VOV4.K’ho- Di tơngkah kir sơnrai 74 nam Ngai cau ling sồt să, cau ling chơt màng (27/7/1947 – 27/7/2021), Chủ tịch lơgar ồng Nguyễn Xuân Phúc neh geh sră pơyua kah ưn ngài pơyua tus cau ling sồt să, cau ling kòp tê jê să, hìu bơnhă cau ling chơt màng mờ cau geh màng mờ dà lơgar. Tàm sră pơyua, Chủ tịch lơgar ồng Nguyễn Xuân Phúc jơh nùs pơyua tus ală kuang bàng lơh broă kac màng dờng sơnam, ală mè Việt Nam khin cha jak chài, cau ling làng bol khin cha jak chài, cau lơh broă khin cha jak chài, ală cau ling sồt să, cau ling kòp tê jê să, cau tờm pròc mhàm bơh cau ling chơt màng dê, cau geh màng mờ dà lơgar jơnau lùp còp jơh nùs, ală nùs nhơm dờng màng mờ bơta kah ưn ngài uă ngan.

Chủ tịch lơgar tơngkah kấp ủy, gơnoar atbồ ală kấp, ală bộ, gah broă lơh, anih lơh broă, mpồl lơh broă mờ tơl nă làng bol mờ ală broă lơh ngan ngồn, geh kuơ, jơh nùs tus bal gơwèt mờ broă lơh cau geh màng mờ dà lơgar mờ srơh “Jơh gùt làng bol gròi sền ală hìu bơnhă cau ling sồt să, cau ling chơt màng mờ cau geh màng mờ dà lơgar”, sền hơ̆ là kơnòl broă, là nùs nhơm nàng ai tơnggŏ nùs nhơm kah ưn ngài gơ wèt tus mờ ală cau neh geh màng tàm broă lơh tơngklàs jơi bơtiàn, bơt bơtàu, sền gàr dà lơgar.

Cau mblàng K’Duẩn