VOV4.K’ho - Pa do, Chính phủ neh tơlĭk Nghị quyết sồ 34 bè broă gàr tơl niam phan sa dà lơgar tus nam 2030. Tàm hơ̆ geh đơs uă tus mờ broă tơl niam phan sa sùm geh Đảng mờ Dà lơgar sền gròi ngan, đơng lam, nàng tơl niam phan sa dà lơgar tềng đăp măt mờ jŏ jòng.

Nghị quyết ai geh tơngu me bal là tơl phan sa, phan ngui ai broă ngui sa tàm lơgar tàm ală bơta mờ dùl bơnah ai tăc mờ lơgar bờdih; tơnguh uă phan sa ai làng bol in nàng gàr niam broă geh tìp mờ phan sa bơkah, niam ờ do ờ dă; rơhời tơnguh dờng să jan, bơta pràn, bơta ngăc ngar làng bol lơgar Việt Nam.

Nghị quyết kung ai tơlĭk ală kơnòl, broă lơh bè chồl pràn broă tơnguh bơtàu, lơh niam wơl broă lơh phan sa, pơgồp bal mờ drà kă bro; bơcri priă tơnguh bơtàu broă lơh drơng broă lơh gơs phan sa in.

Cau mblàng Ndong Brawl