VOV4.K’ho– Poh lài, pơrjum dơ̆ 2, Quốc hội khóa 15 pơn jat tai geh lơh mờ uă tơngume kuơmàng, tàm hơ̆ cau tĕ khà gùt lơgar sền gròi uă ngan tus dơ̆ lùp mờ hơ jơnau lùp bè broă bơto bơtê mờ bơsram tàm tŭ tơngai kòp Covid-19 gam gơlik geh kal ke ngan. Bơta kơlôi sơnơng bal bơh cau tĕ khà gùt lơgar dê là bơnah hơ jơnau lùp bơh Bộ trưởng Bộ Giáo dục mờ Đàto tạo ồng Nguyễn Kim Sơn dê gơ wèt tus mờ broă do là loh làng mờ wil tơl ngan.

Sền gròi uă ngan tus broă lơh bơto bơtê mờ bơsram pờ tơn tàm internet bơh gah bơto bơsram dê tàm tŭ tơngai kòp Covid-19 tŭ do, cau tĕ khà Lưu Văn Đức, ơm tàm sơnah ƀòn Quyết Thắng, ƀòn dờng Kon Tum, càr Kon Tum pà git, tơngume hơ jơnau lùp bơh Bộ trưởng Bộ Giáo dục mờ Đào tạo ồng Nguyễn Kim Sơn dê gơ wèt tus mờ broă do là loh làng mờ song ngan. Bộ trưởng neh song dơpă tŭ đơs bè ală bơta ờ niam bơh broă lơh bơto bơsram do dê mờ ai tơlik broă lơh nàng bơsong. Bơh bơta geh ngan bè lơh sa, mpồl bơtiàn bơh càr Kon Tum dê gam uă kal ke, broă bơto bơsram pờ tơn tàm internet mìng gơtùi gàr tàm 2, 3 tiah ƀuơn ƀuài, cau tĕ khà Lưu Văn Đức geh jơnau đơs: “Tàm tơngai kòp dờng Covid-19 do, să tờm añ gŏ, broă kah, dờp ală jơnau git wă khoa học tàm internet gơmù, den tàng geh gơ rềng tus broă bơto bơtê cau lơh broă tơnơ̆ do. Den tàng gơ wèt mờ càr Kon Tum, dà lơgar sền sơ wì bơcri priă bơt bơtàu phan bơna mờ lơh anih tam cah is tơrgùm bal, tơrmù broă ngui hìu bơsram nàng lơh anih tam cah is mờ sơm kòp Covid-19. Bañ ngui ală hìu bơsram tai tài gơ rềng tus broă bơsram sră ală sau dê”.

Sền gròi tus broă tam gơl pa bơto bơsram, cau tĕ khà Vũ Thị Quế ơm tàm ƀòn dờng Lai Châu, càr Lai Châu tam pà bal mờ ală kal ke, bơta lòng gơ wèt tus mờ gah Giáo dục mờ Đào tạo tàm tơngai lài. Bulah bè hơ̆, mpồl broă bè tam gơl kuơmàng, tơl làm bơto bơtê mờ bơsram pờ tơn tàm internet nàng gơ dờp mờ broă gơlik geh bơh kòp bơtờp dê digơlan gam jŏ jòng mờ Bộ Giáo dục mờ Đào tạo ai tơlik kung kờñ kờp tus bơta ù tiah mờ bơta geh ngan broă bơsram sră bơh kơnòm bơsram tiah kơh bơnơm dê: “Gơ wèt mờ bơta geh ngan bơsram sră bơh kơnòm bơsram tiah kơh bơnơm, tiah làng bol jơi bơtiàn kòn cau dùl êt nă cau dê mùl neh kal ke, siơŭ siar, kong hoàc huơr rlau mờ tiah ring, ƀòn dờng. Mờ tŭ do, kòp bơtờp gơlik geh kal ke tai den tàng kơnòm bơsram pal bơsram online, ờ geh măi mok, phan bơna bơsram den tàng cồng nha bơsram ờ gơtùi gàr niam. Kơp kờñ ngan Bộ Giáo dục mờ Đào tạo geh broă lơh tam gơl pa dipal nàng gàr gơnoar kuơ kung bè bơta kuơ bơh oh kòn làng bol kòn cau tiah kơh bơnơm dê”.

