VOV4.K’ho - Ală nam pa do, broă tơmù rơƀah kơl jăp tàm ală kơnhoàl tiah kơh bơnơm càr Quảng nam geh uă cồng nha niam. Jăt mờ hơ̆, rài kis bơh làng bol tàm tiah kòn cau geh tơnguh loh làng; làng bol geh tìp niam rơlao ală broă dong kờl, khà dong kờl bơh dà lơgar nàng tơnguh bơtàu broă lơh sa, ai broă lơh, tơnguh priă geh. Tŭ do, uă hìu rơƀah là làng bol kòn cau neh tam gơl bồ tơngoh kơlôi sơnơng, broă lơh, brồ guh lơh pas di pal.

Lài do, hìu nhă l ŏ A Lăng Dy, kis tàm ƀòn Pà Ong, xã Cà Dy kơnhoàl tiah kơh bơnơm Nam Giang, càr Quảng Nam gơwèt hìu rơƀah. Jơh ală cau tàm hìu lŏ kis kơnờm tàm broă lơh mìr, tam bơrlŭ bal khoah, tơngời, rài kis sùm ờ tơl sa. Lồi nam 2010, bơh tàm khà priă càn 30 tơlăk đong bơh Ngân hàng chính sách xã hội mờ ală khà priă geh bơh tàm broă pơh pơgồp bal ndai, lŏ A Lăng Dy neh bơcri priă lơh wàng mờ blơi 10 nơm jơrke nàng ròng.

               Càr Quảng Nam geh uă broă lơh geh cồng nha tàm broă tơmù rơƀah kơl jăp tiah kơh bơnơm

Kơnờm mờ broă geh bơsram bè broă ròng den tàng jơrke bơh hìu nhă lŏ dờng mhar, ờ gơtìp kòp gơtờp. Broă ròng jơrke geh ƀuơn niam, lŏ A Lăng Dy pờ ơnàng broă ròng kơnrồ mờ gĭt nđờ rơhiang nơm iar, pơgồp bal tàm broă tam 10 lồ tờm keo mờ tờm pơnăt thái. Lŏ Dy kờp, pah nam geh priă cồng rơlao 200 tơlăk đong bơh ală broă lơh sa, ròng phan; kơnờm mờ tam tờm keo, ròng kơnrồ, iar den tàng neh dong kờl hìu nhă lŏ klàs mờ jơgloh rơƀah: “Lài do càn priă geh 2 nam bloh, càn priă blơi kơnrồ mờ tam tờm pơnăt, añ gŏ kung geh niam bloh”.

Nàng ai tơl bơta niam làng bol in geh tơnguh bơtàu broă lơh sa, tơnguh uă priă geh lơh, cấp ủy, gơnoar atbồ kơnhoàl tiah kơh bơnơm Nam Giang neh geh uă broă lơh pràn tàm broă tơmù rơƀah kơl jăp. Kơnhoàl neh bơ̆t bơtàu rơndăp broă tơnguh bơtàu broă tam phan, ròng phan, dong kờl làng bol tơnguh bơtàu broă lơh sa. Ồng Tơ Ngôl Với, Phó Chủ tịch UBND kơnhoàl tiah kơh bơnơm Nam Giang pà gĭt, pah nam kơnhoàl Nam Giang geh 130 broă tơnguh bơtàu lơh sa mờ cèng geh priă uă ngan: “Tàm broă lơh jăt broă tơmù rơƀah kung neh geh uă broă lơh sa, hơ̆ sồng ròng phan tai. Cồng nha tơmù rơƀah tơngai bơh nam 2016 tus 2020 loh làng ngan, pah nam geh bơh 5 tus 7%. Bol añ pơn jăt tai lơh jăt pràn ngan ală broă tơmù rơƀah kơl jăp, mìng geh dong kờl tàm broă lơh sa, bơto broă lơh, dong kờl ai broă lơh mờ lòt lơh broă hờ lơgar bơdìh”.

