VOV4.K’ho– Lam lơh broă lơh tìp mat cau tĕ khà tơnơ̆ pơrjum dơ̆ 2, Quốc hội khóa 15, pa do, Kuang atbồ Ban Nội chính dà lơgar ồng Phan Đình Trạc bal mờ Mpồl kuang bàng Quốc hội càr Lâm Đồng neh bơyai lơh tìp mat cau tĕ khà tàm uă tiah. Bơh hơ̆, cau tĕ khà ndrờm ai tơnggŏ bơta chờ hờp bè cồng nha bơh dơ̆ pơrjum Quốc hội dê pa do mờ bơta tam gơl pa, bơceh pa, mờ kung dan bè uă broă tàm càr.

Tơnơ̆ tŭ tơn jơh pơrjum dơ̆ 2, Quốc hội khóa 15, Kuang atbồ Ban Nội chính dà lơgar ồng Phan Đình Trạc bal mờ mpồl kuang bàng Quốc hội càr Lâm Đồng neh tìp mat cau tĕ khà 2, 3 sơnah ƀòn, xã gơwèt ală kơnhoàl Đức Trọng, Lạc Dương mờ ƀòn dờng Bảo Lộc, càr Lâm Đồng.

Tàm ală anih tìp mat, cau tĕ khà càr Lâm Đồng ndrờm ai tơnggŏ bơta chờ hờp mờ kơp gơn tàm ală broă lơh nền tàm broă chồl pràn bơtàu tơnguh lơh sa- mpồl bơtiàn, broă lơh sơrlèt gan kal ke tài bơh kòp dờng Covid-19 bơh Chính phủ dê, bơh Quốc hội dê bơh pơrjum dơ̆ 2, Quốc hội khóa 15. Mờkung pơn jat tai dan uă broă gơ rềng tus broă lơh atbồ dà lơgar tàm ală gah, ală broă lơh sền gàr rài kis mpồl bơtiàn mờ broă rơndap lơh chồl pràn lơh sa, kă bro tàm bơta bè ờs pa.

Tàm xã Hiệp An, kơnhoàl Đức Trọng, uă ngan jơnau đơs cau tĕ khà dê đơs tus broă ù tiah, ngan là broă lơh sră ngui ù gam lơyài; tam cah nhàr ù tiah lơh sa suơn sre, brê bơnơm ờ hềt loh làng; broă lik bơh sổ hộ khẩu, lơh gùng lòt ƀòn lơgar, tơm wơl priă ai ù lơh tơnau rbòng dà Ta Hoét gam ờ niam... Jat cau tĕ khà Mai Khả Cử, ơm tàm thôn Tân An, xã Hiệp An đơs, bơdìh mờ ală broă kuơmàng do, broă atbồ ờdo ờdă bơt bơtàu kung gam là broă geh sền gròi uă kờñ geh Quốc hội, gơnoar atbồ ală kấp gròi sền mờ bơsir: “Xã Hiệp An ơm tàm ù tiah geh rơndap lài ù tiah lơh tiah drà mơya broă bơt bơtàu gam gơlik geh sơr lồng sơr làng ngan. Jat kềng gah gùng rơndeh 20, ờ git lơh bè lơi mờ hìu đam, hìu tac phan den geh hìu mpờl hờ đap, geh hìu mut tàm dơlam. Hìu lơh lài den ờ lơh sră lơh glài, ai hìu lơh tơnơ̆ den lơh sră sồr lơh glài... Dan kấp hơđang pal sền wơl broă atbồ ờdo ờdă bơt bơtàu.”

Ồng Phan Đình Trạc, Kuang atbồ Ban Nội chính dà lơgar đơs tàm dơ̆ tìp mat

Ndrờm bè hơ̆ sơl, cau tĕ khà xã Lát, kơnhoàl Lạc Dương den dan 2, 3 tơngume gơ rềng tus ală broă bè tam gơl ù lơh sa suơn sre, ù tam brê gơs ù ơm; broă lơh sră ngui ù, broă lơh rơndap ù tiah lơh sa, ơm kis pa gơ rềng tus rơndap broă lơh hìu măi pờ tơlik ồs đèng Dà Dờng- Dà Chomo; dong kờl càn priă nàng lơh sa, brồ guh lik klàs rƀah; broă dong kờl gơ wèt tus mờ 2, 3 gơnoar broă kấp xã. Cau tĕ khà kung dan pal tơnguh mhar tŭ tơngai lam lơh gơl gùng tiah drà 726 nàng broă lòt rê in geh ƀuơn ƀuài, dong bơtàu tơnguh lơh sa; sơlơ bơsong bơta rơndeh pơndiang kơn jơ̆ ir, tơnguh khà hìu bơnhă geh ngui dà sàng goh...

