VOV4.K’ho- Mho ngai 10/01, Kwang àng càr Gia Lai bơyai lơh dơ̆ jờng rơ 35 nă cau geh bơngă pin dờn pơnrơ tàm srơh jơh gùt làng bol sền gàr lơngăp lơngai dà lơgar tơngai bơh nam 2020- 2021. Tơngai do, Kwang àng càr Gia Lai neh geh bơta dong kờl bơh mpồl cau geh bơngă pin dờn tàm làng bol jơi bơtiàn kòn cau dùl êt nă cau dê.

Mùl màl, neh geh rlau 3 rbô nă cau geh bơngă pin dờn lơh jăt jơnau iăt kơno jơnau gơlik geh, mblàng yal, hòi jà làng bol, yal tơngĭt rlau 350 jơnau. Bơh hơ̆, mpồl cau geh bơngă pin dờn tàm làng bol jơi bơtiàn kòn cau tàm càr Gia Lai neh bal mờ mpồl kwang àng mờ gơnoar ătbồ càr tus bal mblàng yal, hòi jà làng bol lơh jăt gùng dà, broă lơh bơh Đảng, kơrnoăt boh lam bơh Dà lơgar dê; hòi jà làng bol tiah nhàr lơgar sền gàr gùng nhàr lơgar, jrong nhàr lơgar, kơryan dô gan nhàr lơgar tìs mờ kơrnoăt boh lam; mblàng yal làng bol in sền gàr ală adat bơhiàn ờs mờng bơh yau, bơta pin dờn jăt yàng niam bơnĕ.

Cau mblàng Lơ Mu K’Yến