VOV4.K’ho- Ƀộ Y tế đơs, tus tŭ do, bơta kòp sền bal neh geh gròi sền tàm làm gùt lơgar. Bulah bè hơ̆, khà cau bơtờp tàm mpồl bơtiàn pơn jăt tai geh tơngŏ gơguh tai tài bơh ală broă lơh mpồl bơtiàn lơh wơl bè ờs. Gơwèt mờ ală cau bơtờp kòp Kovid-19, gơnoar ătbồ ƀòn lơgar bal mờ mpồl cau lơh sơnơm, ƀác sĩ mờ ală cau lơh broă gah lơh sơnơm sùm lùp còp, jăt sền jơh nùs ngan bơta gơbàn bơh cau kòp dê kung bè dong jun phan bơna ngui sa kờñ pal geh...gàr niam jơh ală cau bơtờp kòp Kovid-19 ndrờm geh sền gròi mờ dong kờl sơm kòp.

Pa do, Hìu sơnơm dờng ƀòn dờng Cần Thơ neh bơyai lơh dơ̆ dờp 45 tấn oxy dà bơh ală cau dong kờl dê lời ai broă lơh sơm kòp ai cau kòp Kovid-19 kơn jơ̆ in. Tàm dơ̆ bơyai lơh dờp, ƀác sĩ Cuyên khoa II ồng Trần Quốc Tuấn là Kwang ătbồ Hìu sơnơm dờng ƀòn dờng Cần Thơ đơs, bơta tàm sơm băt tê bal dong kờl dờng màng ngan bơh ală anih lơh broă, mpồl lơh sa kă bro, mờ cau geh nùs nhơm niam dê là phan pà dờng màng ngan nàng ală cau bơtờp kòp Kovid-19 in iang nùs sơm kòp. Ƀác sĩ Cuyên khoa II ồng Trần Quốc Tuấn, đơs: Mờ khà oxy geh pà, jăt añ den tàm tơngai do là dờng màng ngan, ngan là gơwèt mờ rlau 300 nă cau kòp Kovid-19 tàm cờñ 2 sơng bơng roh ngan mờ cờñ 3 gam piam kòp tàm do. Bol añ geh lơh ngan ngui khà oxy do dùl bă geh cồng nha mờ tềm pềr ngan rlau jơh ai cau bơtờp kòp Kovid-19 in.

Tŭ do, ală càr mờ ƀòn dờng neh lơh ală hìu sơnơm ntrờn làm bă tiah tàm ală xã, sơnah ƀòn, thị trấn nàng dong kờl, sền gròi sơm kòp ai cau F0 in tàm hìu. Lòt bal mờ ală hìu sơnơm xã, Thàñ đoàn ală tiah neh hòi jà tă pơgồp ală kơldung phan ờdo ờdă rài kis nàng pà cau bơtờp kòp Kovid-19 in gam sơm kòp tàm hìu. Bi Dương Hiệp Hưng là Ƀí thư Thàñ đoàn Quy Nhơn, càr Bình Định, pà gĭt: Bol añ yal gùng che điện thoại is nàng cau F0 in geh bơta lơi kờñ lùp den lùp mờ Hìu sơnơm xã ntrờn làm bă tiah kung bè Đoàn ơruh pơnu nàng geh dong kờl. Tŭ do, bol añ neh ai 136 nă cau lơh broă dong kờl is nàng dong kờl ƀòn lơgar jòi cau ơm rềp mờ test cau pin bơtờp kòp.

Bal mờ hơ̆, nàng tơrmù khà cau gơbàn kơn jơ̆ den jơnau sồr tờm ngan là lơh bè lơi nàng làng bol geh kham sơm kòp bơh gờñ, bơh ngài; mơkung tơnguh uă bơta pràn lơh sơnơm xã in, sùm rơcăng lài bè phan bơna, măy mok, cau lơh broă, sơnơm sơm kòp, oxy...gàr tơl phan sa bơkah tơl pràn mờ sền gàr, pơndờm pơnđiang nùs nhơm ai cau kòp in, pơgồp bal sơnơm yau mờ sơnơm pa tàm broă sơm kòp.

