VOV4.K’’ho- Tàm pơrjum dơ̆ 1, Quốc hội khoá 15, Chủ tịch Ủy ban Mặt trận dà lơgar Việt Nam ồng Đỗ Văn Chiến neh yal Jơnau yal tơrgùm jơnau đơs, jơnau dan bơh cau tĕ khà mờ làng bol dê. Bơdìh mờ ală cồng nha kuơmàng neh lơh geh, cau tĕ khà mờ làng bol gam kơlôi rơcang, ờ suk, ngan là kòp dờng Covid-19.  

Cau tĕ khà mờ làng bol ring bal mờ gùng dà ờ tam gơl, geh lơh sùm bơh Đảng dê là tơnguh bơta pràn bơh mpồl tam klac dờng gùt jơi bơtìan, tơnguh bơta kơp kờñ bơt bơtàu dà lơgar he bơtàu tơnguh pas sơm, gơboh gơbài. Bal mờ cồng nha lơh geh tàm broă rơcang sơndră kòp bơ tờp, ală mpồl lơh sa kă bro, mpồl lơh sa mờ làng bol pơn jat tai tơnguh broă lơh sa, kă bro; lơh sa lơh geh khà gơguh 5,64%, geh jơh bal 3 mpồl sap sèng pin dờn dunia tơnguh khà kơp kơ nờm pin dờn dà lơgar bơh “kơ̆ kơljap” tus “niam”, lơngap lơngai chính trị, ờdo ờdă mpồl bơtìan geh gàr kơ̆; tơl niam rài kis mpồl bơtìan geh gàr niam, rài kis bơh làng bol dê kơ̆ kơljap. Chủ tịch Ủy ban Mặt trận dà lơgar Việt Nam ồng Đỗ Văn Chiến đơs loh: Cau tĕ khà chờ hờp tŭ Thủ tướng Chính phủ ala mat kuang đơng lam bồ Đảng, Dà lơgar lam lơh broă lơh cit sơnơm vaccine rơcang sơndră kòp Covid-19 gùt lơgar dờng ngan rlau jơh tàm rài kah yau, bulah bè hơ̆, cau tĕ khà kung gam ală bơta kơlôi rơcang mờ ờ suk: “Cau tĕ khà mờ làng bol gam kơlôi rơcang, ờ suk tàm tŭ tơngai ờ tơl sơnơm vaccine gùt plai ù, jơnau hơ pơrgon bơh ală mpồl tac sơnơm vaccine dê ờ hềt kơ̆, sơnơm vaccine tàm lơgar den gam tàm tơngai tơrlòng lài, bol he pal geh broă lơh ngan ngồn tam gơl pa, gơtùi lam lơh ngan ngồn hơ̆ sồng lơh geh khà cit sơnơm vaccine 75% khà kờp làng bol bơh gùt lơgar dê bè broă rơndap lơh bơh Bộ Y tế dê. Dilah ờ lơh geh broă rơndap lơh cit sơnơm vaccine den broă rơndap lơh bơtàu tơnguh wơl lơh sa- mpồl bơtìan digơlan kung lơyài, rài kis làng bol dê pơn jat tai gơtìp kal ke, ngan là ală cau ờ pràn, cau roh broă lơh, ờ tơl broă lơh tài pal lơh jat ală broă lơh tam cah is, ơm yah ngài mpồl bơtìan tài bơh kòp Covid-19”.

Bơnah dong kờl 62 rbô tơmàn đông jat Nghị quyết sồ 42 bơh Chính phủ dê bè ală broă lơh dong kờl làng bol gơtìp kal ke tài bơh kòp dờng Covid-19 geh tŭ tơngai, bơsong broă gơlik geh jal mhar. Bulah bè hơ̆, cau tĕ khà đơs là, broă lam lơh gam kwi kuơ, đal git cau geh dong kờl ờ hềt dipal mờ tŭ tơngai, broă gơlik geh, den tàng broă tă priă bơh kes priă dà lơgar dong kờl làng bol, mpồl lơh sa kă bro in lơh geh khà dùl êt, ờ lơh geh jat bè jơnau kờñ kờl dŭ lài. Sồr ală Bộ, gah broă lơh, gơnoar atbồ ală kấp, anih lơh broă geh gơ rềng pal sền sơwì, ai mờng chài, đơs loh jơnau bơh tài gơlik geh, kơ nòl broă nàng lam lơh niam rlau tai bơnah dong kờl jat Nghị quyết sồ 68 bơh Chính phủ dê kờñ dong kờl mpồl lơh sa kă bro mờ làng bol dùl bă ngan ngồn rlau.

