VOV4.K’ho- Broă Ciñ phủ ai lơh jăt Kơrnoăt sồ 68 bè bàr pe broă dong kờl cau lơh broă mờ cau ngui cau lơh broă mờ kờp jơh priă là 26 rbô tơmàn đong mờ pa do mùl màl là bơta dong kờl di tŭ ai cau lơh broă mờ cau ngui cau lơh broă tìp kal ke tài bơh kòp dờng Kovid-19 in. Jăt mờ hơ̆, tàm khà 12 mpồl broă dong kờl, geh 7 broă dong kờl priă măt dùl dơ̆ ai cau lơh broă gơtìp roh broă lơh tơn, ơm lơh broă, pal ơm ing sră pơrgon lơh broă tài bơh kòp Kovid-19 bơh 1 tơlak 500 rbô đong dùl nă tus 3 tơlak 710 rbô đong dùl nă, tàm tŭ cau lơh broă khăt gơboh is geh dong kờl êt ngan rlau jơh là bơh 1 tơlak 500 rbô đong dùl nă.

Ƀộ trưởng Ƀộ Lao động Thương ƀinh mờ Xã hội ồng Đào Ngọc Dung pà gĭt, broă lơh broă dong kờl mpồl cau lơh broă khăt gơboh dơ̆ do neh ai jơnau bơsram bơh bơnah dong kờl lài. Ồng Đào Ngọc Dung, đơs: Jơnau kờñ bơh Thủ tướng dê kung bè Ƀộ trưởng dê jàu là lơh ƀươn ngan rlau jơh ală sră pơ àr, tơrmù uă ngan ală sră pơ àr, tơn rŭc lơyah ngan rlau jơh bè tŭ tơngai, mờ bal mờ dùl jơnau đơs ƀươn ngan rlau jơh nàng ai cau lơh broă, cau ngui cau lơh broă in geh dờp broă dong kờl dùl bă ƀươn soh ngan rlau jơh.

Priă dong kờl 26 rbô tơmàn đong bơh Ciñ phủ dê mùl màl di tŭ, di cau, loh làng song dơ pă, ờ ndơ̆p mpồn mờ cèng wơl cồng nha geh kuơ ngan, ờ lời hŭi siơ̆u dùl nă cau geh dờp bơta dong kờl. Mơya tàm bơnah priă dong kờl do geh bàr pe bơta pa mờ làng bol bal mờ ală gơ̆p bơyô kờñ pal kah: Gơtùi đơs, ală cau gơtìp gơrềng bơh kòp Kovid-19 do uă sơl, den tàng bè hơ̆ bơnah priă dong kờl 26 rbô tơmàn đong mùl màl là bơnah priă dong kờl tàm tơngai kal ke do. Bulah mìng ndrờm dùl bơnah pe pơndrờm mờ bơnah priă dong kờl 62 rbô tơmàn đong lài do mơya bơnah priă dong kờl dơ̆ do tơrgùm tàm di cau, di anih mờ gơ gơlơh bè dùl bơta gơn kơnờm nàng dong kờl ai ală cau lơh broă gam tìp kal ke in. Bơta gam đơs tàm do, bơnah priă dong kờl dơ̆ do geh dùl bơta pa hơ̆ là ai ală tiah in lơh nền is mat ală cau geh dờp bơta dong kờl.