                 Uă hìu làng bol kis tàm tiah kơh bơnơm càr Quảng Nam lơh pas bơh broă ròng jơrke

Ồng A Lăng Mai, Kuang atbồ Ban Dân tộc càr Quảng Nam pà gĭt, ală nam do, bal mờ khà priă bơh Dà lơgar, càr Quảng Nam kung neh dong kờl làng bol kòn cau, làng bol kis tàm tiah ngài tơnguh bơtàu broă lơh sa, brồ guh klàs mờ rơƀah. Bồ nam do, càr Quảng nam neh dong kờl mờr 2 tơmàn đong, lơh jăt ală broă bơto pơlam broă lơh sa suơn sre tàm ală xã tiah kơh bơnơm mờ tiah làng bol kòn cau. Geh ờ uă broă lơh lài ngan neh cèng geh cồng nha bè: broă tam mờ tam tờm plai bung kơmhò tơlir, ròng ka Diêu hồng tàm gŭ tàm tơnao dà hìu măi pờ tơlĭk ồs đèng, ròng ka thát lát cườm tàm gŭ tàm tơnao dà pơgồp bal mờ blơi phan geh lơh. Bơdìh hơ̆ tai, càr Quảng Nam gam dong kờl sơntìl phan tam, phan ròng, kơnrồ, sur sơntìl... kơnờm mờ hơ̆, uă hìu neh klàs mờ rơƀah mờ brồ guh lơh pas.

Tàm nam 2020, gùt càr hòi jà geh mờr 3 tơmàn đong priă lơh jăt broă tơmù rơƀah. Ală broă lơh, rơndăp broă tơmù rơƀah, rài kis broă lơh sa mpồl bơtiàn neh geh lơh jăt mờ lơh geh cồng nha. Cồng nha, nam 2020, khà hìu rơƀah gùt càr gơmù 3 rơbô 282 hìu, sơrlèt 121% pơn drờm mờ khà geh ai; khà hìu rơƀah gơwèt hìu geh sră dong kờl bơh dà lơgar gơmù bơh 416 hìu gam 225 hìu. Gơwèt mờ broă tơmù rơƀah tàm ală xã rơƀah, xã kal ke tàm tiah ƀlàng jăt gah dà lềng, tiah làng bol kòn cau nam pa do neh lơh geh ală cồng nha niam. Khà hìu rơƀah bơh 74 xã rơƀah, kal ke gơmù 1 rơbô 681 hìu. Geh 3 xã rơƀah kal ke tàm tiah jăt gah dà lềng mờ bồt dà lềng, 1 xã tiah kơh bơnơm geh dờp geh khà ƀòn lơgar pa. Ồng A Lăng Mai, Kuang atbồ Ban Dân tộc càr Quảng Nam đơs, 6 nhai bồ nam do, rơlao 1 rơbô 600 hìu rơƀah mờ rơlao 600 hìu ndrờm mờ rơƀah tàm tiah làng bol kòn cau mờ tiah kơh bơnơm neh dan cih măt lĭk klàs mờ rơƀah. “Să tờm ală hìu làng bol kòn cau neh geh ngui khà priă geh cồng nha. Bơh tŭ hơ̆, pơgồp bal tàm broă tơnguh bơtàu lơh sa kung bè tơnguh uă priă geh tàm rài kis hìu nhă mờ pơgồp bal tàm broă tơn jơh jơgloh tơmù rơƀah kơl jăp. Ală broă lơh jăt jơnau kờñ dà lơgar dê kung bè khà priă càr dong kờl bè sơntìl phan tam, tờm chi sa plai ai tiah làng bol kòn cau tiah kơh bơnơm càr Quảng Nam neh geh cồng nha. Bơh tŭ hơ̆, lơh tam gơl muh măt ƀòn lơgar mờ tơnguh bơtàu broă lơh sa mpồl bơtiàn tiah kơh bơnơm”.

Nam 2021, càr Quảng Nam lơh ngan tơmù bơh 2 rơbô hìu rơƀah rơlao hờ đang mờ tơn jơh rơƀah ală hìu rơƀah gơwèt mpồl cau geh sră dong kờl bơh dà lơgar dê. Kờñ lơh geh tơngu me do, UBND càr sồr ală cấp, gah lơh broă lơh ngan rơlao tai, lơh ndrờm bal ală broă lơh, ai geh broă tam gơl pràn kơl dang tàm broă tơmù rơƀah. Tàm hơ̆ uă ngan là sền kuơ broă tơnguh, lơh geh uă ală broă lơh niam bè tơmù rơƀah; chồl pràn broă yal tơngĭt, lam sồr; tơnguh broă pơgồp bal ală khà priă.

Cau mblàng Ndong Brawl