VOV4.K’ho- Iăt jơnau đơng lam bơh Thủ tướng Chính phủ, tơngu me bơto sồr bơh ală bộ, gah lơh broă dà lơgar, tơnơ̆ mờ tŭ tơn jơh dơ̆ lam sồr broă lơh “Gùng jun internet mờ măi vi tính oh in” ngai 12 nhai 09, Chủ tịch UBND càr Lâm Đồng ồng Trần Văn Hiệp neh đơng lam, bơto sồr ală sở, gah lơh broă, mpồl lơh broă tàm càr do pơgồp bal ai broă lơh, lơh rơndăp broă mùl màl lơh jăt.

Càr geh crơng gơs Mpồl đơng lam nàng hòi jà, lam sồr ală bơta pràn bơh gơnoar atbồ ală tiah, mpồl lơh sa kă bro, mpồl lơh broă, làng bol tàm càr tus bal dong kờl kes priă mờ priă ngan ha là tă măi vi tính, tềng đăp măt là tàm ală tiah tàm càr gơtìp kal ke, tiah ờ hềt geh sóng, kơnòm bơsram, cau bơsram dờng gơwèt hìu rơƀah, ndrờm mờ rơƀah. Sở Thông tin mờ Truyền thông pơgồp bal mờ Sở Giáo dục mờ Đào tạo sền wơl ală tiah tàm tiah ngài; ală hìu rơƀah, ndrờm mờ rơƀah nàng tơlik khà măt ală kơnòm bơsram ờ hềt geh măi vi tính, phan bơsram tàm internet.

Cau mblàng Ndong Brawl