VOV4.K’ho– Poh lài, mpồl kuang bàng Quốc hội ală càr tàm tiah Tây Nguyên neh lam lơh tìp mat cau tĕ khà lài mờ pơrjum dơ̆ 2, Quốc hội khóa 15. Tàm ală anih tìp mat, cau tĕ khà ndrờm ai tơnggŏ bơta chờ hờp tềng đap ală cồng nha tàm pơrjum dơ̆ 1, Quốc hội khóa 15, ring bal mờ jơnau kờp dŭ lài tơngume, broă lam lơh bơh pơrjum dơ̆ 2 dê mờ ai tơlik uă jơnau đơs, jơnau dan bè uă broă ngan ngồn tàm ƀòn lơgar. Mùl màl bè di tŭ ai tơl sơnơm vaccine rơcang sơndră kòp Covid-19 làng bol in, geh broă lơh dong kờl làng bol bơtàu tơnguh lơh sa tơnơ̆ kòp dờng, sền gròi bơcri priă bơtàu tơnguh lơh sa suơn sre geh bơta pràn tàm Tây Nguyên.

Tàm ală dơ̆ tìp mat mờ cau tĕ khà, Mpồl kuang bàng Quốc hội càr Dăk Lăk cih dờp uă jơnau đơs sền gròi tus ală broă lơh nàng lam lơh jat jơnau kờñ dơ̆ lĕ bal, ờ mìng bơtàu tơnguh lơh sa- mpồl bơtiàn, mờ gam rơcang sơndră kòp bơtờp geh cồng nha geh ală cau tĕ khà đơs tus. Bal mờ hơ̆, cau tĕ khà dan mờ Quốc hội, Chính phủ, ală bộ, gah broă lơh dà lơgar mờ càr pơn jat tai đơng lam jơh nùs, kràñ cê broă rơcang sơndră kòp Covid-19, lơh gơlik khà sơnơm vaccine nàng cit ai làng bol in, sơlơ tơnguh bơta pràn lơh sơnơm tơmba jơh bal bè mpồl cau lơh sơnơm, phan bơna, măi mok, ngan là mpồl kuang bàng lơh sơnơm kấp hơ đơm nàng mhar kơryan kòp bơtờp, lam dà lơgar mhar rê wơl mờ bơta bè ờs pa. Cau tĕ khà Lê Văn Thao ơm tàm xã Ea Trang, kơnhoàl M’Drăk dan: “Tàm tơngai pa do, mờ khà sơnơm vaccine geh ai, kơnhoàl neh lam lơh cit ai ală cau tàm mpồl geh ai cit lài jat jơnau sồr in, mơya nàng geh cồng nha rlau tai, lơh gơlik bơta ờ bơtờp kòp tàm mpồl bơtiàn, nàng geh cồng nha jŏ jòng kung dan ală kấp sền gròi ai tai sơnơm vaccine nàng gàr bè lơi ờ mìng cit ai ală cau tus bal rơcang sơndră kòp in mờ gam cit ai jơh ală làng bol in tai. Kuơmàng là ală làng bol tàm tiah làng bol jơi bơtiàn kòn cau dùl êt nă cau, tiah sar lơgar ngài là ală tiah geh bơta digơlan bơtờp kòp uă mờ ală bơta bè tam cah is, ală bơta bè rơcang sơndră kòp kal ke ngan”.

Mpồl kuang bàng Quốc hội càr Dăk Lăk tìp mat cau tĕ khà

Kung tàm poh lài sơl, mpồl kuang bàng Quốc hội càr Gia Lai neh geh dơ̆ tìp mat mờ cau tĕ khà 4 xã tiah nhàr dà lơgargeh: Ia Mơr, Ia Ga, Ia Piơr mờ Ia Lâu, kơnhoàl Chư Prông, yal bè jơnau kờp dŭ pơrjum dơ̆ 2, Quốc hội khóa 15 mờ cih dờp jơnau đớ sbơh cau tĕ khà dê. Tàm ală anih tìp mat, cau tĕ khà ai tơnggŏ bơta chờ hờp tềng đap ală cồng nha tàm pơrjum dơ̆ 1, Quốc hội khóa 15 neh pồ kuang bàng dờng màng bơh Quốc hội, dà lơgar, Chính phủ dê tơngai lơh broă bơh nam 2021 tus nam 2026 mờ khà sră pồ pin dờn uă. Mờ kung dan: pal tam gơl, bơtơl 2, 3 bơta sră nggal adat boh lam bè: Adat ù tiah, Adat Tố tụng hình sự nam 2015, Adat kơnòl ling klàng, Adat tàm pơrlòng pà khà jờng... nàng ală kấp, ală gah broă lơh ƀuơn lam lơh, gàr bơta pơhìn ală broă lơh lơh tìs adat boh lam mờ dipal mờ bơta geh ngan rài kis. Pơn jat tai lam lơh ală broă lơh bơtàu tơnguh wơl, chồl pràn bơtàu tơnguh lơh sa- mpồl bơtiàn.