Tàm tŭ hơ̆, cau tĕ khà ƀòn dờng Dà Làc sền gròi uă ngan tus broă lơh rơcang sơndră kòp Covid-19 mờ ală broă lơh bơtàu tơnguh wơl lơh sa, kă bro broă drơng ala nhơl chờ, chul chồl lơh sa- mpồl bơtiàn bơtàu tơnguh. Cau tĕ khà Nguyễn Thị Hiếu Hòa, Kuang atbồ Hìu sơnơm ƀòn dờng Dà Làc đơs là, mờ bơta geh ngan bè phan bơna mờ cau lơh broă ờ uă, sùm gơ ơm tàm bơta gal ir cau mut tàm hìu sơnơm bè tŭ do, dilah ờ geh broă tă bơsong di tŭ den Dà Làc ờ gơtùi lơh geh cồng nha jơnau kờñ dơ̆ lĕ bal tàm bơta bè ờs pa: “Hìu sơnơm lam lơh ală kơnòl broă ờs mờng sùm bè kham sơm kòp, rơcang gàr lài, broă lơh khà kờp làng bol, bal mờ broă lơh rơcang sơndră kòp bơtờp. Cau lơh broă nàng drơng kơnòl broă den ờ tơl, tàm tŭ kung gam pal lơh jat jơnau sồr tơrmù cau lơh broă. Tàm tơngai tus, tŭ lam lơh tai ală kơnòl broă bè anih sơm kòp kung bè broă lơh rơcang sơndră kòp, ală broă lơh hìu sơnơm làm bă tiah mờ ală mpồl sền gàr pràn kơldăng să jan... ngan là geh gơguh tai bơta kal ke mờ kơn jơ̆ ir gơ wèt tus mờ mpồl lơh sơnơm kấp hơ đơm.”

Gùt anih tìp mat cau tĕ khà tàm xã Lát, kơnhoàl Lạc Dương, càr Lâm Đồng

Ala mat Mpồl kuang bàng Quốc hội càr Lâm Đồng, Kuang atbồ Ban Nội chính dà lơgar ồng Phan Đình Trạc cih dờp, đơs niam ală jơnau dan di mờ bơta geh ngan tàm rài kis bơh cau tĕ khà dê. Mờ kung mblàng lơh loh tai 2, 3 broă gơ rềng tus broă lơh dong kờl tơnơ̆ tŭ lik klàs rƀah, nàng gàr bơta lik klàs rƀah kơ̆ kơljap; broă lơh dong kờl gơwèt tus mờ kuang bàng kấp xã, ngan là kuang bàng ờ drơng broă sùm, kuang bàng thôn, ƀòn. Kuơmàng là sền gròi tus jơnau đơs bơh cau tĕ khà xã Lát, kơnhoàl Lạc Dương dê bè broă ù tiah, ồng Phan Đình Trạc sồr gơnoar atbồ mờ gah lơh broă geh gơnoar tiah do pal sền gròi, bơsong di tŭ: “Do là dùl xã tiah kơh bơnơm neh jơh rƀah mờ tơl khà xã ƀòn lơgar pa. Kơp kờñ làng bol pơn jat tai lơh ngan, brồ guh, tam klac bal, bơsong kal ke, lơh ngan pràn rlau tai, uă rlau tai nàng bol he ờ mìng gàr kơ̆ xã ƀòn lơgar pa, mờ gam tơl khà xã ƀòn lơgar pa lơh lài tai. Bè broă ù ơm, ù lơh sa, lơh sră ngui ù, tơm wơl priă ai ù rơndap ƀòn ơm kis pa... den sồr kơnhoàl, xã, càr mhar dong làng bol. Tài do là jơnau kờñ jal mhar bơh broă lơh sa, gàr kơ̆ kơljap rài kis.”

Di dơ̆ tìp mat cau tĕ khà tơnơ̆ pơrjum dơ̆ 2, Quốc hội khóa 15, Kuang atbồ Ban Nội chính dà lơgar ồng Phan Đình Trạc neh jàu pà càr Lâm Đồng in ală phan bơna, măi mok lơh sơnơm drơng broă lơh rơcang sơndră kòp Covid-19, geh: 10 nơm măi tă nhơm, 200 rbô nơm chèu glòm muh mat mờ 200 rbô bộ xét nghiệm mhar kòp Covid-19 bơh bơnah phan Bộ Y tế dê. Mờ kung dong kờl 600 bơnah phan pà ai công nhân mờ cau lơh broă gơtìp kal ke tàm càr Lâm Đồng in bơh khà priă Tổng Liên đoàn Lao động Việt Nam dê.

 Cau mblàng K’Duẩn