VOV4.K’ho- Sră Căn cước làng bol sơnđờm geh lơh tàm lơgar Việt Nam bơh nam 2016. Nàng lơh gơs sră pơ àr Sră Căn cuớc làng bol ring bal tàm jơh gùt lơgar, ai tơl bơta ƀươn ai làng bol in tàm tŭ lơh sră pơ àr dà lơgar mờ ală broă lơh làng bol dê; wèt tus bơ̆t bơtàu Chính phủ điện tử, ngai 3/9/2020, Thủ tướng Chính phủ neh sền srì ring bal gùng dà bơcri priă lơh Rơndăp broă lơh lơh, pà mờ ătbồ sră căn cước làng bol, tàm hơ̆ jàu Bộ Kuang àng in là anih lơh broă geh gơnoar lam lơh bơ̆t bơtàu ală sră căn cước làng bol ring bal tàm jơh gùt lơgar. Cau geh pà sră căn cước làng bol mờ gơnoar bơh làng bol dê tŭ lơh sră căn cước neh geh cih tàm Adat Căn cước làng bol nam 2014.

Jăt Adat Căn cước làng bol nam 2014 dê cih, làng bol lơgar Việt Nam bơh tơl 14 sơnam rlau hơđang geh lơh sră căn cước làng bol (sèng 1 Bơta 19). Sră  Căn cước làng bol pal geh tam gơl tŭ làng bol tơl 25 sơnam, tơl 40 sơnam mờ tơl 60 sơnam (Bơta 21). Dilah sră căn cước làng bol geh lơh, tam gơl, lơh wơl tàm tơngai 2 nam lài mờ sơnam geh sồr lơh den kung gam geh kuơ ngui sơl tus sơnam tam gơl sră pơn jăt tai. Bơdìh hơ̆ tai, ală cau lơi neh geh Sră Kim ta (9 sồ mờ 12 sồ), sră căn cước làng bol mã vạch geh tam gơl tus sră căn cước làng bol geh crăp chíp tŭ geh jơnau sồr halà tŭ sră yau neh jơh tơngai ai ngui...

Sồ sră căn cước làng bol geh 12 sồ. Do ngan là mã gĭt nền măt cau dùl nă să is bơh tơl nă cau dê. Mã do geh gơ jăt bal mờ cau dùl nă să is bơh tŭ den tus dì tŭ cau dùl nă să is hơ̆ chơ̆t tĕ, ờ tam gơl mờ ndrờm bal mờ khăt dùl nă cau lơi ndai. Mã gĭt nền măt cau dùl nă să is geh ai bơh sră pơ àr dà lơgar bè làng bol ơm kis, ngui nàng tàm bơrbŏ bal, cih yal tàm yal tơngĭt bal ngui jơnau yal tơngĭt bơh làng bol dê.

Jăt Bơta 20 Adat Căn cước làng bol nam 2014 dê cih: Sră căn cước làng bol geh ngui ala ai broă ngui sră lòt rê mờ lơgar ndai tàm tŭ dilah lơgar Việt Nam mờ lơgar ndai kĭ hơ jơnau hơ pơrgon halà jơnau ring bal dunia ai gơnoar làng bol lơgar kĭ hơ in geh ngui sră Căn cước làng bol ala ai broă ngui sră lòt rê mờ lơgar ndai tàm ù tiah bơh gơ̆p dê. Bal mờ hơ̆, sră căn cước làng bol geh crăp chíp điện tử tŭ do gam cèng tus uă bơta kuơ ai làng bol in. Ồng Huỳnh Văn Long- Phó Kuang ătbồ Kuang àng ƀòn dờng Cao Lãnh, càr Đồng Tháp pà gĭt: Sră Căn cước làng bol geh crăp chíp điện tử nàng drơng jơnau kờñ ătbồ dà lơgar, ai tơl bơta ƀươn nàng làng bol lơh ală broă bơh he dê. Căn cước làng bol geh jơnau yal tơngĭt đal gĭt măt cau dùl nă să is, tiah ơm kis geh là bơnàng jă nàng lơh broă bơh làng bol dê ala sră hộ khẩu hơ̆ là sră cih măt cau tàm hìu bơnhă mờ tiah ơm kis sùm. Sră căn cước làng bol geh crăp chíp geh bơta sền gàr gàr ndơ̆p ndơr ngan, ai gơnoar bơtòm tơrgùm uă phan ngui pơn jăt bal, gơtùi geh ngui mờ tàm tơrbŏ bal làm uă mờ ală drơng broă mpồl bơtiàn mờ làng bol dê.