Bè ală broă mùl màl tàm càr, cau tĕ khà càr Gia Lai đơs, tiah tềl kah yau Plei Me geh dờp là tiah tềl kah yau kấp dà lơgar mơya ờ hềt geh bơcri priă bơt bơtàu dipal nàng gơ hòi gơ jà nac nhơl chờ, bơta gròi sền bơcri priă lơh ală broă lơh gùng lòt tàm càr, broă bơsong ù ơm, ù lơh sa ai cau jơi bơtiàn kòn cau dùl êt nă cau in. Cau tĕ khà càr Gia Lai kung dan ală anih lơh broă bơsong ală broă gơ rềng tus broă lam lơh uă đèng mat tơngai đang rơkàng hìu, broă atbồ ală rơndap broă bơtàu tơnguh ròng phan tàm càr, ală bơta ờ niam tàm broă lam lơh bơto bơsram pờ tơn tàm internet... Kuơmàng, uă cau tĕ khà đơs tus broă geh sền gròi uă bè broă lơh rơcang sơndră kòp Covid-19, lơh bè lơi ai geh broă lơh ai ală cau rê bơh tiah geh kòp in.

Tìp mat cau tĕ khà lài mờ pơrjum dơ̆ 2, Quốc hội khóa 15

Cau tĕ khà Nguyễn Trường An ơm tàm kơnhoàl Chư Prông geh jơnau đơs: “Mùl màl là oh kòn tàm càr tŭ rê bơh tiah geh kòp den kung kal ke ngan, mờ tŭ do den kung ờ gơtùi jòi geh broă lơh tàm ƀòn lơgar. Bơdìh hơ̆ tai, tŭ do, tơl nă cau pơn jat tai rê bơh tiah geh kòp den bơta do kung kơp kờñ ală kấp geh gơnoar kờp dŭ. Rlau mờ bơta lơi, rài kis làng bol tàm tiah nhàr dà lơgar dê kal ke ngan, kơp kờñ lơh bè lơi dà lơgar geh ală broă lơh nàng dong kờl, lơh gơlik bơta niam ai tơl nă cau in gơtùi bơtàu tơnguh, pơlam làng bol bơt bơtàu, bơtàu tơnguh ală broă lơh tam phan, ròng phan nàng bơtàu tơnguh lơh sa”.

Tàm Kon Tum, Mpồl kuang bàng Quốc hội neh tìp mat mờ cau tĕ khà kơnhoàl Sa Thầy, Kon Plông mờ Kon Rẫy. Cau tĕ khà ai tơlik bơta ring bal mờ jơnau kờp dŭ tơngume, broă lơh pơrjum dơ̆ 2, Quốc hội khóa 15 dê; kờñ gùng dà kung bè jơnau đơng lam bơh Chính phủ dê tàm broă lơh rơcang sơndră kòp Covid-19 mờ chờ hờp tŭ gŏ làng bol, ngan là cau ờ sô geh sền gròi, dong kờl di tŭ.

Bè ală broă tàm càr, cau tĕ khà càr Kon Tum kơp kờñ cau tờm bơcri priă chồl mhar tơngai lam lơh rơndap broă lơh niam wơl ală gơl gùng lòt kuơmàng tàm gùng rơndeh 24 bơh thị trấn Măng Đen, kơnhoàl Kon Plông lòt càr Quảng Ngãi. Pơn jat tai ai kơnòm bơsram kòn cau in geh dờp ală broă ơm sa ngai tàm hìu bơsram nàng gàr sùm broă lơh hìu bơsram ơm sa ngai. Ai wơl ală rơndap broă lơyài tơngai lam lơh ờ geh cồng nha, pleh bơta hoàc huơr ù tiah. Sơlơ tơnguh broă lơh sền gàr phan kuơ geh is tàm ù. Tơrmù ƀà gơ rềng ờ niam bơh hìu măi pờ tơlik ồs đèng di mơ mờ dềt dê gơwèt tus mờ rài kis kung bè broă lơh sa bơh làng bol dê.

Cau tĕ khà Kon Tum geh jơnau đơs mờ Mpồl kuang bàng Quốc hội

Gơwèt mờ gah sền gàr brê, cau tĕ khà càr Kon Tum dan ală kấp mhar lòt sền, kờp sền wơl bă brê geh jàu jat Kơrnuat sồ 178 bơh Chính phủ dê. Geh broă lơh dong kờl, ngan là gơwèt tus mờ cau jơi bơtiàn kòn cau dùl êt nă cau bè sơntìl, priă bơcri, kỹ thuật nàng làng bol tam wơl brê tàm bă ù bơnơm ờ geh chi che.

 Cau mblàng K’Duẩn