VOV4.K’ho- Lơh jăt Kơrnoat bơh Thủ tướng Chính phủ dê, Bộ Kuang àng gam lam lơh broă lơh sră căn cước làng bol crăp chíp ai làng bol tàm làm gùt lơgar in. Căn cước làng bol ala ai sră kim ta làng bol ngui nàng lơh ală broă tàm ù tiah dà lơgar Việt Nam.

Bơh tŭ do tus ngai 01/7/2021, lơh ngan lơh sir broă lơh 50 tơlak sră căn cước làng bol geh crăp chíp, nàng kờñ tơnguh uă cồng nha broă lơh ătbồ dà lơgar bè căn cước làng bol, ai tơl bơta ƀươn ai làng bol in tàm tŭ lơh sră nggal mờ ală broă lơh làng bol; wèt tus bơ̆t bơtàu Chính phủ điện tử, lơh gơlik bơta tam gơl sơrbac mhar tàm bơtàu tơnguh lơh sa- mpồl bơtiàn bơh jơh gùt lơgar dê; pơgồp bơnah drơng geh cồng nha broă lơh tam dră, rơcăng sơndră cau lơh tìs.

Bè hơ̆, bè lơi là căn cước làng bol? Sră nggal lơh sră căn cước làng bol lơh bè lơi? Anih lơh broă lơi geh gơnăp gơnoar lơh sră căn cước làng bol? Làng bol lơi geh gơnoar mờ kơnòl gơwèt mờ sră căn cước làng bol? Mờ ñchi bơh tài pal lơh sră căn cước làng bol geh crăp chíp lài mờ ngai 01/7/2021.

Căn cước làng bol là dùl tàm ală bơta sră pơ àr gơ jăt tàm să jan tờm ngan bơh làng bol Việt Nam dê. Do là broă lơh pa bơh sră kim ta làng bol dê, sơnđờm lơh mờ geh ai ngui bơh nam 2016. Jăt Adat Căn cước làng bol nam 2014, cau bơh 14 sơnam rlau hơđang geh lơh sră căn cước làng bol.

Căn cước làng bol geh bơta kuơ tơngŏ bè căn cước, rài kis bơh làng bol dê bơh cau geh lơh sră căn cước dê nàng lơh ală broă lơh sră pơ àr tàm làm gùt lơgar Việt Nam, gơtùi geh ngui ala sră lòt rê mờ lơgar ndai tàm tŭ dilah Việt Nam mờ dùl lơgar ndai geh jơnau hơ halà jơnau ring bal dunia ai gơnoar làng bol 2 gah dê ngui sră căn cước làng bol ala ai broă ngui sră lòt rê mờ lơgar ndai.

Nam 2016, Việt Nam sơnđờm tam gơl sră kim ta làng bol mờ sră căn cước làng bol mã vạch. Tus bồ nam 2021, sră căn cước làng bol mã vạch pơn jăt tai geh ala mờ sră căn cước làng bol crăp chíp tàm làm gùt lơgar. Tàm sră căn cước làng bol crăp chíp tŭ do geh 12 nơm sồ. Sồ bơh sră căn cước làng bol dê hơ̆ là sồ đal gĭt muh măt cau dùl nă să is dê. Jăt Bơta 13 bơh Kơrnoat sồ 137 nam 2015 bơh Chính phủ dê, sèng sồ do geh 12 nơm sồ, geh rơndăp tăp sèng geh 06 sồ, tàm hơ̆ 03 nơm sồ bơh sơnrờp là mã càr, ƀòn dờng gơwèt dà lơgar halà mã dà lơgar tiah làng bol lơh sră cih mat ngai deh; 01 nơm sồ pơn jăt tai là mã rài deh mờ mã cau klau halà cau ùr; 02 nơm sồ pơn jăt tai là mã nam deh bơh làng bol dê mờ 06 nơm sồ lồi dŭt là pơgăp sồ nisơna.

Pơnyơu bè: sồ căn cước làng bol là: 037153000257, den:

Sồ 037 là mã càr Ninh Bình

Sồ 1 tơngŏ cau là cau Ùr, deh tàm rài 20

Sồ 53 tơngŏ làng bol deh nam 1953

Sồ 000257 là sèng sồ nisơna. Mã sồ tàm sră căn cước làng bol ờ gŏ tŭ lơi tam gơl, kờp bal làng bol geh lơh wơl tài bơh roh, halà tam gơl jơnau yal tàm sră cih mat tiah ơm kis mờ cau tàm hìu bơnhă (hơ̆ là sră hộ khẩu).

