VOV4.K’ho - Kờp tus tàm nggùl nhai 9 pa do, càr Kon Tum neh tam pa geh rơlao 3 rơbô 600 lồ brê. Do là broă lơh sơnrờp kuơ màng ngan nàng càr Kon Tum lơh geh cồng nha Nghị quyết Pơrjum dờng Đảng bộ càr dơ̆ 16 tus nam 2025 tam pa geh 15 rơbô lồ brê. Mùl màl pà gŏ broă lơh jăt geh cồng nha broă tơm priă sền gàr tiah kis brê gam pơgồp bal ai geh bơta pràn nàng broă sền gàr mờ tơnguh bơtàu brê bơh làng bol càr Kon Tum

Xã gơtìp kal ke Đăk Pxi, kơnhoàl Đăk Hà geh 5 mpồl bơtiàn dờp sền gàr brê bơh Mpồl atbồ brê rơcang gàr tô dà kơnhoàl Đăk Hà dê. Nam pa do ală mpồl bơtiàn do dờp geh kờp jơh di pơgăp 3 tơmàn 900 tơlăk đong priă sền gàr tiah kis brê. Gơwèt mờ dùl xã mờ rài kis làng bol gam uă kal ke bè Đăk Pxi, den do là dùl khà priă uă ngan. Bal mờ bơta kuơ tơnguh rài kis broă lơh sa mờ priă tơm sền gàr tiah kis brê cèng geh ai làng bol in, broă geh priă bơh brê neh lơh làng bol in geh tai bơta pràn nàng atbồ sền gàr brê. Ồng A Sáo, kis tàm ƀòn Kon Pao Kla, pà git: “Làng bol sùm lòt sền gròi, sền gàr brê, kàl mìu dùl nhai bơh 2 dơ̆ tus 3 dơ̆. Kàl prang làng bol lòt dùl nhai 4 dơ̆ lòt sền gròi nàng rơcang tàm broă crùh ồs sa brê mờ kơrian ală cau mus kơl ờ di mờ adăt boh lam phan bơna tàm brê , bè dơm chi mờ phan kis tàm brê. Khà priă bơh làng bol geh dờp jăt ngai lơh broă. Dùl nă là 200 rơbô tàm 1 ngai. Xăng rơndeh mpồl atbồ sền gàr brê tă tơl priă xăng drơng ai làng bol in lòt. Rê tàm hìu làng bol geh dờp tàm hìu tai”.

Sền gŏ geh bơta kuơ mờ brê cèng wơl ai rài kis in, nam 2017 bơh broă lam sồr bơh gơnoar atbồ xã Đăk Ui, kơnhoàl Đăk Hà dê, làng bol kis tàm 2 ƀòn tàm xã là Kon Bông mờ Kon Năng Triang neh lơh ngan tam wơl brê tàm bă ù dòr ờ geh chi hòn. Tus tŭ do, tềng đăp mờ broă sơnka, sền gàr bơh làng bol, 30 lồ brê nho 3 nha tam pơgăp mờ do 4 nam neh mờr tơl khà nàng geh dờp priă tơm priă sền gàr tiah kis brê. Bơdìh hơ̆ tai, bơta kuơ bơh broă còr cài nho mờ kă bro dơm chi nho dờng tàm bă ù tam brê nho do kung cèng geh uă priă nàng làng bol in tàm tơnơ̆ do. Ồng A Bế, kis tàm ƀòn Kon Mriang, xã Đăk Ui pà git, cồng nha bơh broă sền gàr brê mờ tam brê neh dong kờl tơn jơh tơn broă làng bol tàm xã mus kơl chi brê lơh mìr: “Lài do, làng bol geh mus brê mơya bơh tŭ geh gùng dà broă lơh den brê do là làng bol ờ geh mus tai. Làng bol pin dờn jăt gùng dà tơnguh bơtàu brê den tàng làng bol lơh jăt bal. Làng bol wă gùng dà broă lơh, lơh geh priă den tàng ờ kal ke. Lài do geh mơya tŭ do neh jơh ờ geh tai. Mìng is xã Đăk Ui ờ geh mus brê tai”.

Lơh jăt jơnau kờñ tam pa 15 rơbô lồ brê mờ Nghị quyết Pơrjum dờng Đảng bộ càr Kon Tum dơ̆ 16, tơngai lơh broă bơh nam 2020 tus 2025 neh geh ai, tus jơh tàm nggùl nhai 9 pa do, gùt càr Kon Tum neh tam pa geh rơlao 3 rơbô 600 lồ brê, sơrlèt rơlao 600 lồ pơn drờm mờ rơndăp broă neh geh ai tàm nam do. Kờñ tam geh brê, gơnoar atbồ ală kơnhoàl, ƀòn dờng tàm càr Kon Tum neh lam sồr làng bol tam wơl brê gơwèt mờ bă ù dòr ờ geh chi che hòn, bă ù tam bùm blàng, lơh kòi ờ geh cồng nha; bơyai lơh dong kờl sơntìl, ngai lơh broă, bơto sồr kỹ thuật làng bol in; hòi jà bơta pràn bơh mpồl ling, kuang bàng, công chức, viên chức, cau lơh broă... tus bal tam brê. Ồng Nguyễn Văn Tiến, Phó kuang atbồ Chi cục sền gàr brê càr Kon Tum pà git, uă broă lơh kung neh geh lơh nàng làng bol geh tai nùs nhơm pin dờn bè cồng nha broă mlơh sa tŭ tus bal tàm broă tam brê: “Làng bol tŭ tus bal tàm broă tam brê, tơnơ̆ do geh dờp ală broă dong kờl, bè broă lơh drơng ala tiah kis brê. Brê làng bol tam is tơnơ̆ do geh dờp 100%. Chi cục sền gàr brê neh pơlam ală cấp, gơnoar atbồ chồl mhar broă lơh ală hìu lơh phan geh bơh brê nàng tăc dơm chi brê tam nàng tơnguh uă khà priă nàng làng bol tŭ tam brê geh dờp bơta kuơ”.

Cau cih Khoa Điềm-Cau mblàng Ndong Brawl