VOV4.K’ho- Chủ tịch lơgar ồng Nguyễn Xuân Phúc pa geh dơ̆ tìp mat mờ 45 nă cau ala mat cau lơh sa kă bro là cau ling yau pơn rơ jak ngan, ala mat ai ală cau lơh sa kă bro bơh Mpồl cau lơh sa kă bro là cau ling yau gùt lơgar dê.

Chủ tịch lơgar ồng Nguyễn Xuân Phúc tìp mat ală cau ala mat cau lơh sa kă bro là cau ling yau

Ala mat kuang đơng lam bồ Đảng, Dà lơgar, ồng Nguyễn Xuân Phúc- Chủ tịch lơgar jờng rơ, đơs niam ngan Mpồl cau lơh sa kă bro mờ ală cau tàm mpồl cau lơh sa kă bro dê pơn jat tai lơh jat niam nùs nhơm, rài kis “Cau ling Wa Hồ dê” neh geh uă cồng nha uă ngan tàm broă lơh sa kă bro mờ broă lơh niam dong kờl kòn bơnus, geh kơnòl mờ mpồl bơtiàn bal mờ dà lơgar. Kuơ màng, Chủ tịch lơgar tơngkah ală cau lơh sa kă bro sền gròi sơlơ bơtàu tơnguh tơlir, ngui công nghệ lơh gơlik geh priă lơh geh uă, geh ală broă lơh tă pơgồp bal sền gàr tiah ơm kis ngai sơlơ niam rlau tai. Ală cau lơh sa kă bro là cau ling yau pal pơn jat tai lơh jat niam nùs nhơm cau ling Wa Hồ dê nàng pơn jat tai gơ rề lơh uă nùs nhơm kờñ gơboh, lơh krơh niam bơh ală cau lơh sa kă bro cau ling yau dê tus mờ ală rơnàng làng bol, lơh jat niam nùs nhơm lơh ngan lơh is, bơt bơtàu mpồl lơh sa kă bro bơtàu tơnguh kơ̆ kơl jap, tă pơgồp tàm bơta jai pha sơndră kòp Covid-19, ờdo ờdă Việt Nam.

Cau mblàng K’Hạnh