VOV4.K’ho- Tài gơrềng bơh kòp Covid-19, uă mpồl lơh sa kă bro gơtìp kal ke mờ pal ơm ing lơh broă, koh tơmù cau lơh broă, geh tŭ gơtìp ờ gơtùi lơh broă, lơh pơn jăt mờ hơ̆ là ală cau lơh broă tàm càr Dak Lak kung roh broă lơh mờ priă geh. Kờñ ală cau do tơmù bal kal ke, càr Dak lak ai geh bơta buơn nàng ală cau lơh broă geh dờp broă dong kờl ờ geh broă lơh di pal.

Tê cèng sră lòt tus Anih drơng ala broă lơh càr Dak Lak nàng lơh sră dan geh dờp dong kờl ờ geh broă lơh, mờ kơ̆p kờñ jòi geh broă lơh pa, bi Trương Đức Dũng, kis tàm gùng Đào Duy Từ, sơnah ƀòn Thành Công, ƀòn dờng Buôn Ma Thuột pà gĭt: lài do bi lơh công nhân mờ priă geh di pơgăp 6 tơlăk đong tàm 1 nhai. Ală broă gơrềng ờ niam bơh dơ̆ kòp Covid-19 bơh nam 2020 mờ dơ̆ gơtìp kòp tŭ do neh lơh Công ty ờ gơtùi lơh broă tơn. Lài mờ tŭ jòi geh broă lơh pa, rài kis hìu nhă gơrềng uă ngan tàm khà priă bảo hiểm roh broă lơh mờ bi geh dờp: “Tàm tơngai kòp gơtờp bơh nam lài tus tu do den mpồl lơh sa kă bro geh tơngŏ gơmù mờ ờ gơtùi tui ơnòng jai den tàng pal tơn jơh lơh broă tàm nam do. Añ kung kơ̆p kờ jòi geh broă lơh pa ring niam rơlao tàm rài kis”.

Cau lơh broă tàm Anih drơng broă lơh dong kờl cau roh broă lơh tus lơh sră dờp dong kờl roh broă lơh

Kung roh broă lơh mờ pa rê bơh càr Khánh Hoà, bi Nguyễn Vũ Bốn, kis tàm ƀòn 6, xã Ea Bhôk, kơnhoàl Cư̆ Kuiñ kung neh jal mhar lòt lơh sră dan geh dờp dong kờl roh broă lơh sơl. Bi Bốn pà gĭt, bi neh geh cau lơh broă tàm Anih drơng ala broă lơh càr Dak lak bơto sồr nền nòn ngan bè broă lơh sră nggal mờ mhar dờp geh khà priă dong kờl roh broă lơh rơlao 2 tơlăk đong tàm 1 nhai. Bi Bốn đơs là, bŭ lah khà priă do ờ uă rơlao ngan pơn drờm mờ priă nhai bi geh, mơya kung gam pơgồp bal tàm broă dong kờl hìu nhă bi sơrlèt mờ kal ke: “Tàm tŭ gơtìp kòp gơtờp bè do, ờ hềt geh broă lơh pa den bảo hiểm roh broă lơh kung geh bơrkờl đao bơnah lơi. Tàm tơngai tus, añ kung kờñ jòi geh broă lơh rềp mờ hìu, rềp ƀòn lơgar”.

Ồng Nguyễn Văn Cường, Phó kuang atbồ Anih drơng ala broă lơh gơwèt Sở Lao động – Thương binh mờ Xã hội càr Dak Lak pà gĭt, tàm 5 nhai sơnrờp nam 2021, càr Dak lak neh geh 3 rơbô 365 nă cau jào sră dan bơsong broă dong kờl roh broă lơh. Mìng is nhai 5 geh rơlao 1 rơbô pang sră, gơguh 15% pơn drờm mờ nhai lài. Tàm hơ̆, khà cau lơh broă bơdìh càr jào sră dan dong kờl roh broă lơh geh tus 70%. Tŭ do neh geh mờr 3 rơbô nă cau geh kơrnoăt geh dờp dong kờl roh broă lơh mờ khà priă rơlao 45 tơmàn đong.

Broă mờ broă bơsong tơm broă dong kờl roh broă lơh, nàng dong kờl cau lơh broă ring niam rài kis, Anih do gam bơto pơlam, yal broă lơh, dong kờl bơsram broă lơh. Kơnờm mờ hơ̆, tàm nhai 5 neh geh 89 nă cau gam dờp priă dong kờl roh broă lơh geh bơsram broă lơh di jăt mờ kơrnoăt geh ai, mờ khà priă dong kờl mờr 400 tơlăk đong. Anih do kung geh uă broă lơh bơto pơlam broă lơh, pơgồp bal mờ mpồl lơh sa kă bro nàng dong kờl ală cau lơh broă gờñ jòi wơl geh broă lơh. Ồng Nguyễn Văn Cường pà gĭt: “Bè broă yal broă lơh tŭ gơtìp kòp lơh aniai uă ngan tus mờ ală broă lơh bè bơyai lơh ală dơ̆ cri bơyai broă lơh ală broă lơh tơrgùm gal cau là anih do ờ gơtùi bơyai lơh. Anih do mìng geh tơrgùm bơto pơlam bơh điện thoại ha là website, facebook. Anih do geh lơh broă bal mờ mpồl lơh sa kă bro, lơh broă bal mờ cau lơh broă nàng pơgồp bal bơh tàm điện thoại ha là jào sră tơn”.

Broă dong kờl bơsong ală sră nggal roh broă lơh di tŭ bơh ală anih lơh broă geh gơnoar càr Dak Lak neh bơnah lơi dong kờl cau lơh broă gơtìp roh broă lơh tài gơrềng bơh kòp Covid-19 in iang nùs, sơrlèt ing mờ kal ke tŭ gam kơ̆p geh bơta niam pa.

Cau cih Nam Trang-Cau mblàng Ndong Brawl