VOV4.K’ho- Di dơ̆ tơngkah kir sơnrai 74 nam ngai Cau ling sồt să- Cau ling chơ̆t màng (27/7), 60 nam rềs àr sơnơm khih dioxin lơh aniai Việt Nam, ồng Nguyễn Xuân Phúc- Chủ tịch lơgar neh lơh broă mờ Mpồl dong kờl hìu bơnhă cau ling chơ̆t màng mờ Mpồl cau gơtìp sơnơm khih dioxin lơh aniai Việt Nam.

Chủ tịch lơgar pà phan ai Mpồl dong kờl hìu bơnhă cau ling chơ̆t màng Việt Nam in

Chủ tịch lơgar đơs niam ngan ală Mpồl neh bơyai lơh uă broă lơh geh ngan, pơgồp bơnah lơh jat gùng dà broă lơh bơh Đảng, adat boh lam bơh Dà lơgar dê bè dong kờl, kah ưn ngài ală cau ling sồt să, cau ling chơ̆t màng, cau geh màng mờ dà lơgar mờ cau gơtìp sơnơm khih dioxin lơh aniai Việt Nam. Chủ tịch lơgar đơs ngan, tàm ală rài tam lơh mờ dơ̆ tam lơh tờm sền gàr dà lơgar, geh uă ngan cau kòn bơh dà lơgar dê neh khin cha chơ̆t phi să tài bơh bơta lơngap lơngai, khat gơboh is bơh dà lơgar dê. Den tàng bè hơ̆, kis gĭt jơnau gĭt adat, kah ưn ngài ală dà kơl hề, bơta chơ̆t phi să hơ̆ là bơhiàn hùc dà kah bồ tô dà bơh jơi bơtiàn he dê, là gùng dà broă lơh kuơ màng bơh Đảng he dê. Tus tŭ do, Dà lơgar neh ai ngui uă broă lơh, adat boh lam nàng dong kờl ală hìu bơnhă geh màng mờ dà lơgar, ală hìu bơnhă cau ling sồt să, cau ling chơ̆t màng, ală cau gơtìp sơnơm khih dioxin lơh aniai.

Cau mblàng K’Hạnh