bal mờ ală broă lam lơh sơbac mhar, jơh nùs, kràñ cê tàm broă đơng lam lơh jat. Bulah bè hơ̆, cau tĕ khà mờ làng bol kung gam kơlôi rơcang mờ ờ suk: “Cau tĕ khà mờ làng bol đơs là, broă lơh rơcang sơndră kòp gam geh 2, 3 bơta ờ niam. Broă lơh đơs lài geh tŭ ờ hềt di mờ bơta geh ngan. Geh tŭ, geh tiah gam sền ờ sơp, ờ gròi sền, lam lơh dùl bă kră kơldăng, ờ geh bơta ring bal tàm broă đơng lam, pơlam bơsong ală broă gơlik geh ngan ngồn, nisơna. Ai bơta ờ niam tàm broă mblàng lơh loh broă gơlik geh nàng lam lơh ring niam ală broă rơndap lơh lơyah tơngai kung bè jŏ tơngai nàng ờ mìng rơcang sơndră kòp mờ gam bơtàu tơnguh lơh sa- mpồl bơtiàn tai. Broă ai tơlik uă sră nggal đơng lam, pơlam, tàm hơ̆ geh 2, 3 bơta sră nggal ờ hềt di mờ bơta geh ngan, ờ gơtùi lam lơh ngan ngồn, lơh gơbàn kal ke ai làng bol mờ mpồl lơh sa kă bro in. Ală hìu sơnơm tàm kấp hơ đơm mờ pràn jak atbồ bơh ală kấp dê ai gŏ uă bơta ờ niam; jơh ală phan bơna, măi mok, sơnơm tơmba, sinh phẩm, sơnơm vaccine... ndrờm pal blơi bơh lơgar ndai den tàng ờ hềt di tŭ, gơtìp rơmơp ndơl mờ priă tă lơh uă”.

Cau tĕ khà gam kơlôi rơcang tài bơh GDP 9 nhai nam 2021 ờ lơh geh bè khà broă rơndap lơh ai tơlik; broă tă priă bơcri dà lơgargam lơyài; 2, 3 jơnau sồr geh jàu bè lơh sa- mpồl bơtiàn kuơmàng nam 2021 lơh geh lơyah pơndrờm mờ Nghị quyết bơh Quốc hội dê. Ală mpồl lơh sa kă bro kơp kờñ Chính phủ, ală càr, ƀòn dờng geh broă lơh di tŭ pơndiang phan bơna, măi mok nàng gàr sùm broă lơh sa; kă bro; geh ală broă lơh dong kờl bè tă dia; tơrmù ală bơnah priă tă lơh, priă ơpah ù; tơn jŏ tơngai tơm dồs, tơrmù priă cồng ai càn ngân hàng; geh broă lơh dong kờl gàr sùm cau lơh broă... nàng mpồl lơh sa kă bro in bơtàu tơnguh wơl mờ bơtàu tơnguh lơh sa.

Cau tĕ khà đơs, geh uă cau kal ke ờ hềt geh dờp ală bơnah dong kờl gàr tơl niam rài kis mpồl bơtiàn; sră nggal dong kờl gam kal ke, tơngai tă priă dong kờl gam lơyài; uă tiah cau lơh broă sa gơtìp kal ke tài bơh kòp bơtờp mơya ờ hềt geh dong kờl; kung gam gơlik geh bơta sơmờm bơta kuơ tàm broă lam lơh gàr tơl niam rài kis mpồl bơtiàn; lơh gơbàn kal ke, ờ suk làng bol in. Cau tĕ khà kơlôi rơcang bè cồng nha bơh broă bơto bơtê mờ bơsram pờ tơn tàm internet, ngan là gơ wèt tus mờ kơnòm bơsram kấp 1; broă pal ơm rềp sùm mờ ală măi mok điện tử digơlan lơh gơ rềng uă ngan tus pràn kơldăng să jan kơnòm bơsram dê.

