VOV4.K’ho– Bơta sền ndrờm bal bè khà dong kờl ai jơh ală jơi bơtiàn kòn cau tàm ală bă tiah in là bơta lơh gơbàn tus bơta bơtàu tơnguh ờ ring bal. Tàm tŭ tàm bơta geh ngan, khà kal ke krơi is, jơnau git wă krơi is, bơhiàn ơm kis mờ lơh broă sa kung krơi is sơl. Den tàng bơta bơcri priă hơ̆ ờ gơtùi cèng wơl cồng nha bè kơp kờñ. Bè hơ̆ den tàng, broă lơh lơi bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm là bơta mờ ală anih kơlôi sơnơng jơi bơtiàn kòn cau tơrgùm lam lơh tàm tơngai lài.

Mùl màl git gŏ tàm 2, 3 tiah jơi bơtiàn kòn cau dùl êt nă cau, 1 hìu bơnhă jơi bơtiàn kòn cau dùl êt nă cau geh tŭ geh dờp dong kờl bơh 4 broă lơh krơi is, mơya bơta tờm bơh jơgloh rƀah dê là ù lơh sa mờ jơnau git wă lơh sa den làng bol ờ hềt dờp geh. Bơh lòt sền tiah jơi bơtiàn kòn cau dùl êt nă cau ai gŏ, khà hìu bơnhă rƀah tàm ală nam do gơmù mhar, mơya ờ hềt ngan ngồn kơ̆ kơljap, jơnau pơhìn gơbàn wơl rƀah gam uă ngan, uă hìu bơnhă ờ tơl ù lơh sa, ù ơm, ờ hềt geh ngui dà sàng goh. Tàm 2, 3 tiah, broă lơh dong kờl gơ rơndap rơndồl, ờ git pal tơrgùm lam lơh lài tềng lơi.

Ngai 14/10/2021, Thủ tướng Cíñ phủ neh ai tơlik Broă lơh jơnau kờñ dà lơgar bơtàu tơnguh lơh sa mpồl bơtiàn tiah jơi bơtiàn kòn cau dùl êt nă cau mờ tiah kơh bơnơm tơngai bơh nam 2021 tus nam 2030. Tơngai dơ̆ 1 bơh nam 2021 tus nam 2025 geh lam lơh 10 rơndap broă bơsong bơta ờ tơl ù ơm, hìu ơm, ù lơh sa, dà ngui sa; rơndap ù tiah, sap sèng kơ̆ kơljap làng bol ơm kis; bơtàu tơnguh lơh sa suơn sre brê bơnơm kơ̆ kơljap; bơcri priă bơt bơtàu phan bơna pal geh; bơtàu tơnguh bơto bơtê mờ bơsram, tơnguh bơta niam cau lơh broă prap gàr, bơtàu tơnguh bơta kuơ niam chài, bơhiàn ờs mờng gơ jat bal mờ bơtàu tơnguh nhơl chờ, sền gàr pràn kơldăng să jan ai jơi bơtiàn kòn cau dùl êt nă cau in, lam lơh ring bal ùr klau; bơcri priă bơtàu tơnguh mpồl jơi bơtiàn kòn cau dùl êt nă cau ờ huan geh ngan cau mờ mpồl jơi bơtiàn kòn cau gam kal ke; lòt sền, sền sơ wì, gròi sền broă lam lơh broă lơh.

Jat ồng Bùi Sỹ Lợi, lài do là Phó Kuang atbồ Ủy ƀan bè ală broă mpồl bơtiàn bơh Quôk hội dê đơs, broă lơh jơnau kờñ dà lơgar bơtàu tơnguh lơh sa mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021 tus nam 2030 ai tơlik tàm tŭ bol he gam geh 2 broă lơh jơnau kờñ dà lơgar. Hơ̆ là broă lơh jơnau kờñ dà lơgar bơt bơtàu ƀòn lơgar pa mờ Broă lơh jơnau kờñ dà lơgar tơrmù rƀah kơ̆ kơljap. Bè hơ̆ den tàng kờñ pal sền sơ wì tơn jơh 2 broă lơh do nàng lơh loh ală tơngume bơcri priă ai tiah jơi bơtiàn kòn cau dùl êt nă cau, tiah kơh bơnơm in lơh geh kàr lơi. Gam wơl ală broă tờm lơi mờ ờ hềt gơtùi bơsong den Broă lơh jơnau kờñ dà lơgar bơtàu tơnguh lơh sa, mpồl bơtiàn tiah jơi bơtiàn kòn cau dùl êt nă cau mờ tiah kơh bơnơm pal bơsong. Jat Nghị quyết sồ 88 bơh Quôk hội dê là bơcri priă nàng lơh gơlik broă lơh ai cau jơi bơtiàn kòn cau dùl êt nă cau mờ tiah kơh bơnơm in mờ jơnau kờñ là tơnguh priă lơh geh, tam gơl niam rài kis mờ tơrmù hời rơhời bơta yah ngài đah tiah kơh bơnơm mờ tiah ring. Ồng Bùi Sỹ Lợi đơs nền: “Tàm 10 rơndap broă hơ̆, tŭ do gam đal git mờ dùl khà tŭ tơngai sơn rờp là 50 rbô tơmàn đong ai bơcri bơtàu tơnguh in mờ 54 rbô tơmàn đong ai tă dơ̆ ngui sùm in, den sền tàm khà do loh làng là bol he ờ hềt gròi sền bơcri priă bơtàu tơnguh, mờ gam wèt tus tă dơ̆ ngui ai broă lơh in, den tàng bol he pal kờp dŭ wơl, lơh bè lơi nàng lơh geh jơnau kờñ lơh gơlik broă lơh, lơh gơlik tŭ niam lơh tam gơl jơnau git wă bơh làng bol tiah jơi bơtiàn kòn cau dùl êt nă cau mờ tiah kơh bơnơm dê, geh tŭ niam nàng khi in tus bal tàm broă lơh bơtàu tơnguh lơh sa nàng lơh gơlik tai priă jền.”

