VOV4.K’ho- Kung tàm ngai 09/11, Quốc hội pơn jat tai cribơyai bè ală broă lơh rơcang sơndră kòp Covid-19. Ală kuang bàng đơs niam ală broă lơh nền bơh Chính phủ dê tàm broă lơh rơcang sơndră kòp Covid-19 kờñ gơ dờp ngac ngar mờ tŭ tơngai pa; lơh ngan tơnguh broă cribơyai blơi sơnơm vaccine, sơnơm sơm kòp bơh lơgar ndai. Bulah bè hơ̆, 2, 3 nă kuang bàng đơs là: broă lơh đơs lài bè broă gơlik geh bơh kòp Covid-19, broă đơng lam rơcang sơndră kòp tàm 2, 3 càr, ƀòn dờng gam kwi kuơ, broă ai tơlik 2, 3 jơnau sồr bè sră nggal lơh broă tàm 2, 3 càr, ƀòn dờng ờ ring bal, lơh gơbàn kal ke ai broă lòt rê, pơndiang, tac bro phan bơna. Uă kuang bàng sồr Chính phủ pal gờñ sền sơ wì wơl 2, 3 jơnau sồr ing bè broă gơ dờp ngac ngar, ờdo ờdă, gròi sền geh cồng nha kòp bơtờp nàng geh broă bơ sir dipal mờ tŭ tơngai pa.

Đơs tus tơngume bơsram pờ tơn tàm internet tàm tơngai kòp Covid-19, ờ uă kuang bàng đơs là; broă bơsram pờ tơn tàm internet là broă pal lơh, là broă niam ngan rlau jơh, gàr niam ờdo ờdă ai cau bơsram in tàm tơngai kòp Covid-19 gơlik geh kal ke mơya kung gam uă bơta ờ niam bè cồng nha bơto bơsram ờ hềt geh gàr niam; phan bơna, măi mok ngui bơto bơtê mờ bơsram gam ờ hềt niam, broă atbồ kơnòm bơsram ờ hềt geh cồng nha.

Cau mblàng K’Duẩn