VOV4.K’ho- Chính phủ pa lơh nền bơtơl tai 5 rbô 100 tơmàn đong bơh priă rơcăng lài kes priă dà lơgar nam 2021 ai Bộ Y tế in blơi măy mok, phan bơna, sinh phẩm, dà sơnơm, sơnơm tơm ba drơng broă rơcăng sơndră kòp Covid-19. Tàm tơngai  priă jền ờ gŏ jơngkah jơngkah, bơta lơh nền do đơs nền bơta lơh lài khà dùl bơh Đảng, bơh Chính phủ dê là sền gàr pràn kơldang să jan, màng kis jơh gùt làng bol in- bơta gơn kơnờm kuơmàng ngan rlau jơh bơh jơh gùt rài lơh sa dê. Mpồl bơtiàn, ală cau jak chài uă gah broă lơh ndrờm ring bal mờ bơta lơh nền do mờ gơn kơnờm priă jền pa geh gờñ geh ngui geh cồng nha tàm broă geh ngan- bơta kuơ mpồl bơtiàn.

Pơgăp mờ do ờ hềt jŏ, tàm pơrjum pờ tơlik tơn tàm internet sền wơl broă lơh priă jền Kes priă dà lơgar dê 6 nhai bồ nam 2021 mờ lam lơh kơnòl broă 6 nhai lồi nam, Bộ Tài chính yal, 6 nhai bồ nam, Kes priă dà lơgar neh tă 4 rbô 650 tơmàn đong ai broă lơh rơcăng sơndră kòp in. Kờp bal bơh nam 2020, khà do là  21 rbô 500 tơmàn đong, tàm hơ̆ geh 8 rbô 400 tơmàn đong tam pà ai broă lơh blơi măy mok, phan bơna ...drơng broă lơh rơcăng sơndră kòp in. Hơ̆ là, 5 rbô 100 tơmàn đong pa geh Chính phủ tă mờ jàu ai ală Bộ Y tế, Bộ Tài chính in ngui, ờ gŏ di là bơnah priă jền bơh sơnrờp nàng kờñ tơnguh tai cồng nha lơh broă lơh rơcăng sơndră kòp, sền gàr pràn kơldang să jan, màng kis làng bol in tềng đăp bơta gơbàn kal ke bơh kòp Covid-19 dê. Ồng Nguyễn Minh Phong- Cau jak chài lơh sa, mờ là Tiến sĩ đơs bè do: Bơta do đơs ngan là ờ gŏ lơh nrơ̆t ndơl ờ, ờ gŏ di sơrlèt rlau mờ bơta kơlôi sơnơng bơh làng bol bè ờs dê halà ală anih lơh broă kơlôi sơnơng dê pơndrờm mờ bơta geh ngan, tài bơh bol he gam kong mờ bơta lơh bơtờp kòp dơ̆ 4 gơbàn tàm uă tiah den tàng bè hơ̆, priă jền tă ai ală broă lơh dong kờl, kơryan mờ rơcăng sơndră kòp in là uă ngan, gơ sồr ală bơnah kes priă uă ngan. Jăt añ đơs den bơnah priă bơtơl 5 rbô tơmàn đong do là ai tai mờ ờ hềt di là jơh ờ. Làng bol geh iang nùs rlau tài bơh dilah geh ai priă jền niam, gròi sền niam den anih prăp phan bơna ngui nàng tam dră mờ kòp, rơcăng sơndră kòp, kuơmàng là nàng sơm kòp ai ală cau kòp kơn jơ̆ in geh tơnguh tai. Ală jơnau ờ tơl anih dờp cau F0 halà ờ tơl măy tă nhơm, ờ tơl sơnơm geh ờ huan gam tai halà ờ gơlik geh tai.

Sền swì jơh ală broă, cau jak chài sền gàr lơngăp lơngai rài kis mpồl bơtiàn là ồng Mạc Văn Tiến đơs là, ală dà lơgar tàm dunia neh mờ gam pal tă uă rlau, pràn rlau ai broă lơh rơcăng sơndră kòp in, tàm hơ̆ geh bal broă lơh sơnơm mờ broă kuơ bal mpồl bơtiàn. Jơnau bơsram bơh ală dà lơgar dê, tàm tơngai kòp lơh bơtờp uă ngan là tàm nam 2020, neh pà gŏ, ală lơgar kờñ pal geh ală bơnah kes priă rơcăng lài, bơtơl rơcăng lài kes priă, nàng rơcăng lài ai ală jơnau ai lơh pơnyơu krơi is ndai in, ală jơnau digơlan gơlik geh ờ hềt gŏ bơh lài bè kòp Covid-19, pleh gơtìp gơ ơm tàm bơta tung lơtăng bè jơnau bơsram tàm bàr pe dà lơgar, bè: Ấn Độ, Myanmar...Việt Nam he bơtuah tài bơh 3 dơ̆ bơtờp kòp lài ờ huan lơh bơtờp uă, broă lơh rơcăng sơndră kòp niam đau sơl, ală broă mpồl bơtiàn lơh bal geh dùl nùs lơh jăt bal- kes priă dà lơgar ờ hềt pal ngui uă ir. Ồng Mạc Văn Tiến, geh jơnau đơs bè do: Bơtơl tai 5 rbô 100 tơmàn đong, pal đơs ngan là di tŭ ngan, kờñ ngan, nàng geh priă jền bơsong broă. Mơya kung kờñ pal kah bè bơta yal lài, rơcăng lài, bè ală jơnau pơhìn ờ hềt geh bơh lài tài bơh gơ digơlan là ală jơnau gơlời wơl hờ tơnơ̆ do ai rài lơh sa in. Ờ hềt đơs, do là ală broă gơlik geh nisơna, sơnđan là broă lơh krơi is, gơ kung là ờ hềt gơtùi đơs ngan là ờ lơh tìs kơrnoat boh lam mờ sơmờm, jòi sa kuơ. Kơ̆p kờñ ngan ală cau lơh jăt broă lơh dà lơgar dê lơh broă dùl bă jơh nùs jơh tồr, sền gàr priă jền sơrbac mhar do bơh Chính phủ dê tus geh di anih kờñ ngan: blơi geh ală măy mok, drơng broă làng bol in niam...mờ uă broă ndai tai, ngan ngồn hơ̆ kung là jơnau kơ̆p kờñ bơh làng bol dê.     