Sền gŏ, tơngai lài do geh uă ngan broă lơh dong kờl gơ rềng tus tiah do, mơya geh uă tŭ, tŭ ală broă lơh ờ cèng bơta ring bal, geh tŭ ală broă lơh dong kờl gam gơtìp rơndap rơndồl, ồng Đỗ Văn Sinh, Ủy viên Thường trực Ủy ƀan Kinh tế bơh Quôk hội dê đơs nền tus Nghị quyết sồ 88 bơh Quôk hội dê ring bal Rơndap broă tơrgùm jơh ală bơta bơtàu tơnguh lơh sa mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021 tus nam 2030 cèng bơta tơl làm ngan rlau jơh neh bơsong bơta do. Mờ dilah lam lơh broă lơh jơnau kờñ dà lơgar bơtàu tơnguh lơh sa, mpồl bơtiàh tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021 tus nam 2030 jat di nùs nhơm Nghị quyết sồ 88 bơh Quôk hội dê den geh ală broă lơh dong kờl ring bal mờ bơta pràn tơrgùm nàng bơsong ală broă ai tơlik tiah do in. Ồng Đỗ Văn Sinh đơs: “Tơngai pa do geh ală rơndap broă, broă lơh bơh dà lơgar dê, geh tŭ bơh dà lơgar gam geh uă ƀộ, gah broă lơh ndai, kấp hơ đơm den geh uă sở, gah broă lơh krơi is tai. Jat añ pal tơrgùm tàm dùl gah, bơh hơđang den dà lgar gơtùi jàu dùl Ƀộ in, kấp hơ đơm kung jàu 1 gah in nàng bol he ring bal bơta pràn, nàng lơh bè lơi bol he tơrgùm bơta pràn ai di cau, di broă lơh dong kờl, ờ gơtìp tàm bơrlŭ, ờ gơtìp lời huĭ. Do là broă kuơmàng ngan.”

Tŭ do, ală càr, ƀòn dờng neh lam lơh ală broă lơh dong kờl kòn cau tàm ù tiah he dê, gàr niam broă lơh dong kờl tus mờ làng bol kòn cau geh mhar ngan rlau jơh mờ geh cồng nha ngan rlau jơh, bơt bơtàu broă rơndap lơh tam pà priă bơcri, kơ cế lam lơh lài gơ wèt tus mờ ală tiah lam lơh broă lơh jơnau kờñ dà lơgar. Ồng Dương Văn Hào, Phó Củ tịc Ủy ban Ñân Zân kơnhoàl Võ Nhai, càr Thái Nguyên đơs: “Bơh ală broă lơh dong kờl hơ̆, neh lơh gơlik cồng nha ngan ngồn tàm rài kis làng bol dê. Mùl màl là jơnau git wă làng bol dê neh geh tơnguh, bơdìh hơ̆ tai, broă bơtàu tơnguh lơh sa kung geh uă tam gơl, broă kă bro phan bơna đah ală tiah kung niam rlau sơl.”

Tàm tŭ tơngai kòp Kovid-19 gơlik geh kal ke, jŏ jòng mờ kes priă den ờ huan geh, Cíñ phủ ai lơh lài ală jơnau kờñ kuơmàng, tơrgùm tàm ală tiah geh broă lơh sa uă kal ke mờ bơsong broă jal mhar ngan rlau jơh bơh làng bol jơi bơtiàn kòn cau dùl êt nă cau dê.

Cau mblàng K’Duẩn