Hơ jơnau lùp bơh kuang bàng dê bè broă bơto bơsram pờ tơn tàm internet ờ lơh geh cồng nha bè bơto bơsram tơn, den broă lơh sền sơ wì, gròi sền geh lam lơh mơ halà tơn ruc wơl dùl nam, Bộ trưởng Bộ Giáo dục mờ Đào tạo ồng Nguyễn Kim Sơn đơs nền: “Bơto bơsram pờ tơn tàm internet là broă lơh ờ hềt geh bơh lài tus tŭ do, geh ală bơta pal tam gơl nàng hời rơ hời bơsir niam wơl. Ai tài bơta hơ̆ mờ bol he ờ sền sơ wì, gròi sền, lời tơn ruc 1 nam den jat añ sơnơng là ờ dipal. Bơsram tus kàr lơi den sền sơ wì tus kàr hơ̆ mờ kờp tus ală gơ rềng kal ke bơh kòp bơtờp dê mờ jat tàm tơl khà điểm bơh broă lơh bơto bơsram tờm dê”.

Bộ trưởng Bộ Giáo dục mờ Đào tạo ồng Nguyễn Kim Sơn hơ jơnau lùp

Jat jơnau đơs bơh ală kuang bàng Quốc hội dê, Bộ trưởng Bộ Giáo dục mờ Đào tạo ồng Nguyễn Kim Sơn bulah pa dờp kơnòl broă tàm tơngai rềp ndo lơm mơya neh git bè broă bơh gah bơto bơsram dê wil tơl, kơ̆ kơljap ngan, rơcang lài nền nòn mờ hơ loh làng, song dơpă gơ wèt tus mờ ală broă kuang bàng sền gròi. Ồng Y Khút Niê, lài do là Phó kuang atbồ Mpồl kuang bàng Quốc hội càr Dăk Lăk khóa 14 đơs: Ală kuang bàng neh tơlik jơnau lùp di mờ bơta geh ngan tŭ do dê tŭ gah bơto bơtê mờ bơsram kong gơ rềng uă ngan bơh kòp Covid-19: “Bơh bơnah lùp ală kuang bàng dê, añ gŏ là Bộ trưởng bulah là Bộ trưởng pa mơya neh đal git broă nền nòn ngan, git loh broă geh ai tơlik mờ hơ ală broă kuơmàng. Bulah bè hơ̆ tơngai mờr tus kung geh dùl broă dờng màng ngan mờ kal ke ngan ai Bộ trưởng in là pal rơndap sap sèng wơl tŭ tơngai bơsram, ngan là gơ wèt tus mờ ală sau ơdŭ 1, tài do là broă pal geh kòp dŭ loh làng, mùl màl rlau”.

Pơn dut mpồl broă gơ rềng tus gah Bơto bơtê mờ bơsram, Chủ tịch Quốc hội ồng Vương Đình Huệ đơs nền, kòp Covid-19 ờ mìng gơ rềng uă ngan tus broă bơto bơtê mờ bơsram mờ gam digơlan lơh lơyài tus broă tam gơl pa kuơmàng, tơl làm bơto bơsram đại học. 28 nă kuang bàng Quốc hội lùp, 10 jơnau đơs tàm pơndăng, 20 nă kuang bàng cih mat lài mơya ờ hềt gơtùi đơs jơnau lùp kung neh dùl bơnah lơi ai tơnggŏ bơta sền gròi bơh kuang bàng Quốc hội, git nđờ tơlak nă kơnòm bơsram, mè bèp kơnòm bơsram tàm gùt lơgar dê. Bộ trưởng Bộ Giáo dục mờ Đào tạo ồng Nguyễn Kim Sơn pa at gơnoar broă atbồ Gah bơto bơtê mờ bơsram ờ jŏ, mơya neh git loh ală broă bơh gah do dê, broă mờ he drơng lơh, geh hơ nền nòn ală jơnau đơs bơh Kuang bàng Quốc hội kung bè jơnau đơs tàm pơndang dê. Chủ tịch Quốc hội ồng Vương Đình Huệ đơs nền: “Sồr Bộ Giáo dục mờ Đào tạo pơgồp jơh nùs mờ Bộ Y tế mờ ală tiah nàng kơlôi sơnơng mhar lam lơh broă lơh cit sơnơm vaccine ai kơnòm bơsram in. Do là dùl tàm ală bơta lài ngan nàng bol he gơtùi gờñ ai kơnòm bơsram, cau bơsram dờng lòt bơsram wơl gờñ ngan ngan rlau jơh. Geh broă rơndap lơh bè tŭ tơngai ai kơnòm bơsram, cau bơsram dờng lòt bơsram wơl, nàng bơsram tơrgùm bal. Gờñ tơrmù bơta tam cah ngài bè bơto bơsram đah ƀòn dờng, tiah drà mờ ƀòn lơgar, ngan là tiah sar lơgar ngài, tiah làng bol jơi bơtiàn kòn cau dùl êt nă cau mờ tiah kơh bơnơm”.

 Cau mblàng K’Duẩn