Ông Đỗ Văn Chiến, Chủ tịch Ủy ban Mặt trận dà lơgar Việt Nam yal jơnau đơs, jơnau dan bơh cau tĕ khà mờ làng bol dê tus pơrjum dơ̆ 1, Quốc hội khóa XV

Cau tĕ khà kung kơlôi rơcang, ờ suk, mìng gam 5 nhai tai là jơh nam 2021 mơya 2, 3 bơta kòl yan, bơta ờ niam, bơta gơ rơndap rơndồl bè cơ chế, broă lơh, jơnau cih bơh adat boh lam dê neh gơlik geh bơh jŏ, ờ hềt geh bơsong, dilah Chính phủ, Quốc hội ờ tă bơsong di tŭ ală bơta kòl yan do den bơta pràn nàng lơh gơs ală jơnau kờñ lơh sa- mpồl bơtìan nam 2021 digơlan kal ke ngan. Tàm tŭ tơngai pal tam cah is, ơm yah ngài mpồl bơtìan nàng gàr niam ờdo ờdă kòp bơ tờp, ờ uă kơnòm dềt ờ geh tus hìu bơsram, ờ geh nhơl ñŏ di mờ sơnam ală oh dê tàm dùl tŭ tơngai jŏ jòng digơlan lơh gơ rềng tus nùs nhơm, ngan là tàm ală tiah drà, hìu jơnhua cờn ơm bal. Broă do pal gờñ geh ală anih lơh broă kơlôi sơ nơng nàng geh broă lơh dipal bơsong, ờ gơtùi sền ờ sơp.

Cau tĕ khà sồr ală kuang bàng Quốc hội tơnguh kơ nòl broă, lơh ngan lam lơh jơh nùs, geh cồng nha broă lam lơh mờ jơnau hơ pơrgon mờ cau tĕ khà tàm tŭ hòi jà tĕ khà; lơh ngan bơsram, kơlôi sơ nơng tơnguh mờng chài lơh broă, bơta chài lam lơh bơh kuang bàng dê; lơh krơh lài, geh nùs nhơm pràn kơldang, ngan ngồn đềt mềr “pròc mhàm” mờ làng bol; lơh ngan lơh broă jat jơnau đơs: jơh nùs nàng làng bol sền ngềr, geh kơ nòl nàng làng bol kờñ, lơh jat kơrnuat nàng làng bol ki ngàm, ngac ngar nàng làng bol gơtùi kơ nờm. Chủ tịch Ủy ban Mặt trận dà lơgar Việt Nam ồng Đỗ Văn Chiến  sồr Quốc hội pơn jat tai tam gơl pa broă lơh, tơnguh cồng nha bơt bơtàu adat boh lam, lơh nền ală broă kuơmàng bơh dà lơgar dê mờ gròi sền jơnhua ngan rlau jơh: “Bơt bơtàu broă lơh adat boh lam pal sền gròi tus bơta geh ngan, geh broă rơndap lơh jŏ jòng, tơrmù lơyah ngan rlau jơh broă adat pa geh ai tơlik neh pal tam gơl, bơ tơl tài bơh ờ tam gơl, bơ tơl den broă lơh ờ geh ngui ngan ngồn tàm rài kis; mhar tam gơl, bơ tơl Adat ù tiah; sồr Quốc hội bal mờ Chính phủ tă bơsong ală kòl yan bè adat boh lam mờ ală broă lơh dipal bè ai tơlik dùl adat tam gơl uă adat halà ai tơlik ală nghị quyết ai ngui lơh tơrlòng lài gơwèt tus mờ ală broă ờ hềt geh cih, pơgồp bơnah tă bơta pràn tàm tŭ tơngai kal ke tài bơh kòp Covid-19 lơh gơbàn tus mờ rài lơh sa mờ làng bol. Tài tàm bơta ờ bè ờs mờ kung gam ngui cơ chế, broă lơh bè ờs den ờ gơtùi lơh jat jơnau kờñ ngan ngồn”.

Di tŭ do, Đoàn Chủ tịch Ủy ban Mặt trận dà lơgar Việt Nam hòi jà ală rơnàng làng bol, cau tĕ khà gùt lơgar, ală mpồl cau mờ cau dùl nă să, kờp bal mờ cau lơgar ndai gam ơm kis tàm lơgar Việt Nam kơ̆ dơn pin dờn tàm bơta đơng lam dipal bơh Đảng, Dà lơgar, Chính phủ, Thủ tướng Chính phủ bè rơcang sơndră kòp Covid-19, tơnguh bơhìan tam klac, tàm kờñ gơboh dong kờl bal kòn bơnus, lơh gơlik bơta ring bal uă, lơh jat nền nòn ală jơnau sồr bè tam cah is, ơm yah ngài mpồl bơtìan, cit sơnơm vaccine rơcang sơndră kòp Covid-19, lơh jat geh cồng nha jơnau sồr 5K bơh Bộ Y tế dê. Làng bol mờ cau tĕ khà gùt lơgar tam klac bal dùl nùs, ngan là geh gơtùi kơryan kòp Covid-19, lơh jat geh cồng nha Nghị quyết pơrjum dờng dơ̆ 13 bơh Đảng dê, lam lơh ngan ngồn bơta kơp kờñ bơt bơtàu dà lơgar he bơtàu tơnguh pas sơm, kơ̆ kơljap.

         Cau mblàng K’’Duẩn