VOV4.K’ho- Broă kờñ lơh geh bơh Broă lơh jơnau kờñ dà lơgar bè bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021- 2030 là làng bol ngan ngồn geh dờp bơta kuơ bơh Broă lơh dê mơkung ngui niam bơta pràn, bơta ƀươn bơh tiah he dê; gơhòi gơ jà nùs nhơm pơđơl pràn brồ guh lơh is bơh làng bol dê nàng tiah làng bol jơi bơtiàn kòn cau dùl êt nă cau mờ tiah kơh bơnơm bơtàu tơnguh mhar mờ kơ̆ kơl jăp. Nàng lơh geh jơnau kờñ do, broă hòi jà tă pơgồp priă jền, gơhòi gơ jà bơcri priă lơh jăt Broă lơh geh Quốc hội, Chính phủ sền gròi uă ngan.

Kơrnoat bơh Quốc hội dê sền swì ring bal Broă lơh jơnau kờñ dà lơgar bè bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021- 2030 gĭt nền loh làng, là: hòi jà tă pơgồp jơh ală priă jền bơcri bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm in, tàm hơ̆ priă jền dà lơgar ăt gơnoar broă kuơmàng lơh nền nàng hòi jà tă pơgồp ală priă jền ndai. Do là dùl bơta pa ngan, kuơmàng ngan tài bơh broă dong kờl pal geh priă jền kes priă dà lơgar dê ai. Bơta ndai, ală ƀòn lơgar tiah làng bol jơi bơtiàn kòn cau dùl êt nă cau mờ tiah kơh bơnơm ndrờm là ƀòn lơgar kal ke halà kal ke ngan. Den tàng bè hơ̆, priă jền bơtơl bơh dà lơgar là dùl bơta lơh nền lài ngan nàng lơh geh jơnau kờñ.

Bulah bè hơ̆, tàm tŭ tơngai priă jền bơcri tờm bơh dà lơgar dê gam tìp kal ke tài bơh kòp Covid-19, kờñ pal hòi jà tă pơgồp tai priă jền bơh mpồl bơtiàn dê nàng Broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021- 2030 geh lơh jăt geh cồng nha. Tàm pơrjum dơ̆ sơnrờp Quốc hội khóa XV pa do, mò Bố Thị Xuân Linh- Kuang bàng Quốc hội càr Bình Thuận sồr: Nàng gơtùi lơh jăt ngan ngồn mờ geh cồng nha bơh broă lơh dê, Chính phủ geh broă lơh pal loh làng ai priă jền di tŭ mờ dùl ròt bal jăt gùng dà lơh uă bơnah priă jền bơcri. Tàm hơ̆, priă jền bơcri dà lơgar dê là kuơmàng mờ geh bơta kuơ lơh nền. Lơh pràn gơhòi gơ jà ală bơnah priă jền bơdìh kes priă dà lơgar. Hòi jà bơta tus bal tă pơgồp bơh làng bol dê nàng lơh jăt jơnau kờñ bơh broă lơh dê jăt bơta pal jăt dà lơgar mờ làng bol lơh bal. Mờ tàm tŭ tơngai lam lơh jăt kung gam pal sền gròi bơto pơlam loh làng broă pơgồp bal ală bơnah priă bơcri nàng lơh jăt ală broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau lơh geh cồng nha.  

Broă sơlơ hòi jà tă pơgồp priă jền dunia ai Broă lơh Jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021- 2030 kung geh sền gròi uă ngan. Ngân hàng Dunia tàm Việt Nam neh yal ngan ngồn bè broă Mpồl cau gơnoar cih Kes priă Lơh broă bal Bơto bơtê Gùt plai ù (GPE) lời ai Chính phủ Việt Nam in bơnah priă dong kờl ờ tơm wơl 25 tơlak dolar Mỹ mờ jàu kơnòl ai Ngân hàng Dunia in geh gơ gơs là Đại lý bơh bơnah priă dong kờl do ai Việt Nam in. Ủy ban Jơi bơtiàn kòn cau lơh broă rơndăp lơh pơgồp bal mờ Bộ Kế hoạch mờ Đầu tư, Bộ Tài chính nàng cribơyai mờ Chính phủ dan ai ngui 25 tơlak dolar Mỹ là bơnah priă dong kờl ờ tơm wơl bơh GPE dê, nàng bơtơl gơ gơs jơnau dong kờl ai bơnah priă càn sồr là 150 tơlak dolar Mỹ bơh Ngân hàng Dunia bơtơl ai lam lơh jăt Broă lơh Jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021- 2030.

