VOV4.K’ho- Mho mang ngai 03/12, tàm Hìu lơh broă Quốc hội, Chủ tịch Quốc hội ồng Vương Đình Huệ đơng lam dơ̆ pơrjum lơh broă mờ Thường trực Ủy ban mpồl bơtiàn mờ ală anih lơh broă geh gơ rềng bè broă Chính phủ yal mờ Ủy ban Thường vụ Quốc hội ai gơnoar lam lơh 2, 3 cơ chế, broă lơh kuơmàng, broă ai lơh lài, broă lơh krơi is tàm rơcang sơndră kòp Covid-19 nàng lam lơh broă rơndap lơh tơrgùm jơh ală bơta bè rơcang sơndră kòp Covid-19.

Đơs tàm dơ̆ pơrjum, ală jơnau đơs tă pơgồp ngan ngồn, loh làng tàm tơl broă lơh. Bè cau lơh broă tus bal cit sơnơm vaccine, xét nghiệm, gròi sền, sơm cau bơtờp kòp Covid-19 in, Chính phủ pal đal git loh, anih kham sơm kòp, anih lơh sơnơm, anih dờp cau kòp. Chủ tịch Quốc hội ồng Vương Đình Huệ đơs nền bơta kuơmàng ai tơlik Nghị quyết bơh Ủy ban Thường vụ Quốc hội dê ai gơnoar lam lơh 2, 3 cơ chế, broă lơh kuơmàng, broă ai lơh lài, broă krơi is nàng Chính phủ ai tơlik mờ lam lơh broă rơndap lơh tơrgùm jơh ală bơta bè rơcang sơndră kòp Covid-19. Bulah bè hơ̆, broă bơsir bơh jơnau rơcang cih Nghị quyết do dê mìng tơrgùm cih tàm ală cơ chế, broă lơh kuơmàng, broă ai lơh lài, broă krơi is bè rơcang sơndră kòp Covid-19 krơi mờ jơnau cih bơh adat boh lam dê halà ờ hềt geh adat boh lam gam geh lơh jat tŭ do cih.

Cau mblàng K’Duẩn