VOV4.K’ho - Ai càn pria\ bơh broa\ lơh dong kờl mpồl bơtìan neh dong  ai tus rlau  95 rbô hìu   nha\ kòn cau tàm càr Gia Lai lik klàs rbah. Hơ\ la cồng nha mpờl go\ ngan geh ai tơlik tàm dơ\ pơrjum tơnjơh 10 nam mut lơh broa\ lơh ai càn pria\ mpồl bơtìan tus mờ làng bol kòn cau  bơh UBND càr Gia Lai bơyai lơh. 10 nam do,  neh geh rlau 203 rbô hìu nha\ kòn cau tàm Gia Lai geh càn pria\ mờ pria\ cồng êt  kờp pria\ càn geh tus mờr 3.500 tơmàn pria\.

Khà pria\ do neh dong làng bol kòn cau  geh pria\ nàng bơcri tàm lơh sa ka\ bro, bơtàu tơngguh rài kis. Mơ kung neh  dong mờr 10 rbô hìu nha\ rbah lơh geh hìu ơm, pơ gồp bal jơh hìu ing, lơh geh  broa\ lơh dà lơgar bè tơmù rbah, bơt bơtàu [òn lơgar pa tàm càr.

                                    Cau mblàng K’ Brọp