Đoàn Chủ tịch Ủy ban Mặt trận dà lơgar Việt Nam sồr Quốc hội, Chính phủ, ală mpồl, Bộ, gah broă lơh, càr, ƀòn dờng mhar lam lơh jat ngan ngồn jơnau đơs pơn dut bơh Ban Chấp hành Đảng dà lơgar dơ̆ 4 dê bè broă lơh rơcang sơndră kòp Covid-19 mờ bơtàu tơnguh wơl, bơtàu tơnguh lơh sa- mpồl bơtiàn. Ồng Đỗ Văn Chiến, Chủ tịch Ủy ban Mặt trận dà lơgar Việt Nam đơs loh: “Bơsong dipal, cèng bơta jŏ jòng bè broă lơh cit sơnơm vaccine, ngan là sơnơm vaccine cit ai cau hơđơm 18 sơnam in; sơlơ bơcri priă ai hìu sơnơm kấp hơđơm in mờ broă lơh sơnơm rơcang gàr lài in; bơt bơtàu bơnàng jă công nghệ ngui bal gùt lơgar tàm broă rơcang sơndră kòp Covid-19; sền gròi bơsong dipal ală broă gàr tơl niam rài kis mpồl bơtiàn, cau lơh broă, broă lơh, rài kis làng bol dê; ai phan bơna, măi mok, sinh phẩm xét nghiệm tơmut tàm mat phan bơna dà lơgar atbồ gàr kơ̆ kơljap khà priă. Sền gròi bơsong ală broă lơh, bơta dong kờl ală cau rê wơl hờ ƀòn tờm bơh tiah geh kòp mhar geh broă lơh kơ̆ kơljap mờ gàr niam rài kis. Sền sơ wì tơl làm bè cồng nha bơto bơtê mờ bơsram pờ tơn tàm internet ai kơnòm bơsram ală kấp in; geh broă rơndap lơh bơto bơtơl jơnau git wă ai kơnòm bơsram in, ngan là kơnòm bơsram kấp 1”.

Đoàn Chủ tịch Ủy ban Mặt trận dà lơgar Việt Nam kung sồr ai tơlik broă lơh tơrgùm jơh ală bơta bè bơtàu tơnguh wơl mờ bơtàu tơnguh lơh sa; mhar lơh nền ală bơnah priă jền dong kờl, chồl pràn mpồl lơh sa kă bro, làng bol bơcri priă bơtàu tơnguh lơh sa, ờ lời gơlik geh bơta ờ tơl ală mpồl tac phan, mpồl blơi phan lơh gơs; geh broă lơh gàr tơl cau lơh broă ai ală mpồl lơh sa kă bro in, hời rơhời bơsong hìu ơm mpồl bơtiàn ai công nhân in gơ jat bal mờ ală anih lơh sa mờ măi mok, lơh niam broă bơcri priă kă bro, tơrmù ƀà khà ală mpồl lơh sa kă bro lik bơh drà kă bro; pơn jat tai geh ală broă lơh dipal nàng sền gròi bơta roh bơngă khà priă, gàr niam rài lơh sa in mhar bơtàu tơnguh wơl mờ bơtàu tơnguh.

Tơnơ̆ dơ̆ mut pơrjum, Quốc hội neh iat jơnau yal gròi sền broă bơsong, hơ jơnau dan, jơnau đơs bơh cau tĕ khà dê pơyua tus pơrjum dơ̆ 11, Quốc hội khóa 14. Kuang atbồ Ban Dân nguyên Quốc hội ồng Dương Thanh Bình pà git, bơh ală dơ̆ tìp mat cau tĕ khà, neh geh 807 jơnau đơs, jơnau dan geh tơrgùm pơyua tus ală anih lơh broă geh gơnoar in bơsong. Jơnau dan bơh cau tĕ khà dê gơ rềng tus jơh ală gah bơh rài kis mpồl bơtiàn dê, tàm hơ̆ 2, 3 gah pơn jat tai geh uă cau tĕ khà sền gròi bè: Phan kuơ geh is, tiah ơm kis, broă lơh dong kờl gơ wèt tus mờ cau geh màng mờ dà lơgar, cau lơh broă, broă lơh, tơl niam rài kis mpồl bơtiàn, broă lơh sa suơn sre, cau lơh broă sa, ƀòn lơgar; bơyai broă mpồl kuang bàng duh broă mờ broă lơh dong kờl gơ wèt tus mờ kuang bàng, công chức... Tus tŭ do, 100% jơnau dan neh geh hơ jơh. Ồng Dương Thanh Bình kung đơs tus 2, 3 jơnau dan, tàm hơ̆ geh jơnau dan ală anih lơh broă Quốc hội sơlơ tơnguh rlau tai broă lơh gròi sền broă ai tơlik sră nggal pơlam lơh jat jơnau cih adat boh lam; gròi sền ală broă pa gơlik geh gơ rềng tơn tus rài kis làng bol dê: “Ală mpồl kuang bàng Quốc hội pal tơnguh cồng nha tơrgùm, bơsong jơnau dan bơh cau tĕ khà dê, di tŭ pơyua tus ală anih lơh broă geh gơnoar in bơsong jat jơnau cih bơh adat boh lam dê. Bơdìh hơ̆ tai, dan Chính phủ đơng lam ală bộ, gah broă lơh dà lơgar kờp sền, bơsong ală jơnau dan gam tàm tơngai bơsong, gàr niam bơsong geh cồng nha, di broă rơndap lơh, di tŭ tơngai hơ pơrgon. Mờ kung tơnguh cồng nha bơt bơtàu thể chế, lơh sir adat boh lam; tơnguh cồng nha bơt bơtàu sră nggal pơlam lơh jat jơnau cih adat boh lam, gàr bơta ring bal tàm ală sră nggal pơlam lơh jat jơnau cih adat boh lam.

 Cau mblàng K’Duẩn