Jăt Ƀộ Y tế yal, tŭ do, tàm khà rlau 200 rbô nă cau bơtờp kòp Kovid-19 gam geh sơm kòp tàm lơgar he, geh rlau 100 rbô nă cau F0 gam geh kham sơm kòp tàm hìu, geh tus 47%; Mờr 15 rbô nă cau kham sơm kòp tàm ală tiah ơm yah ngài tơrgùm bal, geh tus 7%; Khà gam wơl mờr 100 rbô nă cau kòp gam sơm kòp tàm ală hìu sơnơm. Tơngai rềp ndo, khà cau chơ̆t tài bơh kòp Kovid-19 kung gam ơm tàm khà jơnhoa sơl tàm ƀòn dờng Hồ Chí Minh mờ geh tơngŏ gơguh wơl tàm ală càr: Bình Dương, Đồng Nai mờ geh tŭ là tàm càr lơgar Hà Nội.

Nàng kờñ gàr niam jơh ală làng bol bơtờp kòp Kovid-19 ndrờm geh sền gròi sơm kòp, Ƀộ Y tế sền bal neh gàr tơl jơnau kờñ gơwèt mờ ală sơnơm rơcăng sơndră kòp, ngan là mờ 46 bơta sơnơm cih tàm Kơrnoăt sồ 2626 bơh Ƀộ Y tế dê. Jăt Phó Thủ tướng ồng Vũ Đức Đam yal, tàm broă rơndăp lơh, Ƀộ Y tế geh blơi bơh lơgar ndai 400 rbô ding sơnơm Molnupiravir, mơya tus tŭ do rơ̆p pa rê tàm lơgar geh 250 rbô ding. Mơya, gam geh sơnơm sơndră virus ndai là Favipiravir, tŭ do kung gam 2 tơlak kơnar sơl. Jơh ală ndrờm rơcăng ai ngui, sơm kòp ai ală cau bơtờp kòp Kovid-19 in. Phó Thủ tướng ồng Vũ Đức Đam, sồr: Favipiravir pà tơn gam 2 tơlak kơnar ai ală tiah in, cau gơtìp bơtờp kòp là pà tơn. Mờr tus geh sơnơm bơh Pfizer dê mờ dùl ròt hìu măy gam rơcăng lơh gơlik sơnơm Molnupiravir tàm lơgar. Tŭ do, lơh ngan lơh sir  ală broă lơh sơm kòp tàm hìu. Kờñ tơrmù chơ̆t să, pal geh broă jăt sền kham sơm kòp tus tơl nă cau kòp. Mờ cờñ 2, cờñ dơ̆ dùl là kham sơm kòp bơh ngài, ngan là ờ gŏ di lời cau lơi ờ geh kham sơm kòp bơh ngài, cờñ dơ̆ 2 là tàm bơta geh ngan ngồn.

Phó Thủ tướng ồng Vũ Đức Đam kung sồr sơl Ƀộ Y tế pal geh tơl sơnơm sơm kòp, bañ lời ờ tơl sơnơm; sồr mờ bơto pơlam ală tiah, ală hìu sơnơm rơcăng lài blơi sơnơm sơm kòp; kong kơnòl sền swì nền, ătbồ bơta niam sơnơm geh ai ngui; bơyai lơh blơi tơrgùm bàr pe bơta sơnơm sơm kòp pal geh; tam pà, dong kờl di tŭ sơnơm sơm kòp ai ală tiah in; gơwèt mờ ală bơta sơnơm pal geh, pal geh khà sơnơm rơcăng lài dipal ai jơnau digơlan kòp gơbàn ờ niam in...Mơkung bơto pơlam, ai tơl bơta ƀươn ai ală mpồl cau, anih lơh broă in mhar blơi bơh lơgar ndai, lơh gơlik sơnơm sơm kòp Kovid-19; dong kờl lơh tơrlòng lài, tàm jàu măy mok, lơh gơlik vaccine, sơnơm sơm kòp Kovid-19 tàm lơgar nàng rơcăng lài priă jền mờ tềm priă jền tă ngui.

Cau cih VOV4- Cau mblàng Lơ Mu K’Yến