Tŭ do, kờp bal mờ sră căn cước làng bol crăp chíp den gam geh 4 bơta sră pơ àr cau dùl nă să is geh ai ngui ndrờm gơ̆p bal, hơ̆ là sră kim ta làng bol mờ pơ àr 9 nơm sồ, Sră kim ta làng bol mờ pơ àr 12 nơm sồ, sră căn cước làng bol mã vạch mờ sră căn cước làng bol geh crăp chíp. Jăt jơnau cih bơh Kơrnoat boh lam dê, den sră kim ta làng bol 9 nơm sồ geh tơngai ai ngui 15 nam kờp bơh ngai lơh, ai sră căn cước làng bol den pal geh tam gơl tŭ làng bol tơl 25 sơnam, 40 sơnam mờ 60 sơnam. Dilah sră kim ta làng bol, căn cước làng bol kung gam tơngai ai ngui sơl den làng bol kung gam gơtùi pơn jăt tai ngui sơl. Lơgar he gam wèt tus broă jơh gùt làng bol ngui ring bal dùl bơta sră pơ àr là sră căn cước làng bol crăp chíp. Hơ jơnau lùp bè broă làng bol pal rê di anih he lơh sră cih măt tiah ơm kis mờ cau tàm hìu bơnhă nàng lơh sră nggal tam gơl sră căn cước làng bol geh crăp chíp halà ờ? Thượng tá Tô Anh Dũng, Kuang ătbồ Anih tờm dữ liệu dà lơgar bè làng bol ơm kis, gơwèt Bộ Kuang àng, pà gĭt: Tŭ do, Bộ Kuang àng gam sồr Kuang àng 63 càr mờ ƀòn dờng bè broă lơh sră căn cước làng bol geh crăp chíp điện tử ai làng bol ơm kis ing in. Làng bol gơtùi lơm lòt tus anih rềp ngan rlau jơh làng lơh sră căn cước làng bol mờ ờ duh pal rê hờ anih lơh sră cih mat tiah ơm kis mờ cau tàm hìu bơnhă.

Cau lơi geh ai lơh lài taih?

Bộ Kuang àng gam sồr jơh ală làng bol lòt lơh tàm dơ̆ do tài bơh sră căn cước làng bol geh crăp chíp điện tử geh drơng ală broă lơh wèt tus tơrmù sră nggal dà lơgar, mờ jơnau kờñ bơh Bộ Kuang àng dê là nàng drơng làng bol in geh lơh broă mhar ngan rlau jơh mờ gơmù geh ală sră pơ àr ờ duh kờñ pal geh.

Dilah dùl nă làng bol pa lơh sră căn cước làng bol mã vạch den geh pal lòt lơh wơl sră căn cước làng bol geh crăp chíp halà ờ?

Sră kim ta làng bol halà sră căn cước 12 sồ lài do den kung gam gơtùi ngui sơl tŭ gam tơngai ai ngui.

Ñchi gơlơh Kuang àng ală càr, ƀòn dờng pal lơh gơ jăt gơ jal dơ̆ do, lơh ngai lơh mang bal bè hơ̆ taih?

Jơnau kờñ bơh Bộ Kuang àng dê là lơh ngan lơh 50 tơlak sră căn cước làng bol geh crăp chíp điện tử tus ngai 01/7/2021. Bè bol he gĭt, den ngai 01/7/2021 den Adat Ơm kis geh ai ngui mờ ală broă lơh broă làng bol dê gơ sồr pal tơrmù ală sră pơ àr dà lơgar. Tơnơ̆ ngai 01/7/2021, Bộ Kuang àng geh tàm tơrbŏ tam pà bal mờ ală Bộ, gah sơnah lơh broă dà lơgar, ngan den tàng bè hơ̆ nàng drơng niam ngan rlau jơh bè Chính phủ điện tử, wèt tus Chính phủ sồ mờ rài lơh sa sồ den Bộ Kuang àng neh sồr Kuang àng 63 càr mờ ƀòn dờng sơlơ tơnguh mhar lơh sră căn cước làng bol crăp chíp điện tử bơh tŭ do tus ngai 01/7/2021 nàng drơng làng bol in.

Cau cih VOV4- Cau mblàng Lơ Mu K’Yến