Adat Căn cước làng bol kung cih sơl, làng bol là bèp, mè, pơ ùr, bơklau, kòn hơđơm 18 sơnam bơh cau ling chơ̆t màng dê; cau ling sồt să, cau geh dờp bơta dong kờl bè cau ling sồt să; cau ling kòp tê jê să; làng bol sùm ơm kis tàm ală xã tiah nhàr lơgar; làng bol sùm ơm kis tàm ală kơnhoàl bồt; làng bol ală jơi bơtiàn kòn cau dùl êt nă cau tàm ală xã geh rài kis lơh sa- mpồl bơtiàn kal ke uă ir; làng bol là hìu bơnhă rƀah jăt jơnau cih bơh kơrnoat boh lam dê; geh ờ sa priă tă lơh sră căn cước làng bol. Ồng Tô Anh Dũng- Thượng tá, Phó Kuang ătbồ Cục Kảnh sát ătbồ sră pơ àr dà lơgar bè rơndăp tăp sèng mpồl bơtiàn gơwèt Bộ Kuang àng pà gĭt: Tŭ ală broă lơh làng bol kờñ tàm tơrbŏ mờ bộ, gah lơh broă bơh sră pơ àr dà lơgar bè làng bol ơm kis do den làng bol lòt lơh khăt broă lơh lơi tàm bộ, gah lơh broă lơh lơi den bol añ neh kơlôi tus broă tàm tơrbŏ bal tàm pà bal mờ ală bộ, gah lơh broă nàng drơng niam ngan rlau jơh jơnau kờñ bơh làng bol dê.

Làng bol lơh căn cước geh gơnoar geh sền gàr ndơ̆p ndơr jơnau yal să tờm dê, jơnau ndơ̆p ndơr hìu bơnhă dê tàm sră pơ àr dà lơgar bè làng bol ơm kis mờ sră pơ àr căn cước làng bol, ờ kờp dilah yal tơngĭt jơnau, sră nggal jăt adat boh lam dê sồr. Sồr anih lơh broă ătbồ sră căn cước làng bol cih yal, lơh tam gơl wơl jơnau yal tŭ jơnau yal tàm sră pơ àr dà lơgar bè làng bol ơm kis, sră pơ àr căn cước làng bol halà sră Căn cước làng bol ờ hềt geh, ờ hềt dipal halà geh bơta tam gơl jăt jơnau sồr bơh kơrnoat boh lam dê; Geh lơh, tam gơl,  lơh wơl sră Căn cước làng bol jăt jơnau sồr bơh Adat do dê; Lùp, yal yă, sồr lơh jăt jơnau sồr bơh kơrnoat boh lam dê gơwèt mờ broă lơh lơh tìs kơrnoat boh lam bè căn cước làng bol, sră pơ àr dà lơgrr bè làng bol ơm kis mờ sră pơ àr căn cước làng bol; Ngui sră Căn cước làng bol bơh he dê tàm tŭ lơh broă, lơh jăt gơnoar, bơta kuơ dipal mờ kơrnoat boh lam bơh làng bol dê.

Bộ Kuang àng pà gĭt, tơnơ̆ dùl tŭ tơngai sơrbac mhar lơh jăt Rơndăp broă lơh lơh sră pơ àr dà lơgar bè làng bol ơm kis mờ rơndăp broă lơh lơh gơlik, lơh mờ ătbồ căn cước làng bol, tus tŭ do, jơh ală mpồl cau neh dùl ròt bal mŭt sền tàm ală sră pơ àr rlau 98 tơlak jơnau yal làng bol Việt Nam dê. Bal mờ hơ̆, mpồl kuang àng neh dờp mờr 40 sră nggal căn cước làng bol bơh cau làng bol dê, lơh geh pơgăp 79,4% mờ digơlan lơh geh jơnau kờñ lơh 50 tơlak sră Căn cước làng bol lài mờ ngai 01 nhai 07 tus.

Cau mblàng Lơ Mu K’Yến