Ƀác sĩ Nguyễn Thu Giang là Phó Kwang ătbồ Viện bơtàu tơnguh mpồl bơtiàn, mờ là Kwang ătbồ mpồl cau lơh broă ntrờn tiah ơm kis, pà gĭt: ală bơta pa do geh jàu ai ală tiah in den bơta kwơ lài ngan hơ̆ là mhar mờ di tŭ, tài bơh mat neh geh tiah hơ̆ kờp sền mờ cih yal ală jơnau tơngĭt kờñ pal geh. Ƀác sĩ Nguyễn Thu Giang, pà gĭt: Bơnah priă dong kờl do gơ loh làng rlau, đơs di mat rlau, loh làng rlau, 12 bơta mờ ală mpồl bè lơi. Kung là dùl bơnah ai jơnau mờng chài bơh bơnah priă dong kờl lài den bol he gŏ tàm bơta lơi hơ̆, den bơnah priă dong kờl dơ̆ dùl gơ lơyài ngan, ală cau khi kờñ ngan tàm anih dŭt ndơl den bơh 3 tus 5 nhai khi kung gam ờ hềt geh dờp sơl bơta dong kờl, sră nggal gơ kal ke ngan, lơngah lơngañ ngan...mơya bơnah priă dong kờl do niam den neh gŏ gơ kơrhia rlau. Bơta niam là tiah hơ̆ gĭt geh, bol he sền gŏ ƀòn dờng Hồ Chí Minh neh lam lơh bơnah priă dong kờl bal mờ rlau 800 tơmàn đong, tàm hơ̆ geh bal mpồl cau tăc vĕ sồ, cau lơh rơndeh ôm...bè hơ̆ broă jàu măt ai tiah hơ̆ in gơ ƀươn ƀoài rlau uă ngan.  

Ai jơnau mờng chài bơh broă lam lơh bơnah priă dong kờl 62 rbô tơmàn đong, bơnah priă dong kờl dơ̆ do sền gròi tus sơlơ sền swì tơnơ̆, sơlơ jăt sền, ngui niam gơnoar broă jăt sền bơh Mặt trận dà lơgar ală kấp dê. Tàm ală tŭ lam lơh, kơnòl bơh cau lam bồ dê kung geh yờ tơnguh uă ngan rlau jơh. Ƀộ trưởng Ƀộ Lao động Thương ƀinh mờ Xã hội ồng Đào Ngọc Dung, đơs loh: 12 mpồl broă dong kờl geh cih nền cê loh làng: Gùng dà lơh jăt, tơngai lơh jăt, ală broă bơsong, jàu kấp jàu gơnoar loh làng ngan; yờ tơnguh kơnòl cau lam bồ mờ tàm do là Củ tịc Ủy ƀan Ñân dân càr, kơnhoàl dê. Tơnơ̆ kơrnoăt 23 do ờ kờñ pal geh khăt dùl jơnau bơto pơlam lơi tai. Dilah geh den mìng là mblàng hơ kơrnoăt boh lam lơm mờ ờ gŏ cih mờ sră pơ àr tai ờ. Bol añ kung song dơ pă tàm ală tŭ lơh, lơh ndang tam gơl ndang, mờ sơlơ sền swì tơnơ̆; sơlơ jăt sền bơh mặt trận dà lơgar, kông đoàn mờ ală mpồl cau dê...

Dilah bè bơnah priă dong kờl 62 rbô tơmàn đong geh tŭ tơngai bơsong den sră nggal ai cau ngui cau lơh broă in càn tơm priă nhai, ơm broă digơlan gơguh tus 1 nhai 10 ngai, den mờ bơnah priă dong kờl dơ̆ do, tơngai uă ngan rlau jơh lơh sră pơ àr mìng gam 7 ngai lơm, geh 4 ngai dờp sră bơsong sră nggal mờ 3 ngai ai wơl tai priă jền. Den tàng bè hơ̆, broă lơh ƀươn sră pơ àr nàng kờñ dong làng bol mờ mpồl lơh sa kă bro geh dờp broă dong kờl gờñ rlau jơh dilah gơtùi.