Bal mờ hơ̆, Thủ tướng Chính phủ pa kĭ Rơndăp broă lơh tơn jŏ tơngai lơh jăt Kơrnoat sồ 2214 bè broă kĭ Rơndăp broă lơh “Sơlơ lơh broă bal dunia dong kờl bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau” tus nam 2025, mờ jơnau kờñ tơrgùm jơh bal là nàng kờñ pơn jăt tai sơlơ lơh broă bal gơhòi gơ jà ală bơnah priă bơcri, jak chài măy mok, mờng chài bơh ală lơgar dê, ală mpồl dunia, mpồl cau, cau dùl nă să is tàm lơgar ndai, dong kờl bơcri priă bơtàu tơnguh lơh sa- mpồl bơtiàn ai tiah làng bol jơi bơtiàn kòn cau dùl êt nă cau mờ tiah kơh bơnơm. Ală broă ai lơh lài bơh Rơndăp broă lơh dê gơ jăt bal mờ tơngume Broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021- 2030.

Mùl màl là bơsong bơta ờ tơl ù ơm, hìu ơm, ù lơh sa, dà ngui sa bơh hìu bơnhă jơi bơtiàn kòn cau dùl êt nă cau dê; bơtàu tơnguh lơh sa sươn sre, brê bơnơm, ngui niam bơta pràn, bơta jak bơh ală kơnhoàl ù tiah ƀòn lơgar dê nàng lơh gơlik phan bơna kă bro jăt ală anih lơh gơlik phan. Bơcri priă lơh phan bơna kờñ pal geh, drơng lơh sa, rài kis tàm tiah làng bol jơi bơtiàn kòn cau dùl êt nă cau mờ ală anih lơh broă dà lơgar bơh gah broă lơh jơi bơtiàn kòn cau dê; bơcri priă bơtàu tơnguh bơto bơtê tiah làng bol jơi bơtiàn kòn cau dùl êt nă cau mờ tiah kơh bơnơm tơnguh uă cồng nha mpồl cau lơh broă là cau jơi bơtiàn kòn cau dùl êt nă cau; bơcri priă kơlôi sơnơng jak chài mờ tàm jàu măy mok tàm ală broă lơh lơh bal lơh sa jăt ală anih lơh gơlik phan. Prăp gàr, ngui niam bơta kuơ niam chài ờs mờng bơh yau niam bơnĕ bơh ală jơi bơtiàn kòn cau dùl êt nă cau dê gơ jăt bal mờ bơtàu tơnguh nhơl chờ; sền gàr pràn kơldang să jan làng bol in, tơnguh bơta dờng pràn să bồ, să jan cau jơi bơtiàn kòn cau dùl êt nă cau dê; rơcăng sơndră bơta rơgai ờ tơl pràn kơnòm dềt; lơh jăt ring bal ùr klau mờ bơsong ală broă jal mhar ngan gơwèt mờ cau ùr mờ kơnòm dềt...

Rơndăp broă lơh lơh ngan tus nam 2025, gơhòi gơ jà uă ngan ală bơta pràn priă jền dunia, kuơmàng là priă dong kờl ờ tơm wơl, priă dong kờl bơtàu tơnguh ngan ngồn mờ priă càn ờ sa priă cồng uă. Hòi jà, gơhòi gơ jà bơcri priă dunia dong kờl bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm jăt tàm jơnau kờñ mờ bơta geh ngan tàm rài kis, bơta pràn mờ bơta ƀươn bơh tơl tiah dê, tơl jơi bơtiàn, tàm bơta pal jăt prăp gàr mờ bơtàu tơnguh ală bơta kuơ, rài kis niam chài is ờs mờng bơh yau niam bơnĕ bơh ală jơi bơtiàn dê, sền gàr tiah ơm kis. Hòi jà dong kờl bơta chài bơh ală mpồl cau, cau dùl nă să is dunia dê dong kờl tơnguh uă bơta pràn jak ai làng bol tiah jơi bơtiàn kòn cau dùl êt nă cau mờ tiah kơh bơnơm in; công chức, viên chức lơh jăt broă lơh jơi bơtiàn kòn cau ală kấp bơh Dà lơgar tus kấp xã.

Cau cih VOV4- Cau mblàng Lơ Mu K’Yến