VOV4.K’ho- Ala măt Thủ tướng Chính phủ, Phó Thủ tướng Chính phủ ồng Lê Văn Thành pa kĭ ai lơh jăt Chỉ thị sồ 26 ngai 21/09/2021 bè broă dong kờl tơnguh lơh sa, jun pơndiang, kă bro mờ tăc mờ lơgar ndai phan lơh geh bơh sươn sre tàm tơngai rơcăng sơndră kòp Covid-19. Jăt mờ hơ̆, Thủ tướng Chính phủ sồr Bộ Nông nghiệp mờ Phát triển Nông thôn mờ ală tiah lam lơh dùl ròt bal ală broă lơh sền gàr ờ gơtùi tơn tĕ gùng lơh sa sươn sre; ai geh wil tơl phan lơh geh bơh sươn sre ai jơnau kờñ tăc bro tàm lơgar mờ lơh gơlik phan, tăc mờ lơgar ndai tàm jơh ală bơta lơi digơlan gơlik geh. Bộ Công thương bơto pơlam ală tiah neh gròi sền kòp bơtờp pờ wơl drà ờs mờng, drà tờm tăc bro phan di tŭ tăc bro phan bơna ai làng bol in; pơgồp bal mờ ală ƀộ, gah lơh broă dong kờl pờ mpồng drà tăc mờ lơgar Lo phan lơh geh bơh sươn sre di gùng.

Bộ Giao thông Vận tải sền gàr ală gùng lòt pơndiang phan gơtùi lòt rê niam sùm tàm jơh gùt lơgar, ai tơl bơta ƀươn ngan rlau jơh ai broă jun pơndiang phan lơh geh bơh sươn sre, phan bơna drơng tàm broă lơh sa sươn sre mờ tăc bro, tăc mờ lơgar ndai phan lơh geh bơh sươn sre. Ală tiah lam lơh jăt di tŭ Kơrnoat bơh Chính phủ dê bè dong kờl mpồl lơh sa kă bro, hợp tác xã, hìu bơnhă lơh sa kă bro tàm tơngai kòp Covid-19, sền gàr broă lơh rơcăng sơndră kòp tàm anih lơh broă dipal mờ bơta geh ngan tàm tiah he dê.

Cau mblàng Lơ Mu K’Yến