VOV4.K’ho - Kờ` pơgồp bal tàm broă prăp gàr mờ ngui bơta niam chài rơgơi cing mồng Tây Nguyên, drim òr (28/5), Sở Văn hoá, Thể thao mờ Du lịch càr Dak Lak bơyai lơh pờ ơdu\ bơto dròng cing mồng nam 2018 tàm kơnhoàl Cư\ Kuin.

Tus bal ơdu\ bơsram geh 40 nă klao pơnu, kơnòm pa tào là kòn cau Rơđê, mìng tus bơh 2 xã Ea Ktur mờ Ea Tiêu, kơnhoàl Cư\ Kuin. Tàm ơdu\ bơsram, ală klao pơnu bal mờ kơnòm pa tào geh ală cau chài dròng cing bơto ờ uă jơnau tòm bè cing mồng bal mờ bơto dròng ală săp dròng cing.

Ơdu\ bơsram dròng cing mồng là broă lơh geh tàm broă lơh jăt Nghị quyết bơh Hội đồng Nhân dân càr Dak Lak ai bè broă “Ptrăp gàr mờ ngui niam phan lời wơl tềl kah yau chài rơgơi cing mồng càr Dak Lak tơngai bơh nam 2016 tus 2020”.

Bơh ơdu\ bơsram do, kờ` tơnguh broă bơsram mờ ngui cing mồng, tàm hơ\ uă ngan là tus mờ rơnàng kơnòm să, mờ pơgồp bal tàm broă prăp gàr mờ ngui bơta niam chài rơgơi bơh cing mồng Tây Nguyên dê.

Cau mblàng Ndong Brawl