VOV4.K’ho - Tàm càr Kon Tum, bal mờ broă lơh ngan bơh gơnoar atbồ, gah lơh broă geh gơnoar tàm broă atbồ sền gàr brê, den cồng nha broă lơh sa geh bơh broă lơh jăt broă tơm priă sền gàr tiah kis brê gam pơgồp bal nàng brê gơguh mờ tơnguh bơtàu kơl jăp.

Lòt gan mờ ală bă ù ờ geh chi hòn duh bè ồs tàm tŭ trồ tơngai duh lồi kàl prang, bol añ tă nhơm dờng tŭ geh ntào tàm tiah mƀur bơh ală tờm nho pe nha tam neh 7 nam. Bi Giáp Văn Thạch, Kuang atbồ anih sền gàr brê Đăk Ruồng, gơwèt Công ty TNHH MTV lâm nghiệp Kon Rẫy pà gĭt, brê nho do geh bă ù ơnàng mờr 200 lồ. Hơ̆ sồng bi cong tê tus tàm bă brê mpờl bơh ngài, bi Thạch yal tai, hơ̆ là rơlao 400 lồ brê nho pe nha tam neh 5 nam bơh Công ty dê. Jơh rơlao 600 lồ brê nho 5 mờ 7 nam do ndrờm geh Công ty tam bơh khà priă tam brê ala, bơh Kes priă sền gàr mờ tơnguh bơtàu brê càr Kon Tum.

Mùl màl pà gŏ, tòm nho geh hòn gơs niam: “Tus tŭ do, den tòm nho do gơdờp mờ bă ù tàm tiah do. Bơta hòn gơs niam tàm bă ù tam brê tŭ do là 1 rơbô 100 tòm tàm 1 lồ. Tòm nho do hòn gơs niam, tơnguh bơtàu niam rơlao pơn drờm mờ ală bơta tòm chi brê ndai”.

Nàng geh rơlao 600 lồ tòm nho pe nha hòn gơs tơlir niam bè tŭ do, Công ty TNHH MTV lâm nghiệp Kon Rẫy neh lơh ngan lam sồr mờ dờp geh nùs nhơm kờñ bal uă ngan bơh làng bol kis tàm xã Đăk Kôi, kơnhoàl Kon Rẫy dê. Mùl màl pà gŏ, jơh ală bă ù tam nho ndrờm là ù brê ờ gơtùi hòn wơl tai ha là ù làng bol gam lơh sa mơya cồng nha ờ geh uă. Ồng Lê Viết Bẩy, Chủ tịch Công ty TNHH MTV lâm nghiệp Kon Rẫy pà gĭt, tus tŭ do, bă brê nho do neh jơh tơngai pa dờng, Công ty gam pơn jăt tai lơh jăt ală broă lơh bè sơndră mờ ồs sa, crùh ồs sa, atbồ sền gàr; mus pès chi che lơh gùng sền gàr...

Bơta chờ ngan là bă brê mờr 200 lồ tam bơh nam 2014 pah nam neh dờp geh priă sền gàr tiah kis brê mờ cèng geh uă ngan bơta kuơ mùl màl: “Jơh bă brê tam ala nam 2014 neh geh dờp priă bơh broă sền gàr tiah kis brê dê. Dùl bơnah bă brê tam bơh nam 2016 geh tơl niam nàng ai tàm broă dờp priă sền gàr tiah kis brê. Lài ngan bè broă lơh sa den neh tìm tơlir geh jơh bă ù lài do ờ geh chi hòn, ờ geh bơta pràn nàng lơh gơs brê wơl. Dơ̆ bàr là dùl bơnah geh priă bơh broă sền gàr tiah kis brê ai Công ty in. Dơ̆ pe là cèng geh bơta kuơ mùl màl bè tiah kis sinh thái kung bè ai geh broă lơh làng bol kis bơh yau tàm do in bơh broă tam brê, broă sền gàr brê pah nam kung là broă rơcang sơndră mờ ồs sa brê mờ jào sền gàr brê ai làng bol in”.

Tŭ do, bal mờ broă atbồ sền gàr niam rơlao 600 rơbô lồ brê geh tŭ do, kung gam geh dùl bơta pràn pa tàm boă atbồ sền gàr mờ tơnguh bơtàu brê tàm càr Kon Tum. Bồ nam do, UBND càr Kon Tum neh jào bă ù tam brê mùl màl ai tơl kơnhoàl in mờ broă lơh ngan tam pa geh 3 rơbô lồ brê tàm kàl mìu.