Dùl nùs bal mờ jơnau đơs do, mò Phạm Nguyên Cường- Cau jak chài mblàng is ală broă sền gàr lơngăp lơngai rài kis mpồl bơtiàn, lơh broă, broă lơh là dùl tàm ală kuang bàng tus bal gròi sền, tă pơgồp jơnau đơs broă lơh jăt ală bơnah priă jền “ờ hềt geh bơh lài” bè bơnah priă 62 rbô tơmàn đong dong kờl mpồl lơh sa kă bro mờ cau lơh broă, đơs bè do: Tàm Kơrnoat pơrjum mờ kơrnoat lơh nền boh Thủ tướng dê neh tơngkah ală anih lơh broă ătbồ dà lơgar bè lơh sơnơm là Bộ Y tế geh pal lơh jăt jơh ală jơnau sồr bơh Adat tàm pơrlòng jòi cau blơi tus blơi phan bơna măy mok lơh bè lơi nàng gơ in tềm pềr ngan, cồng nha ngan. Mơya, do là bơnah priă pal đơs là tàm dùl êt bơta digơlan kung ờ thàn geh tŭ tơngai nàng tàm pơrlòng jòi cau blơi halà săc rwah bơta lơi ờ mờ kuơmàng ngan rlau jơh là pal lơh geh ală jơnau sồr dong kờl- sền gàr ờdo ờdă, sền gàr pràn kơldang să jan ai làng bol in. Den tàng geh uă ngan cau să tờm là ală cau lơh sơnơm, ală hìu sơnơm, ală mpồl lơh sơnơm pal khin kong kơnòl mờ ală broă bè do. Den tàng, jàu kơnòl ai ală mpồl anih lơh broă lơh sơnơm in, ală hìu sơnơm in, Bộ Y tế pal tus bal gròi sền mờ jơh gùt làng bol, ală mpồl chính trị kung tus bal gròi sền, lơh bơta hơ̆. Broă kong kơnòl den ndrờm bal mờ broă là pal lơh loh làng, pal geh yal tơngĭt jơnau, pal lơh, geh jơnau yal mờ sền swì tơnơ̆ mờ ờ gŏ di là sền swì bơh sơnrờp.

5 rbô 100 tơmàn đong là dùl bơnah priă ờ gŏ di là dềt ờ- là kơnòl, kung là bơta lơh ngan jơh nùs, bơta lơh ngan uă ngan bơh Chính phủ dê tàm tŭ broă lơh sa- mpồl bơtiàn kong gơrềng uă bơta bơh kòp dờng, sùm mờr 2 nam do. Mơya, bè jơnau mblàng sền bơh ală cau jak dê, sền ơnàng rlau tus mpồl bơtiàn, do kung là dùl bơta lơh nền geh gơdờp lơh gơrề, tài bơh tŭ Chính phủ tơngŏ bơta lơh ngan jơh nùs rơcăng sơndră kòp uă ngan rlau jơh dilah gơtùi, làng bol, ală cau lơh sa kă bro, ală mpồl lơh sa kă bro- jơh gùt rài lơh sa- mpồl bơtiàn kung geh dùl bơnah lơi sền sơnơng mờ lơh ngan tơngŏ kơnòl bơh he dê. Broă Tập đoàn Vingroup gam dong kờl blơi mờ lơh gơlik măy tă nhơm mơkung kă bro gơtùi, wèt tus blơi bơh lơgar ndai sơnơm ơn prăp, dong kờl dà lơgar tàm broă lơh rơcăng sơndră mờ kòp là dùl jơnau ai lơh pơnyơu. Ờ gơtùi ờ đơs do là broă lơh bơh dùl nă cau lơh sa kă bro dê, mpồl lơh sa kă bro geh bơta pràn lơh sa- priă jền uă ngan, mơya loh làng broă Chính phủ lơh ngan tài bơta pràn kơldang să jan, màng kis bơh làng bol dê kung ngan là bơta gơn kơnờm nàng mpồl bơtiàn- dà lơgar in iang nùs lòt bal mờ Chính phủ tàm broă lơh do. Broă gam wơl là tàm mpồl cau lơh jăt, mờ tàm broă do là Bộ Y tế, Bộ Tài chính mờ ală anih lơh broă, mpồl lơh broă geh gơrềng dê, ngui geh cồng nha, song dơ pă, loh làng kes priă do, kờñ pal pơn jăt tai tơngŏ mờ tơngŏ pràn kơldang kơnòl bơh anih lơh broă dê, cau dùl nă să is dê tàm broă lơh rơcăng sơndră kòp.

Cau cih Thu Trang (VOV1)- Cau mblàng Lơ Mu K’Yến