VOV4.K’ho - Chủ tịch lơgar ồng Nguyễn Xuân Phúc pa tơlĭk kơrnoăt bè broă pà phan di tơnkah 74 nam ngai cau ling sồt să, cau ling chơ̆t màng ngai 27 nhai 7. Jăt mờ hơ̆, khà priă 600 rơbô đong pà cau geh màng mờ dà lơgar, tàm hơ̆ geh: Cau mè Việt Nam khin cha jăk chài; cau ling sồt să, cau geh dờp broă dong kờl ndrờm bè cau ling sồt să, cau ling sồt să khà B, cau ling kòp tê jê să gơmù bơta pràn lơh broă bơh 81% rơlao hờ đang gam dờp broă dong kờl pah nhai; cau lơh broă tàm rài tam lơh gơtìp sơnơm khih hoá học lơh aniai , gơmù bơta pràn lơh broă bơh 81% rơlao hờ đang gam dờp broă dong kờl pah nhai; cau pròc mhàm cau ling chơ̆t màng gam dờp broă dong kờl ròng siam pah nhai; cau pròc mhàm bàr nă cau ling chơ̆t màng rơlao hờ đang gam dong kờl pah nhai.

Khà priă 300 rơbô đong pà: cau ling sồt să, cau geh dờp broă dong kờl bè cau ling sồt să, cau ling sồt să khà B, cau ling kòp tê jê să gơmù bơta pràn lơh broă bơh 80% gơmù hờ đơm gam dờp broă dong kờl pah nhai; cau ling sồt să gam dờp broă dong kờl roh bơta pràn lơh broă; cau lơh broă tàm rài tam lơh gơtìp sơnơm khih hoá học lơh gơmù bơta pràn lơh broă bơh 80% gơmù hờ đơm gam geh dờp broă dong kờl pah nhai.

Cau mblàng Ndong Brawl