Jăt Ƀộ trưởng Ƀộ Lao động Thương ƀinh mờ Xã hội ồng Đào Ngọc Dung, đơs: Gơwèt mờ bơnah priă dong kờl dơ̆ do jăt jơnau sồr bơh Ƀộ Ciñ trị, Quôk hội, Ciñ phủ dê lơh nền broă dong kờl cau lơh broă mờ cau ngui cau lơh broă gơtìp gơrềng tài bơh kòp dờng Kovid-19. Ồng Đào Ngọc Dung, đơs tai: Bè broă dong kờl dơ̆ do, mờ cau bè hơ̆ den rơndăp lơh ală broă dong kờl dùl bă loh làng ngan, geh 3 mpồl broă dong kờl tờm ngan, lài ngan là mpồl broă dong kờl tơn bè priă măt ai mpồl cau lơh broă gơtìp ơm ing sră pơrgon lơh broă, gơtìp ơm wơl sră pơrgon lơh broă, gơtìp ơm broă. Mpồl broă dong kờl dơ̆ 2 là mpồl broă dong kờl tơrgùm uă nàng ờ tă, tơrmù mờ dong kờl bơh ală broă dong kờl sền gàr rềs àr, bè: Bảo hiểm ờdo ờdă lơh broă, bảo hiểm jơh sơnam lơh broă chơ̆t keh mờ bảo hiểm kơryan ờ geh broă lơh. Mpồl broă dong kờl dơ̆ pe là broă dong kờl nàng bơtàu tơnguh wơl lơh sa, mờ nền cê là pà wơl priă jền mờ ai dùl bơnah bơh Kes priă bảo hiểm ờ geh broă lơh nàng lơh geh wơl, nàng bơto bơtê, nàng bơto pơlam, gàr cau lơh broă nàng bơtàu tơnguh wơl tơnơ̆ tơngai gơbàn kòp Kovid-19.

Bal mờ ală cau roh broă lơh, ơm ing sră pơrgon lơh broă, gơtìp ơm broă, mờ ală cau lơh broă là cau F0, F1, F2 den bơnah priă dong kờl kung geh ală jơnau cih loh làng sơl. Ƀộ trưởng ồng Đào Ngọc Dung pà gĭt: Bè bơta pal jăt den Ciñ phủ cih loh làng ngan bè do: Jơh ală cau pal sơm kòp Kovid-19 (gam sơnđan là F0) mờ ală cau ơm yah ngài F1 (geh bal ơm yah ngài tơrgùm bal, ơm yah ngài tàm hìu mờ ơm yah ngài tàm ală anih lơh sa kă bro) ndrờm geh dờp broă dong kờl jơh bè priă sơm kòp. Dơ̆ bàr là dong kờl priă sa 80 rbô đong dùl ngai dùl nă mờ tơngai dong kờl den jăt tơngai sơm kòp ngan ngồn, mơya ờ gŏ di uă rlau ir 45 ngai. Dilah bè sơm kòp den tơngai dong kờl uă ngan ờ uă rlau 45 ngai; mờ tơngai dong kờl ơm yah ngài jăt ngai ngan ngồn mơya kung ờ gŏ di uă rlau 21 ngai. Mìng is gơwèt mờ cau do, mơya là cau ùr geh bun den geh dong kờl tai dùl tơlak đong dùl nă mờ cau ùr halà cau bèp, cau mè dipal mờ kơrnoăt boh lam ròng kòn dềt hơđơm 6 sơnam den kung geh dong kờl tai tơl nă oh 1 tơlak đong. Mìng is ală sau dềt, hơ̆ là sau dềt bơh tŭ pa deh tus 16 sơnam den geh dong kờl tai 1 tơlak đong, nàng blơi phan ngui sa kờñ pal geh nàng drơng tai ală sau in. Gam wơl gơwèt mờ F2 bol he ờ hềt đơs, bè hơ̆ den ală tiah geh sền swì jăt tàm bơta tơl pràn bơh tiah he dê hơ̆ sồng ală priă jền hòi jà mpồl bơtiàn tă pơgồp ndai, geh bơta den dong kờl. Ai tàm broă dong kờl do den ờ hềt đơs tus cau do.

Cau cih VOV4- Cau mblàng Lơ Mu K’Yến