Ồng Nguyễn Tiến Dũng, Phó Chủ tịch UBND kơnhoàl Ia H’Drai pà gĭt, gơnoar atbồ kơnhoàl neh rơcang mờ nền nòn lơh jăt jơnau đơng lam tam pà 200 lồ brê bơh càr jào: “UBND càr jào ai kơnhoàl Ia H’ Drai tơngai bơh nam 2021 tus 2025 jào ai bol añ in 1 rơbô 400 lồ. Tàm hơ̆ nam 2021 geh tam 200 lồ. Jăt nùs nhơm kơlôi, khà do kung ndrờm bal mờ khà sồr jào, gơnoar atbồ kơnhoàl pal lơh jăt lơh jăt mờ pal sơrlèt mờ khà rơndăp broă neh geh ai. Broă tơnguh bơtàu brê là dùl kơnòl geh cấp ủy, gơnoar atbồ kơnhoàl Ia H’ Drai sền gròi ngan”.

Gam gơwèt mờ Kes priă sền gàr mờ tơnguh bơtàu brê càr Kon Tum kung ai tơlĭk kơnòl tờm tàm quý II là geh bơ̆t bơtàu rơndăp broă, pơgồp bal mờ Sở NN mờ PTNT càr Kon Tum, ală UBND kơnhoàl lơh jăt broă sền gròi broă atbồ, ngui priă sền gàr tiah kis brê gơwèt mờ ală cau tờm brê là mpồl lơh broă, ală UBND xã, thị trấn tàm càr. Mờ sùm sền gròi ală mpồl pa geh broă ngui priă sền gàr tiah kis brê nàng lơh rơndăp broă, lơh broă bal, cri bơyai nàng lơh broă tơm priă sền gàr tiah kis brê nàng tơrgùm di tŭ priă sền gàr tiah kis brê. Bè ală broă lơh mùl màl nàng lơh jăt kơnòl quý II mờ gùt nam 2021, ồng Hồ Thanh Hoàng, Kuang atbồ Kes priă sền gàr brê mờ tơnguh bơtàu brê càr Kon Tum pà gĭt, bal mờ broă lam sồr, mpồl lơh broă do geh pơn jăt tai sền wơl, cri bơyai, lơh broă bal nàng geh tơm priă sền gàr tiah kis brê mờ ală mpồl ngui broă tơm priă sền gàr tiah kis brê. “Nàng tơnguh geh cồng nha broă tờm priă sền gàr tiah kis brê pơgồp bal tàm broă sền gàr mờ tơnguh bơtàu brê tàm càr Kon Tum bè tơnơ̆ do: Pơn jăt tai lơh jăt broă lam sồr nàng tơnguh uă jơnau gĭt wă jrô ơnàng tus mờ ală cấp, gơnoar atbồ ală tiah, mpồl ƀòn mờ làng bol kis tàm càr bè jơnau gĭt wă, kơnòl tàm broă lơh jăt ală kơrnoăt tàm adăt boh lam bè broă atbồ sền gàr brê đơs bal mờ broă tơm priă sền gàr tiah kis brê đơs is mờ uă broă lơh. Pơn jăt tai sền wơl, cri bơyai, lơh boă bal nàng geh tơm priă sền gàr tiah kis brê mờ ală mpồl lơh broă ngui broă sền gàr tiah kis brê; bơto sồr, lam sồr ală mpồl ngui broă sền gàr tiah kis brê lơh jăt nền nòn kơnòl tàm broă yal, jào priă sền gàr tiah kis brê nàng hòi jà uă ngan priă geh bơh broă sền gàr tiah kis brê dê”.

Nghị quyết pơrjum dờng Đảng bộ càr Kon Tum dơ̆ 16 neh ai tơlĭk tơngu me tus nam 2025 geh tam pa 15 rơbô lồ brê. Gơtùi gŏ dùl tơngai pa tàm broă atbồ sền gàr mờ tơnguh bơtàu brê kơl jăp tàm càr Kon Tum neh geh mŭt lơh mờ nùs nhơm lơh ngan uă.

Cau mblàng Ndong Brawl