VOV4.K’ho- Ngai 05/10, Mpồl Kuang bàng Quốc hội càr Gia Lai neh geh dơ̆ tìp măt mờ cau tĕ khà tàm 4 xã tiah nhàr lơgar, tàm hơ̆ geh: Ia Mơr, Ia Ga, Ia Piơr mờ Ia Lâu, kơnhoàl Chư Prông mờ yal bè rơcăng pơrjum dơ̆ 2, Quốc hội khoá XV mờ cih dờp jơnau đơs tă pơgồp bơh cau tĕ khà dê.

Mpồl Kuang bàng Quốc hội càr Gia Lai tìp măt mờ cau tĕ khà tàm kơnhoàl Chư Prông

Tàm dơ̆ tìp măt, ală cau tĕ khà neh đơs bè bàr pe tơngume, bè: Tiah tềl lời wơl kah yau Plei Me geh dờp là tiah tềl lời wơl kah yau kấp dà lơgar mơya ờ hềt geh bơcri priă lơh dipal nàng gơhòi gơ jà năc lòt nhơl, sền gròi bơcri priă lơh ală broă lơh gùng lòt tàm tiah do, broă bơsong ù ơm, ù lơh sa ai cau jơi bơtiàn kòn cau dùl êt nă cau in.

Cau tĕ khà càr Gia Lai kung dan mờ ală anih lơh broă bơsong ală broă gơrềng tus broă lơh uă ir đèng măt tơngai ơn tềng rơkàng hìu, broă ătbồ ală rơndăp broă lơh bơtàu tơnguh ròng phan tàm càr, ală bơta kal ke tàm broă bơyai lơh bơsram pờ tơn tàm internet...Kuơmàng là uă cau tĕ khà đơs bè broă “duh hồl” bè broă lơh rơcăng sơndră kòp Covid-19, lơh bè lơi nàng jòi geh broă lơh ai cau lơh broă rê wơl bơh tiah geh kòp in.

Cau mblàng Lơ Mu K’Yến